James 5 in Sunwar
1 नेनीन, गे क्येट शुश थीब मुरपुकी, ङाक्कीन। रोंका पने। मारदे हना गे नोले श्येत जाइब दुम्नीनी। लूका ६:२४-२५
2 इन बाक्शो शोंप नेल्ल राक्शो दुम्तेक्मे। इन वासी नेल्ल तुम्बुम नेक्तेक्म। मत्ती ६:१९
3 इन सुन चांदी नेल्ल खिया जोशो बाक्ब। मेको खियामी इन कली “मरिम्शो मुर” दे कोंइब। सुन चांदी कली खिया जोशो खोदेंशो पा इन रां कली मीम दाक्ब। गे क्येट शुश हेंताक्नी।
4 इन रूम गेय पाइब आन गाल्च मुल सम्म जोल पा मगेनी। मेको खेत्ला आन कली मगेशो गाल्चम आ मुर नेल्ल आन परमप्रभु यावे नु लोव़ पाप्तु। मिनु मेकोमी मेको खेत्ला आन पुंइशो लोव़ नेंने थुम्तु। ब्यवस्था २४:१४-१५
5 गेपुकी रागीमी दुक्चा, जचा, ब्वचामी शुश शोंप पाइश्शो दुम्शा, ग्येरशा बाक्तीनी। मिनु क्योरची नाक्त कली थुल्शा दोम्पाइश्शो खोदेंशो पा गेपुकी निसाफ पची नाक्ती ठेयब सजाइ ताइब दुम्नीनी। लूका १६:१९-२५
6 गेपुकीमी रिम्शो गेय पाइब मुर आन कली दोस गेशा साइक्तीनी। मेकोपुकीम ब्वालेइ पा, मारेइ लोव़ मलेत्तेम। याकूब २:६
7 मिनु आं दाक्शो लोक्बपुकी, नेनीने, रूमी गेय पाइब मुरुमी मेको आ ख्रुम्शो बाली नाली मीब, दे आ थुं नाइश्शा, हिंउद नु बर्खा रिम्शो खोदेंशो पा प्रभु आ जाक्चा रिम्दीन। लूका २१:१९; हिब्रू १०:३६
8 थुं नाइश्शा बाक्कीन। मारदे हना प्रभु जाक्चा चिक्शो बाक्ब। मोपतीके प्रभु कली टिचा मप्रोंइथु बाक्कीन।
9 आं दाक्शो लोक्बपुकी, गेपुकीमी अरु थमा सुइक्ब आन पर्बम गन गन मपने। मो पाइतीनी हना, निसाफ पचा पुंइसीनी। नेनीन इन निसाफ पाइब जाक्चान चिक्शो बाक्ब।
10 आं दाक्शो लोक्बपुकी, साइ ङा परमप्रभु यावे आ लोव़ पाइबपुकीमी परमप्रभु यावेमी देंशो लोव़ पशा, शुश श्येत जशा यो फाल्शा, परमप्रभु यावे कली मप्रोंइथु बाक्शो बाक्तेक्म। मिनु मेको आन खोदेंशो पा बाक्कीन। मत्ती ५:१२
11 नेनीने, मेको परमप्रभु यावे कली मप्रोंइब आन पर्बम “ग्येरशो मुर दुम्तेक्म” दे लोव़ पाइनीकी। अय्युब माइश्शो मुर का श्येत जशा यो, परमप्रभु यावे कली काइ मप्रोंइथु, बाक्शो बाक्त। गेपुकी मेको आ कथा नेंतीनी। परमप्रभु यावेमी मारदे अय्युब कली मेको शुश श्येत जचा गेवा, तुइक्ताक्नी। परमप्रभु यावेमी गिश लेम्शा शिशी पाइबा, मेको ताइतीनी। इं कली आ लेम्शो नु आ शिशी कोंइताक्व। अय्युब १:२१; अय्युब ४२:१०-१६
12 आं लोक्बपुकी, आं नेल्ल क्येङा ठेयब अरेतीक लोव़ मार बाक्ब देंशा हना, कसम मजने। सरीङ कोव़शा, खप थिशा, चुक्ब थिशा कसम मजने। इन देंशो लोव़ दुम्ब हना “दुम्ब” मदुम्ब हना “मदुम्ब” देनीन। गे जोल पाइतीनी हना, गे निसाफ पचा पुंइसीनी। मत्ती ५:३४-३७
13 इन दातेमी सु सु श्येत जामे, मेकोमी परमप्रभु यावे नु लोव़ पामेक्ल। सु सु ग्येरशो बाक्मा, मेकोपुकीमी “परमप्रभु यावे नेल्ल क्येङा ठेयब बाक्ब” दे कुम्सो पामेक्ल। भजन संग्रह ५०:१५; कलस्सी ३:१६
14 इन दातेमी सु रोइ पाइबा, मेकोमी ग्रुम्तीके ङा शेंब खाल्पा आन कली ब्रेत्चा माल्ब। मेकोपुकीमी रोइ पाइब आन तारी गुइ वोइश्शा, प्रभु आ नेंमी तेल ख्रेक्शा, परमप्रभु यावे कली पुंइचा माल्नीम। मर्कूस ६:१३
15 मोदेंशो थमा सुइश्शा पुंइशोमी मेको रोइ पाइब मुर साब। मेको रोइ पाइबमी पाप पशो बाक्त हना, मेको यो क्याम्सीब। मर्कूस १६:१८
16 मोपतीके रोइ सापाइक्चा कली इन पशो पाप शोव़मुशा, प्रभु नु लोव़ पमुने। ठीक थमा सुइक्ब आन पुंइशो लोव़मी ठेयब गेय पाइब। प्रेरित १२:५
17 एलीया इं खोदेंशो मुर का बाक्माक्त। मेकोमी परमप्रभु यावे कली “रेउ यिचा मगेने” दे शुश पुना बाक्त। मिनु बर्स सां ६ महिना सम्म रागीम काइ रेउ मयिमाक्त। १राजा १७:१; लूका ४:२५
18 नोले मेकोमी “रेउ यिपतीन” दे पुना बाक्त। मिनु नोले रेउ यिशा, बाली नाली वामा बाक्त। १राजा १८:४१-४५
19 आं दाक्शो लोक्बपुकी, इन दाते ङा मुर का थमा लां रे ङोन लत हना, अर्को थमा सुइक्बमी मेको कली आ पशो पाप रुप्पाइश्शा, परमप्रभु यावे आ लां गे लेप्पाइक्तु हना, गलाती ६:१
20 मेको मुरुमी मेको मटीब मुर कली बेक्चा रे प्रोंइब। मिनु मेको के शुश पाप बाक्त हना यो, क्याम्सीब, दे मेकोमी तुइक्चा माल्ब। भजन संग्रह ५१:१५; हितोपदेस १०:१२; १पत्रुस ४:८