Jeremiah 16 in Sunwar
1 मिनु परमप्रभु यावेमी आं कली मार देंत देंशा हना
2 “गेमी एको रागीम ग्युंबे पचा नु तमी तौ थिचा मदुम्नेवे” देंत।
3 मारदे हना एको रागीम जरमेशो तमी तौपुकी नु आन आंम आफ आन पर्बम परमप्रभु यावेम
4 “मेकोपुकी मसाब रोइम बेक्नीम। मेको आन पर्बम सुइम रोंका मपाइनीम। मेको आन कली सुइम मथिम्नीम। मेकोपुकी खपीम मोव़ल खोदेंशो पा बाक्नीम। मेको तरवार नु अन्कालम बेक्नीम। आन बेक्शो रां सरीङ ङा चिक्ब नु रागी ङा जन्तु आन ब्वतीक थोव़क दुम्नीम” देंत। येरमीया ९:२१
5 मारदे हना परमप्रभु यावेम “गे मुर बेक्शो खिंमी रोंका पथ नु रोंका पाइब आन कली लेम्थ मलावो। मारदे हना गो मेको जात ङा मुर रे थुं नाइक्तीक, गेना हना यो दाक्तीके नु शिशी पतीके लाइक्ने थुम्ता।
6 एको रागीम आइक्च नु ठेयब नेल्ल बेक्नीम। मेको आन कली सुइम मथिम्नीम। मेको आन पर्बम सुइम रोंका मपाइनीम। आंम रां रिक्सीब नु चां प्रेक्ब सुइ मबाक्नीम। येरमीया ४१:५; येरमीया ४७:५; येरमीया ४८:३७८; लेवी १९:२७-२८; ब्यवस्था १४:१
7 मिनु बेक्ब आन पर्बम रोंका पाइब नु आम आफ आस कली लेम्चा कली सुइम तूचा थोव़क मगेनीम।
8 गे भोज पशो खिंम मओव़ङो। मिनु मेकोपुकी नु जचा तूचा कली मनिस्सो।
9 मारदे हना मुर नेल्ल आन परमप्रभु यावे, इस्राएली आन परमप्रभुमी ‘गो एको रागी रे इन पालाम, इन ङोंइती रे थुं नाइश्शा बाक्तीक, ग्येरशो सेंदा नु ग्युम्ली ग्युम्ले आस सेंदा क्याम्नुङ’। येरमीया ७:३४
10 मिनु गे एको मुर आन कली एको लोव़ नेल्ल देंनेनु, मेकोपुकीमी इ कली ‘मारदे परमप्रभु यावेम आंइ कली ओदेंशो ठेयब मरिम्शो दुम्तीक देंमे? आंइ मरिम्शो पशो मार बाक्बा? गो परमप्रभु यावे, आंइ परमप्रभु कली मार पाप पका ङा?’ देंनीम। येरमीया ५:१९
11 मिनु गे मेको आन कली ‘इन किकी पिपीमी आं कली प्रोंइशा, देवी देवता आन नोले खोइश्शा, मेको आन कली पूजा पा ठेयब सेल्तेक्म। मोपा आं कली प्रोंइशा आं अरेशो मपामे।
12 गेपुकीमी इन किकी पिपी आन क्येङा शुश मरिम्शो पाइतीनी। नेनीन, गे एकेर बाक्ब नेल्लेमी इन खकटा थुंमी इन दला दाक्स पाइनीनी। मिनु गे आं लोव़ नेंचा मदाक्नीनी। येरमीया ७:२६
13 मोपतीके गो इन कली इन मतुइश्शो रागी नु इन किकी पिपी आन मतुइश्शो रागीम ताइक्नन्नी। मिनु गेपुकीम मेकेर नाक्दो नाक्ती देवी देवता आन कली पूजा पाइनीनी। मारदे हना गो इन कली शिशी मपाइनुङ’ देनो” दे परमप्रभुमी आं कली देंत। ब्यवस्था २८:६४
14 मिनु परमप्रभु यावेमी “परमप्रभु यावे ब्रोंइशा बाक्शो नु मुर आन कली इजीप्त रागी रे ग्रुंइशा एक चाक्शो खोदेंशो पा मदेंतीक नाक्ती थमा पा जाक्नीम।
15 तन्न मार देंनीम देंशा हना, मेकोपुकीमी ‘परमप्रभु यावे ब्रोंइशा बाक्शो नु इस्राएली आन कली उत्तर ङा रागी नु तेको तेको रागी रे चाक्शो खोदेंशो पा’ देंनीम। मारदे हना गो मेको आन कली आन किकी पिपी आन कली गेशो रागीम चाक्नुङमी। येरमीया २३:७-८
16 मुल गो शुश ग्याइल आप्ब आन कली ब्रेश्शा सोइक्नुङमी। मिनु मेकोपुकीमी मेको आन कली ग्याइक्नीम। नोले गो लेंशा शुश सिखारी आन कली ब्रेश्शा सोइक्नुङमी। मिनु मेकोपुकीमी, मेको आन कली तेकोइ डांडा नु तेकोइ पहाड नु सेरथे फुल्लु ङा काक्पे रे माल्शा ग्रुंइनीम।
17 मारदे हना गो मेको आन लां नेल्ल तुइक्नुङ। मेको आं ङोंइती मख्रुइश्शो बाक्नीम। मेको आन मरिम्शो पशो यो आं ङोंइती मख्रुइश्शो बाक्ब। अय्युब ३४:२१
18 गो मेको आन मरिम्शो पशो नु आन पाप आ पर्बम मेको आन कली निक्शी खेयप सजाइ गेनुङमी। मारदे हना मेकोपुकीमी सोक्ती मपाइश्शो मूर्तिपुकीम आं रागी ग्रांग्रा दिशो सेल्तेक्म। मिनु आं थेरशो रू आन ग्रांग्रा दिशो देवी देवताम प्रिंताक्म” देंत। यसैया ४०:२
19 मिनु मेकोपुकीमी “परमप्रभु यावे, गे आं सक्ति नु आं ख्रुइश्शा, ब्रोंइशा बाक्तीक बाक्नीनी। गे श्येत जची ना आं ख्रुइक्तीके बाक्नीनी। रागी रागी ङा मुर रागी ङा सुर रे इन ङोंइती जाक्नीम। मिनु मेकोपुकीमी ‘आंइ किकी पिपी आन देवी देवता जोल ला बाक्तेक्म। मेको शोर गाक्शो बाक्तेक्म। भजन संग्रह ३६:७
20 मार, बेक्शा लाइब मुरपुकीम आंम देवी देवता सेल्ने चाप्नीमी ङा? तन्न मेकोपुकी देवी देवता मनम’ देंनीम।
21 मोपतीके गो मेको आन कली थमा पा रुप्पाइक्नुङमी। गो मेको आन कली आं सक्ति नु आं ठेयब दुम्तीके आ पर्बम शेंनुङमी। मिनु मेकोपुकीमी आं नें यावे बाक्ब, दे तुइक्नीम” दे परमप्रभु यावेमी देंत। प्रस्थान ३:१२