Isaiah 46 in Sunwar

1 बेल गुर ब्‍वेत। नेबो दिङ गोल्‍त। मेको आन मूर्तिपुकी बी ब्‍यफ आन कली कुरपाइक्‍नीम। इन कुरशो थोव़क गे दशो बी ब्‍यफ आन कली कुरपाइक्‍नीनी। येरमीया ५०:२

2 मिनु मेकोपुकी कालेम दिङ गोल्‍शा, गुर ब्‍वेनीम। आन भारी प्रोंइने मचाप्‍‍नीम। मिनु आंमा ग्‍याइश्‍शा लाइक्‍चा पुंइसीनीम।

3 “याकूब आ खिं ङा मुर, आं लोव़ नेनीन। इस्राएल आ खिं ङा लीशो मुरपुकी आं लोव़ नेनीन। गे जरमेसीनी रे इन कली कुरता। गे कोव़जीम बाक्‍नी रेन इन कली कुरता।

4 गेपुकी खूशो दुम्‍नी सम्‍म गो खाल का ङा बाक्‍नुङ। इन चां बोइक्‍म सम्‍म यो इन कली कुरनन्‍नी। गो इन कली सेल्‍शा, कुरनुङ। इन कली कुरशा, पाप रे प्रोंइनन्‍नी। भजन संग्रह ७१:१८

5 गेपुकी आं कली सु नु थाप्‍नीनी, सु नु उइक्‍थ बाक्‍त देंनीनी। आं कली सु खोदेंशो बाक्‍त देंनीनी? यसैया ४४:९-२०

6 मिनु शुश सुन थीब नु चांदी नाक्‍बपुकीमी चेम्‍ब कली ब्रेत्‍नीम। मिनु मेको रे मूर्ति सेल्‍पाइक्‍नीम। मेको आ ङोंइती बाप्‍शा पूजा पाइनीम।

7 मिनु मेको कली गुप्‍शा, बलाम कुरशा, लाइश्‍शा, आ बाक्‍तीकेम वोदमेनु, मेकेर मदुक्‍थु, मगाक्‍थु बाक्‍ब। सुइमी मेको आ ङोंइती जाक्‍शा ‘प्रोंइ‍यीनी’ देंत हना, मेकोमी लोव़ मलेप्‍ब। सुइ आन कली श्‍येत रे प्रोंइने मचाप्‍ब” देंत। १राजा १८:२६

8 मिनु “गे हेंथे गाक्‍बपुकी, आं देंशो मिम्‍तीन। साइ ङा लोव़ इन थुंम वोतीन।

9 साइ ङोंइती ङा माइत लोव़ मिम्‍तीन। मारदे हना गो परमप्रभु नङ, आं ङा लाक्‍शा, अरु सुइ परमप्रभु मबाक्‍नीम। गो परमप्रभु नङ, आं खोदेंशो सुइ मबाक्‍नीम। यसैया ४४:६

10 गो साइ ङोंइती रे नोले सम्‍म मार दुम्‍मे, नेल्‍ल शेंनुङ। ङोंइती रे मुल सम्‍म मदुम्‍शो यो देंनुङ। मिनु गो आं मिम्‍शो मफाइक्‍थु, नेल्‍ल पाइनुङ। आ मिम्‍शो नेल्‍ल खाप्‍नुङ।

11 गो पूर्ब रे सिखार ग्‍यारब चिक्‍ब का ब्रेत्‍नुङ। मिनु ङोन रागी रे आं मिम्‍शो नेल्‍ल पाइब मुर का कली ब्रेत्‍नुङ। गो आं देंशो लोव़ खाप्‍नुङ। आं मिम्‍शो पाइनुङ। यसैया ४१:२

12 गे खकटा थुं पाइश्‍शोपुकी नेनीन। गे पाप रे प्रोंइतीके रे शुश ङोन बाक्‍नीनी।

13 आं पाप रे प्रोंइतीक चाक्‍नुङ, मेको ङोन मबाक्‍ब। गो इन कली रीब पा पाप रे प्रोंइनुङ। गो आं पाप रे प्रोंइतीक सियोनम वोइक्‍नुङ। इस्राएल कली आं छेङछेङ गेनुङ” देंत।