Isaiah 41 in Sunwar
1 परमप्रभु यावेमी “समुन्द्र आ नेक्था बाक्ब मुरपुकी सिक्सी पा आं लोव़ नेनीन। जात जात ङा मुरपुकीम आन सक्ति लेंशा तामेक्ल। मिनु मेकोपुकी आं नेक्था जाक्शा, लोव़ पामेक्ल। गो काथा निसाफ पतीकेम बुक्य।
2 सुमी पूर्ब रे आ गेय पचा कली ग्राब का कली पोक्गा? मेकोमी रागी रागी ङा मुर आन कली आ गुइम गेब। मेकोमी पिप आन कली दिम्शा, आ तरवारम मेको आन कली फुरक खोदेंशो सेल्ब। आ लिब्रामी फशेम बेरशो भूस खोदेंशो सेल्ब। यसैया ४४:२८; यसैया ४५:१,१३; यसैया ४८:१४-१५
3 मेकोमी मेको आन कली खेदा पवानु, मारेइ मदुम्थु आ खोइलीम लां कली हेरा मथीनीम।
4 मेको सुमी पपाइश्शा पवा? सुम साइ ङोंइती रे पाला पाला ङा मुर आन कली ब्रेत्ता? गो परमप्रभु यावे, नेल्ल क्येङा ङोंइती ङा नु नेल्ल क्येङा नोले ङा नङ। यसैया ४४:६; यसैया ४८:१२; प्रकाश १८:१७
5 समुन्द्र आ नेक्था बाक्ब मुरपुकी मेको तशा, हिंनीम। रागी आ सुर सम्म हिम्सीब। मिनु मेकोपुकी जाक्शा, आं नेक्था पिम्तेक्म।
6 वारच पमुशा, आन थुं बारपाइक्मुशा ‘ठेयब थुं पावो’ देंमुइनीम।
7 मिनु दारशो थोव़क सेल्स जोक्बमी चेम्ब आ थुं बारपाइक्ब। घन तुप्बमी चेम्ब आ थुं बारपाइश्शा ‘एको रिम्शो दुम्त’ देंशा, महिम्सेक्ल, दे कांटी थोक्ब” देंत।
8 मिनु परमप्रभु यावेमी “आं गेय पाइब इस्राएल, आं योव़शो याकूब, आं वारच अब्राहाम आ चच युइ बाक्ब। यसैया ४२:१९; यसैया ४३:१०; यसैया ४४:१,२१; यसैया ४५:४; भजन संग्रह १३५:४; याकूब २:२३
9 इ कली रागी आ सुर रे ब्रेत्ताक्न। नेल्ल क्येङा ङोन रे चाक्शा, गो इ कली ‘गे आं गेय पाइब बाक्नेवे’ देंती। गो इ कली योव़ता। मिनु गो गे नु बाक्नुङ।
10 महिनो, मारदे हना गो गे नु बाक्नुङ। आइक्च थुं मपावो। मारदे हना गो इ परमप्रभु नङ। गो इ कली बोल्यो सेल्शा, वारच पाइनुङ। गो इ कली आं ग्राब ग्युरा गुइमी वारच पाइनुङ। यसैया ४३:१
11 गे नु गाइक्ब नेल्ल मुने दोक्शा, शिशी मताइनीम। इ जोरी सत्रु नेल्ल फश खोदेंशो दुम्शा, जाम्शा लाइनीम।
12 गे मेको आन कली माल्तीवी हना यो, मथित्नेवे। इ कली लडाइ तोइबपुकी फश खोदेंशो दुम्शा, जाम्शा लाइनीम।
13 मिनु गो परमप्रभु यावे, इ परमप्रभुमी इ ग्युरा गुइ ग्याइक्नुङ। मिनु गो इ कली ‘महिनो’ देंशा, वारच पाइनुङ।
14 गे महिक्सीशो याकूब महिनो। इच्कका ला लीशो इस्राएलीपुकी महिनीन। गो इ कली वारच पाइनुङ, दे परमप्रभु यावेमी देंत। इ कली पाप रे प्रोंइब इस्राएली आन का ला बाक्शो परमप्रभु, गो नङ। यसैया ४३:३
15 मुल गो इ कली हेल्शो अन्न तुप्तीके सेल्नुङ। मेको हेश्शो, नक नु ख्रुइ पाइश्शो बाक्ब। गे डांडा आन कली तुप्शा, फस सेल्नेवे। पहाड आन कली भूस खोदेंशो सेल्नेवे।
