Jeremiah 13 in Sunwar

1 परमप्रभु यावेम आं कली “लशा सुती के धोती का ग्यापो। मिनु मेको पांइसो। तन्‍न मेको कली ब्‍वाक्‍कुम जित्‍चा मगेवो” दे माइक्‍ती।

2 मोपतीके गो परमप्रभु यावेम देंशो खोदेंशो पा, सुती के धोती का ग्‍याप्‍शा पांइसाक्‍यी।

3 मिनु लेंशा परमप्रभु यावेम आं कली

4 “बोक्‍को, इ ग्‍याप्‍शा पांइसीशो धोती कुरशा मुल युफ्रेटीस लावो। मिनु सेरथे फुल्‍लु आ आगाम बाक्‍शो जेश्‍शो फुल्‍लुम मेको ख्रुइश्‍शा वोतो” दे माइक्‍ती।

5 मोपतीके गो परमप्रभु यावेम देंशो खोदेंशो पा, मेको युफ्रेटीसम ख्रुइश्‍शा वोइक्‍ता।

6 मिनु शुश नाक्‍त नोले परमप्रभु यावेम आं कली “बोक्‍को, युफ्रेटीस लावो। मिनु मेकेर गो ङोंइती इ कली ख्रुइश्‍शा वोतो देंशो धोती चाक्‍को” दे माइक्‍ती।

7 मिनु गो युफ्रेटीसम लती। मिनु आं ख्रुइश्‍शा वोइक्‍तीक रे मेको धोती दोशा ग्रुंइताक्‍ङ। तन्‍न मेको धोती नेल्‍ल मुक्‍ने थुमा बाक्‍त। मेको थमा पा, शोर गाक्‍शो दुम्‍माक्‍त।

8 मिनु परमप्रभु यावेम आं कली मार देंत देंशा हना,

9 “ओदेंशो पा गो यहूदा आ ठेयब लेत्‍तीक नु यरूसलेम आ थाम्‍पा ठेयब लेत्‍तीक खतम पोक्‍नुङ।

10 मेको मरिम्‍शो पाइब मुरपुकीम आं लोव़ नेंने मबिस्‍सम। मेकोपुकीमी आन खकटा थुंमी आन दला दाक्‍स पतीकेमी अरु देवी देवता आन कली पूजा पचा कली नु मेको आन गेय पचा कली लाम्‍तेक्‍म। मिनु मेकोपुकी एको धोती खोदेंशो दुम्‍नीम। मेको थमा पा शोर गाक्‍शो बाक्‍ब। येरमीया ११:८

11 मारदे हना दोपा मुरुम आ धोती रांम पांइसीशो बाक्‍बा, मोपा गो इस्राएल आ खिं ङा मुर नेल्‍ल नु यहूदा आ खिं ङा मुर नेल्‍ल आन कली आं मुर दुम्‍मल, दे आं नेक्‍था वोइक्‍तामी। आं कली मान पामेक्‍ल, आं कली ठेयब सेल्‍मेक्‍ल, आं दारसम ग्‍योम्‍सीमल, दे पांइसाक्‍यी। तन्‍न मेकोपुकीमी आं देंशो लोव़ आन नोफा मदाइक्‍तेम” दे परमप्रभु यावेम देंत।

12 परमप्रभु यावे, इस्राएली आन परमप्रभुमी “गर नेल्‍ल अङगुर शांबुम ब्रीचा माल्‍नीम देंशो बाक्‍ब” दे माइक्‍मी। मिनु मेकोपुकीम “गर नेल्‍ल अङगुर शांबुम ब्रीचा माल्‍ब, दे गो मतुइक्‍नीकी ङा?” देंतेक्‍म हना,

13 गे मेको आन कली परमप्रभु यावेम इन कली मार देंत देंशा हना “गो एको रागी नेल्‍ल ङा मुर आन कली, दाऊद पिप आ बाक्‍तीकेम बाक्‍ब पिप आन कली, चढ़ेबपुकी, परमप्रभु यावे आ लोव़ पाइबपुकी नु यरूसलेममी बाक्‍ब नेल्‍ल आन कली दुक्‍पाइक्‍नुङमी। येरमीया २५:१५-२८; यसैया ५१:१७

14 गो मुर आन कली जिपाइक्‍नुङमी। गो आम आफ नु आन तमी तौ आन दातेमी जिपाइक्‍नुङमी। गो मेको आन कली दाक्‍शा, शिशी पा साइक्‍तीक रे आं थुं मलेत्‍नुङ, दे परमप्रभु यावेम” देंत।

