Jeremiah 34 in Sunwar

1 परमप्रभु यावेम येरमीया कली बेबीलोन ङा पिप नेबुकदरेसर, मेको आ लडाइ पाइब नेल्‍ल, रागी ङा राज्‍य नेल्‍ल नु मेको आ सासन पशो रागी ङा मुर नेल्‍लेम यरूसलेम नु आ एर ओंथ ङा सहर नेल्‍ल आन कली लडाइ तोम्‍तेक्‍म। मेना इस्राएली आन परमप्रभु यावेमी येरमीया आं कली लोव़ पाप्‍तु। येरमीया ५२:४; २राजा २५:१-२

2 मिनु परमप्रभु यावे, इस्राएली आन परमप्रभुमी आं कली “यहूदा ङा पिप सिदकीयाह आ बाक्‍तीक लावो। मिनु मेको कली परमप्रभु यावेमी ‘गो एको सहर बेबीलोन ङा पिप आ गुइम गेनुङ। मिनु मेकोमी एको सहर कली मीम क्रोइक्‍ब। येरमीया २१:१०

3 गे मेको आ गुइ रे ब्रोंइचा मताइ‍नेवे। गे थमा पा ग्‍याइक्‍चा पुंइसीशा मेको आ गुइम दुम्‍नेवे। गे बेबीलोन ङा पिप कली तशा, मेको नु कोव़मुशा लोव़ पाइनेवे’ दे बेबीलोन लचा माल्‍नेवे” देंत। येरमीया ३२:४

4 मो हना यो ए यहूदा ङा पिप सिदकीयाह, परमप्रभु यावे आ लोव़ नेनीन “गे तरवारम साइक्‍चा मपुंइसीनीनी। येरमीया ५२:११

5 गे इन थुं नाइश्‍शा बेक्‍नीनी। मिनु दोपा इन किकी पिपी इन ङोंइती ङा पिप आन कली मुरपुकीमी ब्रोव़शो रिना पाइब थोव़क चोशा थिम्‍मे, मोपा मेकोपुकीमी इन कली यो थिम्‍नीम। इन पर्बम ‘आंइ प्रभु’ दे रोंका पाइनीम। गो मेको लोव़ पाता, दे नेल्‍लेम नेंचा ङा पा देनो” दे परमप्रभु यावेमी देंत। २इतिहास १६:१४; येरमीया २२:१८

6 मिनु येरमीयामी मेको लोव़ नेल्‍ल यरूसलेममी यहूदा ङा पिप सिदकीयाह कली देंत।

7 बेबीलोन ङा पिप आ लडाइ पाइब मुरपुकी यरूसलेम नु यहूदा ङा अरु सहर नु लडाइ पना पन बाक्‍शो बाक्‍तेक्‍म। लाकीश नु आजेका नु यो मेकोपुकीमी लडाइ पचा मप्रोंइशो बाक्‍तेक्‍म। मेको यहूदा ङा गारो हिरशो सहर निक्‍शी ला लीशो बाक्‍ताक्‍स।

8 मेना परमप्रभु यावेम येरमीया कली लोव़ पाप्‍तु। मेना यहूदा ङा पिप सिदकीयाहम यरूसलेम ङा मुर नेल्‍ल नु वाइलीम वाइल नेल्‍ल आन कली प्रोंइचा माल्‍नीम, दे कबल पशो बाक्‍त। येरमीया ३४:१४

9 मेना मुर नेल्‍लेम आंम हिब्रू वाइलीम वाइल आन कली प्रोंइचा माल्‍तेक्‍म। सुइम यो आंम हिब्रू लोक्‍ब आन कली वाइलीम वाइल सेल्‍चा मदुम।

10 मिनु मेको लोव़ टीब ठेयब मुर नु कबल टीब मुर नेल्‍लेमी आंम आन वाइलीम वाइल आन कली प्रोंइचा नु लेंशा अर्को वाइलीम वाइल मवोइक्‍चा नम, देंशो बिस्‍साक्‍म। मिनु मेकोपुकी गारशा, मेको आन कली प्रोंइतेक्‍म।

11 मिनु नोले लेंशा मेकोपुकीमी आन थुं लेश्‍शा आन प्रोंइशो वाइलीम वाइल आन कली लेंशा चाक्‍शा वाइलीम वाइल सेल्‍तेक्‍म।