16 गे मेको आन कली हारशा, फशेम योल्पाइक्नेवे। मिनु फश गिवारम मेको आन कली एर ओंथ फ्रशा योल्ब। मेना गे परमप्रभु यावे कली तुइश्शा, ग्येरनेवे। इस्राएली आन का ला बाक्शो परमप्रभु आ मुर दुम्शा, ग्येरसीनेवे” देंत।
17 मेकोमी लेंशा “प्रुङग नु क्येट मथीबम ब्वाक्कु माल्नीम। तन्न मथित्नीम। मेकोपुकी तूतू दाक्शा, आन लाकचा सोव़ब। गो, परमप्रभु यावेमी, मेको आन लोव़ नेंनुङ। मिनु गो, इस्राएली आन परमप्रभुमी मेको आन कली मप्रोंइथु, मेको नु बाक्नुङ।
18 गो गोरशो डांडामी ब्वाक्कु ग्रूपाइक्नुङ। बेंसीमी ब्वाक्कु बुक्पाइक्नुङ। गो मुर मबाक्तीकेम ब्वाक्कु देम्शो नु सोव़शो रागीम ब्वाक्कु बुक्पा ग्रूपाइक्नुङ। यसैया ३५:१,७; यसैया ४३:१९; प्रस्थान १७:६; भजन संग्रह १०७:३५
19 मुर मबाक्तीकेमी लेबानोन ङा लाइश्शो रवा वापाइक्नुङ। बोल्यो रवा, तेल रवा नु शुश अरु रवा ख्रुम्नुङ। गोरशो रागीमी तोव़शी नु अरु रवा यो ख्रुम्नुङ।
20 मुर नेल्लेमी परमप्रभु यावे आ पशो बाक्ब, दे तशा, तुइश्शा, मिम्शा रुप्चा माल्नीम। इस्राएली आन का ला बाक्शो परमप्रभुमी मोदेंशो सेल्तु” देंत।
21 परमप्रभु यावेमी “इन लोव़ मार बाक्बा, देनीन। थमा बाक्ब, दे कोंइदीन, दे गो, याकूब आ पिपमी देंनुङ।
22 मेको आन कली चाक्गमेक्ल। मिनु मार मार दुम्मे, मेको देनीन। ङोंइती मार दुम्मे, मेको लोव़ पने। गे मेको आन कली मिम्शा, नोले मार दुम्बा, तुइक्चा कली शेंदीन। यसैया ४३:८,९; यसैया ४४:७
23 नोले मार दुम्बा आंइ कली तुइक्पतीन। मोपा ला गे गेय पने चाप्ब बाक्नीनी, दे तुइक्नीकी। गे रिम्शो पने कि मरिम्शो पने। मोपा गो इन कली तशा तुइश्शा शुश हिंनीकी।
24 गे मारेइ मननी। इन पशो नेल्ल फश बाक्ब। सु सुमी इन कली योव़नीमी मेकोपुकी ग्रांग्रा दिशो बाक्नीम।
25 गो उत्तर रे का कली ब्रेत्ताक्ङ। मिनु मेको जाक्त। नां दाप्तीके रे आं नेंमी लोव़ पाइब ब्रेत्ताक्ङ। मेकोम ठेयब मुर आन तारी खप दिम्शो खोदेंशो पा दिम्ब। खप के ग्योंब सेल्बम दोदेंशो पा खप नीबा, मोदेंशो पा मेको आन कली नीब।
26 सुमी ङोंइती रे आंइ कली तुइक्पदा? मेको गो तुइक्चा माल्नीकी। मिनु सुमी ङोंइती शेंदा? ‘मेको ठीक बाक्ब’ देंने चाप्नीकी। सुइमी मशेंदेम, सुइमी लोव़ मपामे। मिनु सुइमी इन पशो लोव़ मनेनेम।
27 मिनु गो ङोंइती सियोन कली शेंताक्ङ। गो यरूसलेम कली ग्येरपाइक्ब लोव़ पाइब का सोइक्ताक्ङ। यसैया ५२:७
28 तन्न गो कोव़ङुनु, सुइ मथिदु। अर्ती गेब सुइ मबाक्म। गो हिल्लो पाता, सुइम लोव़ मलेत्तीनी।
29 मेको नेल्ल फश बाक्नीम। आन गेय नेल्ल फश बाक्ब। मिनु देवी देवता आन मूर्ति फश बाक्नीम” देंत।