Jeremiah 30 in Sunwar
1 मिनु परमप्रभु यावेम येरमीया कली लोव़ पाप्तु।
2 परमप्रभु यावे, इस्राएली आन परमप्रभुमी येरमीया कली मार लोव़ पाप्तु देंशा हना “गो इ कली देंशो लोव़ नेल्ल किताबमी ब्रेक्तो।
3 आं मुर इस्राएली नु यहूदा ङा मुर आन थुं लेश्शा नाइक्चा गेतीक नाक्त थमा पा जाक्ब। मिनु गो मेको आन किकी पिपी आन कली गेशो रागीम लेंशा लाइक्नुङमी। मिनु मेकोपुकीमी मेको रागी आंम के सेल्नीम” देंत। येरमीया २९:१४
4 इस्राएल नु यहूदा आस पर्बम परमप्रभु यावे आ लोव़ मार बाक्त देंशा हना
5 “शुश हिंब नु ग्रीब आन सेंदा नेंसीब। थुं नाइश्शा बाक्तीक जाम्त।
6 मार, वोंइश मुरुम आल थिने चाप्नीमी ङा? दे हिल्लो पने। मारदे वोंइश मुर नेल्ल सुत्केरी रोइ पशो खोदेंशो पा आन गुइम आन क्रातो दिप्शो ताइनुङमी? मारदे मुर नेल्ल आन कुल बुश दुम्शो बाक्नीमी?
7 आबी, मेको नाक्त दोदेंशो हिंचा ङा नाक्त दुम्बा। मेको नाक्ती खोदेंशो अर्को तेकोइ नाक्ती मदुम्नीम। मेको नाक्ती याकूब कली शुश हिंचा ङा श्येत जतीक नाक्ती दुम्ब। तन्न मेको श्येत रे प्रोंइचा पुंइसीब” देंत। योएल २:११; सेफन्याह १:१४-१५
8 मुर नेल्ल आन परमप्रभु यावेमी “गो मेको नाक्ती मेको आन बला रे जुवा जिक्नुङ। मिनु गो मेको आन कली फ्रेंशो रे प्रोंइनुङमी। मिनु अर्को रागी ङा मुरपुकीम मेको आन कली गेनायो वाइल मसेल्नीम। येरमीया २३:५; येरमीया २७:१२; इजीकीएल ३४:२३; होसे ३:५
9 तन्न मेकोपुकीम परमप्रभु यावे, आन परमप्रभु, आं कली नु आं सेल्शो पिप दाऊद आ गेय पाइनीम।
10 गे आं गेय पाइब याकूब महिनो। गे इस्राएल सुर्ता मपावो। गो इ कली ङोन रागी रे चाक्नुङ। इ आल आन कली ग्याइश्शा लाइश्शो रागी रे प्रोंइशा चाक्नुङ। याकूब कली लेंशा थुं नाइश्शा, हेम्मा पा बाक्तीक दुम्ब। मेको कली सुइम हिंच कोंइने मचाप्नीम। येरमीया ४६:२७; यसैया ४३:५-६
11 मारदे हना गो इ कली प्रोंइचा कली गे नु बाक्नुङ। इन कली फ्रशा वोइश्शो रागी रागी ङा मुर नेल्ल आन कली साइक्नुङमी। तन्न गो इ कली गेनायो मक्याम्नुङ। गो इ कली ठीक सजाइ गेनुङ। गो इ कली थमा पा सजाइ मगेथु, मप्रोंइनुङ” दे परमप्रभु यावेमी देंत। येरमीया १०:२४; ब्यवस्था ८:५
12 मिनु परमप्रभु यावेम “इ गार मसाब। मेको मरिम्शो बाक्ब। येरमीया १५:१८
13 सुइ इ पोन मबोक्ब। इ गार सापाइक्तीक ओख्ती मबाक्ब। इ कली सापाइक्तीक मारेइ मबाक्ब।
14 इ वारच नेल्लेम इ कली प्रेंने थुम्तेक्म। मेकोपुकीमी इ कली गेनायो ममिम्नीम। गो इ ठेयब दोस तशो नु इ शुश पाप आ पर्बम पतीके जोरी सत्रुम खोदेंशो पा तुप्तन। मिनु शिशी मपाइक्बम खोदेंशो पा गो इ कली सजाइ गेतन।
15 मारदे गे इ मसाब गार आ पर्बम वाइ ब्रेश्शा ङाक्नेवे? इ खाइश्शो मसाब। मारदे हना इ दोस तशो नु इ शुश पाप पशो आ पर्बम गो इ कली मो पाइश्शो बाक्नुङ।
16 मोपतीके गे इ कली दाक्ब नेल्ल दाक्चा पुंइसीनीम। इ जोरी सत्रु नेल्ल ग्याइश्शा लाइक्चा पुंइसीनीम। इ कली रोइक्बपुकी रोइक्चा पुंइसीनीम। इ कली खतम पोक्ब आन कली गो खतम पोक्नुङमी। यसैया ३३:१; इजीकीएल ३९:१०
17 गो इ कली लेंशा ङोंइती ङा खोदेंशो मारेइ मदुम्शो सेल्नुङ। मिनु इ गारपुकी सापाइक्नुङमी। मारदे हना इ कली ‘प्रोंइचा पुंइसीशो नु सुइम मिम्चा मपुंइसीशो सियोन’ देंनीम” दे परमप्रभु यावेमी देंत। येरमीया ३३:६; यसैया ५७:१८-१९
18 परमप्रभु यावेमी “गो याकूब आ ताम्बु ङा शोंप लेंशा गेनुङ। मिनु मेको आ बाक्तीक रागी कली शिशी पाइनुङ। मेको सहर ङा ब्रेश्शो नेल्ल आ डांडामी लेंशा सेल्सीब। मिनु आ दरवार लेंशा ङोंइती ङा आ बाक्तीकेमी सेल्सीब।
19 मेकेर ‘गे रिम्शो पाइब बाक्नीनी’ दे कुम्सो पशो नु थुं नाइश्शा बाक्शो ग्येरशो सेंदा नेंसीब। गो मेको आन कली शुश सेल्नुङमी। मिनु मेकोपुकी इच्का का ला मदुम्नीम। गो मेको आन कली मान ताइब सेल्नुङमी। मिनु मेको आन कली सुइम शुक्शी मपाइनीम।
20 मेको आन आलपुकी ङोंइती ङा खोदेंशोन दुम्नीम। मिनु मेको आन ग्रुम्तीके आं ङोंइती बाक्ब। मेको आन कली दिप्ब नेल्ल आन कली गो सजाइ गेनुङमी।
21 मेको आन कली हुकुम पाइब मेको आन दाते ङा का दुम्ब। मेको आन कली सासन पाइब आंम आन मुर बाक्ब। गो मेको कली आं नेक्था चाक्नुङ। मिनु मेको आं नेक्था जाक्ब। मारदे हना आं नेक्था आंमा सु जाक्बा ङा?” दे परमप्रभु यावेमी देंत। येरमीया ३०:९
22 परमप्रभु यावेम “गे आं मुर दुम्नीनी। मिनु गो इन परमप्रभु दुम्नुङ” देंत। येरमीया ७:२३
23 नेनीन, परमप्रभु यावे आ गाइश्शोम फश गिवार बोक्ब। मेको आ अरेशो मटीब आन पियाम जुक्ब। येरमीया २३:१९-२०
24 परमप्रभु यावे आ थुंम मिम्शो मगाम्म सम्म मेको आ चुरशो मनांइसीब। गेपुकीमी नोले ङा नाक्ती मेको रुप्नीनी।