12 मिनु परमप्रभु यावेम येरमीया कली लोव़ पाप्‍तु।

13 मार, लोव़ पाप्‍तु देंशा हना “परमप्रभु यावे, इस्राएली आन परमप्रभुमी ‘गो मेको आन किकी पिपी आन कली इजीप्‍त रागी ङा वाइलीम वाइल दुम्‍तीक खिं रे प्रोंइशा चाक्‍तामी। मिनु गो मेकोपुकी नु कबल पाता।

14 तेकोइ ७ बर्सम इन कली लेयसीशो मुर इन हिब्रू लोक्‍बम इन कली ६ बर्स गेय पवा नोले, ७ बर्सम मेको कली प्रोंइचा माल्‍ब’ देंती। तन्‍न इन किकी पिपीम आं लोव़ मटीम। आन नोफान मदाइक्‍तेम। प्रस्‍थान २१:२; लेवी २५:३९-४१; ब्‍यवस्‍था १५:१२

15 गेपुकीम चहिं नक माफ पुंइशा आं ङोंइती नेल्‍ल आन कली प्रोंइचा नम, देंशो लोव़ ठीक पाइतीनी। मिनु गेपुकीमी आं नें बाक्‍तीक खिंम आं ङोंइती कबल का पाइतीनी। लेवी २५:१०

16 तन्‍न नोले इन थुं फाइश्‍शा आं नें ग्रांग्रा दिशो सेल्‍तीनी। गे नेल्‍लेम इन ङोंइती प्रोंइशो वाइलीम वाइल आन कली लेश्‍शा चाक्‍‍तीनी, देंशो बाक्‍ब” देंत।

17 मोपतीके परमप्रभु यावेमी “गेपुकीम आं देंशो मटिनी। मिनु आंम रागी ङा आंम नेक्‍था ङा मुर नु आंम वारच आन कली वाइलीम वाइल दुम्‍तीक रे मप्रोंइनी। मोपतीके गो मुल इन कली प्रोंइनन्‍नी। गो इन कली तरवार, मुर बेक्‍तीक रोइ नु अन्‍कालम साइक्‍पाइक्‍चा कली प्रोंइनन्‍नी। गो इन कली राज्‍य नेल्‍लेम शुश हिंचा ङा सेल्‍नन्‍नी।

18 आं कबल क्‍याम्‍ब नु आं ङोंइती पशो कबल ङा पतीके मपाइब मुर आन कली बाछा खोदेंशो सेल्‍नुङमी। मेको कली फेके निक्‍शी सेल्‍तेक्‍म। मिनु मेको आ दाते रे गाक्‍तेक्‍म।

19 मिनु मेको बाछा आ फेके निक्‍शी आस दाते रे गाक्‍ब यहूदा नु यरूसलेम ङा सरकार आ गेय पाइब, दरवार ङा ठेयब मुरपुकी, चढ़ेबपुकी नु रागी ङा मुर नेल्‍ल

20 आन जोरी सत्रु आन गुइम नु आन कली साइक्‍चा माल्‍ब आन गुइम गेचा पुंइसीनीम। मेको आन बेक्‍शो रां सरीङ ङा चिक्‍ब नु रागी ङा जन्‍तु आन ब्‍वतीक दुम्‍ब। येरमीया ७:३३

21 यहूदा ङा पिप सिदकीयाह नु मेको आ सरकार ङा गेय पाइब आन कली साइक्‍चा माल्‍ब, आन जोरी सत्रु आन गुइम नु बेबीलोन ङा पिप आ लडाइ पाइब आन गुइम गेनुङमी। मेको लडाइ पाइबपुकी इन रे लेश्‍शा लशो बाक्‍तेक्‍म” देंत। येरमीया ३७:५

22 परमप्रभु यावेमी “गो मेको आन कली अरेनुङमी। मिनु गो मेको आन कली एको सहरमी लेश्‍शा चाक्‍नुङमी। मेकोपुकीमी एको सहर नु लडाइ पा ग्रानीम। मिनु एको कली क्रोइक्‍नीम। मिनु गो यहूदा ङा सहर कली मुर मबाक्‍शो सेल्‍नुङ” देंत। येरमीया ३७:८