Isaiah 38 in Sunwar

1 मेना हिज्‍कीयाह रोइ पा बेक्‍चा चिक्‍ता बाक्‍त। मिनु परमप्रभु यावे आ लोव़ पाइब आमोज आ तौ, यसैया जाक्‍शा, पिप कली “परमप्रभु यावेमी इन कली ‘गे बेक्‍नेवे, मब्रोंइनेवे। इ खिं नेल्‍ल ठीक सेलो’ देंत” दे माइक्‍तु।

2 मिनु हिज्‍कीयाहमी, आ कुल गारो गे हिरशा, परमप्रभु यावे कली

3 “परमप्रभु यावे, गो इन ङोंइती थमा पा थुं निक्‍शी मपथु, बाक्‍ती। मेको मिम्‍तीने। गो इन ङोंइती नेल्‍ल रिम्‍शो पाता” देंत। मिनु हिज्‍कीयाह शुश ङाक्‍त। २राजा १८:२-६

4 मिनु परमप्रभु यावेमी यसैया कली

5 “हिज्‍कीयाह आ बाक्‍तीक लावो। मेको कली परमप्रभु यावे, इ किकी दाऊद आ परमप्रभुमी इ कली ‘गो इ पुंइशो लोव़ नेंता। इ प्रेक्‍कु ताता। नेनो, गो इ ब्रोंइतीक नाक्‍ती १५ बर्स तेम्‍नुङ।

6 मिनु गो इ कली नु एको सहर कली अस्‍सुर ङा पिप आ गुइ रे प्रोंइनुङ। एको सहर कली वारच पाइनुङ।

7 परमप्रभु यावेमी आ देंशो पाइब दे इ कली आ गेशो चिन्‍ड मार बाक्‍ब देंशा हना,

8 आहाज आ घरी आ वांकु उइ लने थुम्‍शो बाक्‍ब। मेको कली परमप्रभु यावेमी १० खेयप नोले लेप्‍पाइक्‍ब’ दे मतो” देंत। मिनु नां आ वांकु लाक्‍ने थुम्‍शा यो, १० खेयप नोले लेत्‍त।

9 यहूदा ङा पिप हिज्‍कीयाह रोइ पा साम नोले आ ब्रेक्‍शो लोव़ मार बाक्‍त देंशा हना,

10 गो थम रिम्‍शो पा बाक्‍ना बाक्‍न, बेक्‍शो मुर आन बाक्‍तीके लचा माल्‍नुङ।

11 मिनु गो परमप्रभु यावे कली “गो परमप्रभु यावे, इन कली ब्रोंइशो मुर आन रागी मताइनुङ। गो मुल मुर आन कली मताइनुङ। रागीम बाक्‍ब आन कली मताइनुङमी। भजन संग्रह २७:१३

12 आं बाक्‍तीक खिं, गोठ खोदेंशो पा, प्रेश्‍शा आं रे ङोन याक्‍ताक्‍म। तोव़ प्रोव़बमी वा तोल्‍शो खोदेंशो पा, गो आं ब्रोंइतीक नाक्‍त तोल्‍शो बाक्‍नुङ। गो तोव़ रे ख्रोइक्‍चा पुंइसाक्‍ङ। नाक्‍दो नाक्‍ती आं कली बेक्‍पाइक्‍नीनी” दे परमप्रभु कली लोव़ पाता।

13 सुनी सम्‍म आं थुं कली रिम्‍पाइक्‍ना पाइक्‍न बाक्‍ती। गुप्‍सम खोदेंशो पा आं खोइल जिक्‍ताक्‍यीनी। काबु नाक्‍दो नाक्‍तीमी गे आं कली खतम पोक्‍तीनी।

14 गो बेल्‍लुम नु बोकुला खोदेंशो पा ग्रीती। ढुकुर खोदेंशो पा रोंका पाता। गो शुश ग्‍येत्‍थ कोव़तीके आ मिक्‍च पारताक्‍यी। आं थुं लुक्‍च लत। गो “परमप्रभु, गो श्‍येत जाइनुङ। आं कली वारच पाइय्‍यीनी।

15 तन्‍न गो मार देंनुङा ङा? मारदे हना गे आं कली लोव़ पाइतीनी। मोदेंशो आंमा पाइतीनी। आं निन्‍द्रा नेल्‍ल प्रोक्‍त। आं थुं लुक्‍च लत हना यो गो इन कली ठेयब सेल्‍नुङ।

16 परमप्रभु, मोदेंशो श्‍येत रे मुर ब्रोंइनीम। आं थुं यो मेको रे ब्रोंइब। गे आं कली सापाइश्‍शा, ब्रोंइचा गेतीनी।

17 एको श्‍येत थमा पा आं कली ब्रोंइचा कली बाक्‍त। गे आं कली दाक्‍शा, श्‍येत रे ग्रुंइताक्‍यीनी। मारदे हना गे आं पाप नेल्‍ल क्‍याम्‍ताक्‍नी। भजन संग्रह ३२:५; मीका ७:१८-१९

18 बेक्‍शो मुर आन बाक्‍तीकेमी इन कली ठेयब मसेल्‍ब। बेक्‍पाइक्‍बम इन कली ठेयब सेल्‍ने मचाप्‍ब। बेक्‍शो मुरुम इन वारच पाइक्‍तीक आस मपाइनीम। भजन संग्रह ६:६; भजन संग्रह ११५:१७

19 ब्रोंइशोपुकीम ला इन कली ‘गे रिम्‍शो पाइब बाक्‍नीनी’ देंनीमी। मिनु गो मुलाक्‍ती मोदेंशो पाइनुङ। आफपुकीमी गे थमा सुइक्‍चा माल्‍शो बाक्‍नीनी, दे आन आल आन कली शेंनीम” दे हिज्‍कीयाहमी देंत।

20 परमप्रभु यावेमी आं कली श्‍येत रे प्रोंइब। मोपतीके गोपुकीमी तार पाइश्‍शो ताप्‍तीके ताप्‍शा कुम्‍सो पाइनीकी। गो ब्रोंइका सम्‍म मोदेंशो पाइनीकी। परमप्रभु यावे आ खिंमी कुम्‍सो पा ताप्‍शा बाक्‍नीकी, दे हिज्‍कीयाहमी ब्रेक्‍शो बाक्‍त।

21 मिनु यसैयामी “सापाइक्‍चा कली फोव़शी रवा आ फल रे सेल्‍शो ओख्‍ती चाक्‍शा, एको गार तार ख्रेक्‍चा माल्‍नीनी” देंत। यसैया ३८:२१-२२, यसैया ३८:६ नु ७ आन दातेमी वोइक्‍चा माल्‍ब। २राजा २०:७-८ मोदेंशो बाक्‍ब।

22 ङोंइती हिज्‍कीयाहमी “गो परमप्रभु यावे आ खिं लचा ताइनुङ, देंशो चिन्‍ड, मार दुम्‍बा ङा?” दे हिल्‍लो पशो बाक्‍‍त।