15 नोफा दाइश्‍शा नेनीन। ठेयब लेश्‍शो मदुमीन। मारदे हना परमप्रभु यावेम लोव़ पाप्‍तु।

16 मिनु “गे परमप्रभु यावे, इन परमप्रभुम छिङछिङ चाक्‍चा क्‍येङा ङोंइती मेको कली ‘ठेयब सेलीन’। नां रिक्‍चा क्‍‍येङा ङोंइती डांडा मेर इन खोइल दाइल पाइक्‍चा क्‍येङा ङोंइती मेको कली ‘परमप्रभु यावे ठेयब बाक्‍ब’ देनीन। गे हाम्‍सो आस पाइनीनी, तन्‍न मेकोमी छिङछिङ सेल्‍शा थम क्‍येर सेल्‍ब।

17 तन्‍न गेपुकीम मेको मनेंतीनी हना, गो इन ठेयब लेश्‍शो आ पतीके, गो आं थुंम सुइ आन मतुइक्‍चा ङा पा ङाक्‍नुङ। परमप्रभु यावे आ हुल ग्‍याइश्‍शा लाइक्‍चा पुंइसीतीके गो हुइ हुइ पा ङाक्‍नुङ। मिनु आं मिक्‍च रे प्रेक्‍कु दोक्‍ब। येरमीया ८:२३; येरमीया १४:१७; लूका १९:४१

18 पिप नु पिप आ ममा आस कली ‘इन नित्‍तीक रे उइ तोंइ‍सीन। मारदे हना इन पिया रे इन ठेयब दुम्‍तीक सिरपेच दोक्‍ब’ माइक्‍सी” देंत। २राजा २४:१-१६; यसैया ६२:३; बिलाप ५:१६

19 नेगेब रागी ङा सहर आन लाप्‍चो चोक्‍सीनीम। मिनु मेको आन कली रोक्‍ब सुइ मबाक्‍नीम। यहूदा ङा मुर नेल्‍ल ग्‍याइश्‍शा लाइक्‍चा पुंइसीशो बाक्‍नीम। मेको आन कली थमा पा ग्‍याइश्‍शा लाइक्‍तेक्‍म।

20 ए यरूसलेम, उत्तर रे जाक्‍ब जोरी सत्रु आन कली कोव़ङो। इ कली गेशो बगाल, इ दारशो भेडा ते बाक्‍नीमी?

21 गेमी आंम मुर सेल्‍चा कली इ लेम्‍शो मुर आन कली परमप्रभु यावेम इ कली हुकुम पाइब सेल्‍ब। मिनु गे मार, देंनेवे? मार, सुत्‍केरी दुम्‍चशो मीश मुर खोदेंशो पा, इ कली श्‍येत मदुम्‍बा ङा?

22 “मिनु गे इ थुंम ‘आं कली मारदे ओदेंशो श्‍येत दुम्‍मे’ देंनेवे। गेमी शुश मरिम्‍शो पतीके इ गुने क्‍युक्‍साक्‍वे। मिनु इ रांमी मरिम्‍शो पाइक्‍चा पुंइसाक्‍वे। यसैया ४७:२-३; इजीकीएल १६:३७

23 मार, एथीयोपीयामी आ कुशुल ङा रङ फाइक्‍ने चाप्‍बा ङा? मार, जोइमी आ चां ङा थोप्‍ला फाइक्‍ने चाप्‍बा ङा? गे मरिम्‍शो पचा बानी दुम्‍तीके रिम्‍शो पने मचाप्‍नेवे।

24 गो इ कली गोरशो रागी रे जाक्‍शो फशेम योल्‍शो भूस खोदेंशो पा फ्राइ‍नन।

25 इ कली वोइश्‍शो आं गेशो भाग मेकोन बाक्‍ब” देंशो बाक्‍ब। परमप्रभु यावेम “गेमी आं कली प्रेंशो बाक्‍नेवे। मिनु जोल आन कली थमा सुइश्‍शो बाक्‍नेवे।

26 गो आंमा इ गुने इ शोव़ सम्‍मन क्‍युक्‍नुङ। मिनु मोपा इ मुने नेल्‍ल तांइसीब।

27 गो पहाडीम नु रू मेर इ पशो ग्रांग्रा दिशो गेय ताता। इ मुरपुकी नु इप्‍शो, इ रेयके पशो नु इ मुने मपथु, तेल्‍लेम दुम्‍शो तशो बाक्‍नुङ। आबी आबी, यरूसलेम गे ग्रांग्रा दिशो दुम्‍नेवे। गेना सम्‍म मोदेंशो बाक्‍नेवे?” देंत।