Jeremiah 12 in Sunwar

1 परमप्रभु यावे, गो इन कली दोस गेता हना, गे ठीक पाइब बाक्‍नीनी। तन्‍न गो आं निसाफ इन ङोंइती वोइक्‍नुङ। दोस ताइबपुकी मारदे सोशा बोशा लाइ‍नीमी? थमा मसुइक्‍ब मुर मारदे रिम्‍शो दुम्‍ना दुम्‍न बाक्‍नीमी? भजन संग्रह ७३:३

2 गे मेको आन कली ख्रुम्तीनी। मिनु मेकोपुकीमी शाक्‍श थोक्‍शा, बारशा, फल गेनीम। मेको आन लोव़म ला इन नेक्‍था बाक्‍नीम। तन्‍न मेको आन थुंमी इन क्‍येङा ङोन बाक्‍नीम।

3 मो हना यो परमप्रभु यावे, गे आं कली तुइक्‍नीनी। गे आं कली कोव़शा, नाक्‍नीनी। आं थुं गे नु बाक्‍ब। मेको आन कली साइक्‍चा कली लाइश्‍शो भेडा खोदेंशो पा, कीशा लतीन। मिनु साइक्‍तीक नाक्‍त कली तिल्‍शा वोतीन। भजन संग्रह १३९:१

4 रागीम गेना सम्‍म रोंका पाइबा? मिनु रू ङा घांस गेना सम्‍म सोल सुल बेक्‍नीमी? मेकेर बाक्‍बपुकीम परमप्रभु यावे आ अरेशो लोव़ मटितीके, मेकेर ङा जन्‍तु नु चिक्‍ब नेल्‍ल बेक्‍तेक्‍म। मोपा मेकोपुकीमी “आंइ कली मार, दुम्‍शो बाक्‍बा, मेकोमी मारेइ मतुइक्‍ब” दें‍नीम। येरमीया ९:९

5 परमप्रभु यावेम “गे दोरब मुरपुकी नु दोरते हना, मेकोपुकीमी इ कली दपाइक्‍तेक्‍मी हना, गे शारा नु दोपा दोरने चाप्‍नेवे? गे मारेइ मदुम्‍तीकेमी गोल्‍ते हना, यर्दन खोला ङा ब्‍वाकीम मार पाइनेवे?

6 इ लोक्‍बपुकी नु इ खिं ङा मुरपुकीमी इ कली मरिम्‍शो पाम्‍तेक्‍म हना, मेकोपुकी इ पर्बम ठेयब सेंदा पा रेयके पा जाक्‍नीम। मेकोपुकीमी गे नु रिम्‍शो लोव़ पाम्‍तेक्‍म हना यो, मेको आन कली थमा मसुइक्‍मी।

7 गो आं खिं प्रोंइता। आं थेरशो रू प्रोंइता। मिनु आं दाक्‍शो कली आ जोरी सत्रु आन गुइमी गेता।

8 आ थेरशो रू ब्‍वाकी ङा गुप्‍स खोदेंशो दुम्‍त। मेको आं कली कोव़शा ग्रीब। मोपतीके गो मेको कली काइ मदाक्‍नुङ।

9 मार, मेको सिवार आं थेरशो रू तशा गेहे पाइबा ङा? आं ङोंइती छिर छिर पाइश्‍शो सिखारी चिक्‍ब खोदेंशो मदुम ङा? मेको कली अर्को सिखारी चिक्‍बपुकीम पुम्‍शा राम्‍शी तोव़मेक्‍ल। लावो, लशा ब्‍वाकी ङा जन्‍तु नेल्‍ल आन कली पुक्‍मी। मिनु मेको कली ब्‍वपाइक्‍चा कली चाक्‍मी। यसैया ५६:९

10 शुश गोठलापुकीम आं अङगुर रू खतम सेल्‍तेक्‍म। मेकोपुकीमी आं भाग दिम्‍शा ताइश्‍शा पाम्‍तेक्‍म। मेकोपुकीमी आं दारशो भाग कली गोरशो रागी खोदेंशो पा मुर मबाक्‍तीक सेल्‍तेक्‍म। येरमीया ६:३

11 मेकोपुकीम रागी गोरशो सेल्‍तेक्‍म। मेको रागी कली आं ङोंइती सोव़शो नु सुइ मबाक्‍तीक सेल्‍तेक्‍म। रागी नेल्‍ल गोरशो सेल्‍तेक्‍म। मिनु सुइ आन थुं मखाइ” देंत।

12 गोरशो रागी ङा डांडा मेर नेल्‍ल श्‍येत्‍थ पोक्‍बपुकी क्राक्‍थ्री चोक्‍थ्री पा जाक्‍शो बाक्‍नीम। मारदे हना परमप्रभु यावे आ तरवारम रागी आ सुर का रे अर्को सुर सम्‍म क्‍योरब। मिनु सुइ मब्रोंइनीम।

13 मेकोपुकीमी चेरब शोक्‍नीम। मिनु चू सिप्‍पाइक्‍नीम। मेकोपुकीमी श्‍येत पा गेय पाइनीम, तन्‍न नेल्‍ल शोर गाक्‍ब। मोपतीके मेको आन ख्रुम्‍शा मुने दोक्‍शो आंमा फाल्‍मेक्‍ल। मारदे हना परमप्रभु यावे आ ठेयब पा गाइश्‍शो इन तार जुक्‍शो बाक्‍ब। होसे ८:७

14 परमप्रभु यावेमी आं कली मरिम्‍शो पाइब आं नेक्‍था ङा मुर आन पर्बम “गो आं मुर इस्राएली आन कली गेशो, मेको आन किकी पिपी आन शोंप रोइश्‍शो बाक्‍नीम। मोपतीके गो मेको आन कली आन रागी रे तुल्‍शा ताइक्‍नुङमी। मिनु गो यहूदा आ खिं ङा आ मुर आन कली मेको आन दाते रे तिल्‍नुङमी।

15 तन्‍न गो मेको आन कली तुलुमी नोले लेंशा शिशी पाइक्‍नुङमी। मिनु मेको नेल्‍ल आन कली आन आन किकी पिपी आन शोंप गेशा, आन रागीम लेंशा चाक्‍नुङमी।

16 मिनु मेकोपुकीमी मोपा बाल आ नेंम कसम जाम्‍तेक्‍म, मोपा आं मुर आन लां थमा पा शेंताक्‍म हना, मेकोपुकीम परमप्रभु यावे ब्रोंइशा बाक्‍शो खोदेंशो पा, आं नेंम कसम जाइनीम। आं मुर आन पतीके रिम्‍शो पा शेंसाक्‍म हना, मेकोपुकी आं मुर आन दातेमी बाक्‍चा ताइनीम। ब्‍यवस्‍था ६:१८; येरमीया ४:२

17 तन्‍न तेकोइ जात ङा मुरुम मेको लोव़ मनेंतेक्‍म हना, गो मेको आन कली तुल्‍शा ताइक्‍नुङमी” दे परमप्रभु यावेम देंशो बाक्‍ब।