Isaiah 63 in Sunwar
1 एदोम रे सु जाक्ना जाक्न बाक्बा? लल जिशो वा फेक्शा, बोज्रा रे जाक्ब सु बाक्मे? मेको दारशो वा फेक्शा, ठेयब सक्तिमी गाक्ब सु बाक्म। “गो ठीक पतीके लोव़ पाइनुङ। गो पाप रे प्रोंइतीक सक्ति पाइश्शो नङ” देंत। यसैया ३४:६
2 मिनु गो “इन फेक्शो वा मारदे लल जिशो बाक्मे? मारदे इन वा अङगुर ख्राक्ब आन के खोदेंशो दुम्मे?” देंती। प्रकाश १९:१३
3 मिनु मेकोमी “गो आं कान अङगुर ख्राक्ता। गो नु जात जात ङा मुर सुइ मबाक्म। मिनु गो गाइश्शा, मेको आन कली ख्राक्ता। चुरशा मेको आन कली दिम्ताक्ङमी। मेको आन रस आं वाम ब्रुंइसाक्व। मिनु आं वा नेल्ल लल दुम्त। योएल ४:१३; प्रकाश १४:२०
4 मारदे हना आं थुंम क्येक्क लेत्तीक नाक्त बाक्त। मिनु आं मुर आन कली प्रोंइतीके बर्स जाक्शो बाक्ब। यसैया १३:९; यसैया ३४:८; यसैया ६१:२
5 मिनु एर ओंथ कोव़ङुनु, वारच पाइब सुइ मबाक्म। मिनु गो नु गेय पाइब सुइ मबाक्म। मोपतीके गो आं सक्तिमी ग्राती। आं गाइक्तीकेमी आं कली वारच पाइक्ती।
6 मिनु गो गाइश्शा जात जात ङा मुर आन कली दिम्ताक्ङमी। गो चुरशा मेको आन कली खतम सेल्तामी। गो मेको आन हुश खपीम जारताक्ङ” देंत। यसैया ५१:१७
7 गो परमप्रभु यावे आ मुर आन कली शिशी पतीक गेय मिम्नुङ। मारदे हना मेको आ पर्बम परमप्रभु यावे कली ठेयब सेल्चा माल्नीकी। मिनु आंइ कली मार मार पशो आ पर्बम, इस्राएल आ खिं ङा मुर आन कली शुश दाक्ताक्व। मिनु मेको आन कली शिशी कोंइशा, गेना हना यो दाक्शो बाक्त। मोपतीके मेको कली ठेयब सेल्चा माल्नीकी।
8 मेकोमी “मेकोपुकी थमा पा आं मुर बाक्नीम जोल मपाइब आल बाक्नीम” देंत। मोपतीके परमप्रभु यावे मेको आन कली श्येत रे प्रोंइब दुम्त। ब्यवस्था ३२:५,२०
9 मेको आन श्येत तशा, आं सोइश्शो मुर ममाइ, परमप्रभु यावे आ स्वर्ग ङा गेय पाइब यो ममाइ, परमप्रभुमी मेको आन कली प्रोंइतु। आ दाक्तीके नु शिशी पतीकेमी मेको आन कली साइ ङोंइती रे पाप रे प्रोंइशा, मेको आन कली मुप्शा, कुरशो बाक्त। प्रस्थान ३३:१४-१५
10 तन्न मेकोपुकीमी काइ मटिथु, आ सोक्त कली थुं खाइक्पाइक्तेक्म। मोपतीके परमप्रभु यावे मेको आन जोरी सत्रु दुम्शा, आंमा मेकोपुकी नु लडाइ पाप्तु।
11 मिनु नोले मेकोपुकीमी साइ ङोंइती ङा नाक्ती मिम्ताक्म। मेको आ गेय पाइब मोसा आ पाला ना ङा नाक्ती मिम्ताक्म। मिनु मेकोपुकीमी “समुन्द्र रे पा गोठला नु आ बगाल ग्रुंइब ते बाक्म? मेको आन कली परमप्रभु यावे आ सोक्त वोइक्ब, ते बाक्मे? प्रस्थान २:५; गन्ती ११:१७
12 सुमी आ सक्ति पाइश्शो गुइ मोसा आ ग्युरा गे गाक्चा कली वोदा? सुमी आंम कली गेना हना यो आ नें लीपाइक्चा कली समुन्द्रम लां सेला? प्रस्थान १४:२९
13 सुम मेको आन कली समुन्द्र आगा ङा लां रे पा खुला? मेकोमी गोरशो रागीम शारा आन कली गाक्पाइश्शो खोदेंशो पा दाइल मपपाइक्थु, गाक्पाइक्तु।
14 बी ब्यफ बेंसी ब्रुप्शो खोदेंशो पा परमप्रभु यावे आ सोक्तीम मेको आन कली नाइक्पाइक्तु। इन नें ठेयब सेल्चा कली इन मुर आन कली मोदेंशो पा खुल्तीनी।
15 सरीङ ङा इन छेङछेङ ङा बाक्तीके रे उइ कोव़ङीन। इन वारच पचा दाक्तीके नु इन सक्ति ते बाक्मे? इन थुं ङा आंइ कली दाक्तीके नु इन शिशी पतीके ते बाक्म? गो मेको मतक। ब्यवस्था २६:१५
16 गे आंइ आफ बाक्नीनी। मिनु अब्राहाममी आंइ कली मतुइश्शो बाक्त। इस्राएलम आंइ कली मतव। गे, परमप्रभु यावे, आंइ आफ, आंइ श्येत रे प्रोंइब बाक्नीनी। मेको साइ रे इन नें बाक्ब। ब्यवस्था ३२:६
17 परमप्रभु यावे, गे मारदे आंइ कली इन लां रे हेंथे गाक्चा गेकी। गे मारदे आंइ कली इन कली मान पा महिंब दुम्चा कली आंइ थुं खकटा सेल्नी? गे इन गेय पाइब आन पर्बम नु इन जात ङा मुर आन पर्बम लेतीन। यसैया ५७:१७
18 इन योव़शो मुरपुकी इच्का नाक्त सम्म ला एको रागीम बाक्चा ताम्तेक्म। तन्न मुल आंइ जोरी सत्रुमी इन योव़शो बाक्तीके खतम सेल्तेक्म। बजन संग्रह ७९:१
19 गोपुकी ङोंइती रे इन सासन पशो मुर खोदेंशो मदुम्क। इन नेंमी ब्रेत्चा पुंइसीशो मुर खोदेंशो मदुम्क” देंतेक्म।