Isaiah 36 in Sunwar

1 पिप हिज्‍कीयाहम सासनम पवा आ १४ बर्सम, अस्‍सुर ङा पिप सन्‍हेरीबम यहूदा ङा गारो हिरशो सहर आन कली लडाइ पा ग्रा‍त।

2 मिनु अस्‍सुर ङा पिपम लाकीश ङा राब्‍शाके माइश्‍शो, आ कप्‍तान नु लडाइ पाइब शुश पिप हिज्‍कीयाह आ बाक्‍तीके यरूसलेममी सोइक्‍ताक्‍व। मिनु मेको आइक्‍था दोम्‍ली ङा ब्‍वाक्‍कु यितीके वा मुरब आन रू ङा लांमी राप्‍तेक्‍म। यसैया ७:३

3 मिनु दरवार कोव़ब, हिल्‍कीयाह आ तौ एल्‍याकीम, पिप आ ब्रेक्‍ब शेब्‍ना नु आसाफ आ तौ योआह लाङगा ग्रूशा मेको आन बाक्‍तीक लाम्‍तेक्‍म। यसैया २२:२०

4 मिनु राब्‍शाकेमी मेको आन कली “गे हिज्‍कीयाह कली अस्‍सुर ङा ठेयब पिपमी इन कली मार देंत देंशा हना, ‘गे मार कली आस पा थमा सुइक्‍नीनी?

5 गे इन फश लोव़म लडाइ दोपा पचा तुइक्‍तीक नु लडाइ पतीक सक्ति बाक्‍बा? गे आं कली मटिथु, सु कली आस पा थमा सुइक्‍नेवे?

6 गे जिक्‍शो कोक्‍के खोदेंशो इजीप्‍त कली थमा सुइक्‍नेवे? सु सु मेको कोक्‍के तिक्‍शा गाक्‍नीमी, मेको आन गुइ थोक्‍ब। सु सुमी इजीप्‍त ङा पिप फाराओ कली थमा सुइक्‍नीमी, मेको कोक्‍केम थोक्‍शो खोदेंशो दुम्‍नीम। इजीप्‍त ङा फाराओ मोदेंशो बाक्‍ब’ दे मतीन। इजीकीएल २९:६-७

7 तन्‍न गे, आं कली ‘गोपुकी परमप्रभु यावे, आंइ परमप्रभु कली थमा सुइक्‍नीकी’ देंतीनी हना, हिज्‍कीयाहमी मेको आ थान नु आ चढ़ेतीकेपुकी मप्रेंदा ङा? मिनु यहूदा नु यरूसलेमम बाक्‍ब आन कली ‘गे एको चढ़ेतीके आ ङोंइती चढ़ेचा माल्‍नीनी’ मदेंमे? २राजा १८:४

8 गे आं होव़प, अस्‍सुर ङा पिप नु बाजी पावो। मिनु इ के शारा ङोइक्‍ब मुर बाक्‍तेक्‍म हना, गो इ कली हजार निक्‍शी शारा गेनन।

9 गे बग्‍गी नु शारा ङोइक्‍ब आन पर्बम इजीप्‍त कली थमा सुइक्‍नेवे। गे आं होव़प आ नेल्‍ल क्‍येङा आइक्‍च कप्‍तान का कली यो खेरने मचाप्‍नेवे।

10 मार, गो एको रागी खतम सेल्‍चा कली परमप्रभु यावे कली हिल्‍लो मपथु, जाक्‍ङा ङा? परमप्रभु यावेम आं कली ‘लावो, मेको रागी कली खतम सेलो’ दे माइक्‍ती” देंत।

11 मिनु एल्‍याकीम, शेब्‍ना नु योआहमी मेको राब्‍शाके कली “इन गेय पाइबपुकी नु अरामी लोव़ ब्‍वाक्‍कीन। गो मेको लोव़ रुप्‍नीकी। गारोम बाक्‍ब मुर नेल्‍ल आन नेंचा ङा पा यहूदी लोव़ पा मब्‍वाक्‍कीन” देंतेक्‍म।

12 तन्‍न राब्‍शाकेमी “मार, आं होव़पमी इन होव़प नु इन कली ला लोव़ पथ सोइक्‍ती ङा? गारोम बाक्‍ब मुरपुकीम यो रुप्‍चा माल्‍नीमी। मारदे हना मेकोपुकीम यो इन खोदेंशो पा आन ख्री जचा नु आन चारना‍क तूचा माल्‍नीम” देंत।

13 नोले मेको राब्‍शाकेमी मुर आन नेक्‍था राप्‍शा यहूदी आन लोव़मी ठेयब सेंदा पा “अस्‍सुर ङा ठेयब पिप आ लोव़ नेनीन।

14 मेकोमी मार देंत हना ‘हिज्‍कीयाह आ जोल लोव़ थमा मसुतीन। मेकोम इन कली प्रोंइने मचाप्‍ब।

15 हिज्‍कीयाहमी इन कली “परमप्रभु यावेम इन कली रिम्‍शो पाइब। परमप्रभु यावेमी इन कली थमा पा श्‍येत रे प्रोंइब। एको सहर अस्‍सुर ङा पिप आ गुइमी मदुम्‍ब” देंशो लोव़ थमा मसुतीन।

16 हिज्‍कीयाह आ लोव़ मनेनीन, मारदे हना अस्‍सुर ङा पिपमी इन कली “गो नु गारीन। मेकेर रे ग्रूशा आं बाक्‍तीके जाक्‍कीन। मो पाइतीनी हना, गे नेल्‍ल इन रू ङा अङगुर बोट नु इन फोव़शी रवा ताइनीनी। मिनु इन आंम कुवा ङा ब्‍वाक्‍कु तूचा ताइनीनी। १राजा ५:५; मीका ४:४

17 मिनु नोले गो इन कली आंम रागी खोदेंशो अर्को रागी काम लाइक्‍नन्‍नी। मेको रागीम शुश अन्‍न नु अङगुर शांबु बाक्‍ब। मेको शोब्‍ले नु अङगुर रूम ब्रीशो रागी बाक्‍ब” देंत।

18 हिज्‍कीयाहमी इन कली “परमप्रभु यावेमी इं कली श्‍येत रे प्रोंइब” देंशा, हेंथे लां कोंइ‍चा मगेने। मार, रागी रागी ङा देवी देवता काम यो आन रागी अस्‍सुर ङा पिप आ गुइ प्रोंइने चाप्‍मे ङा? यसैया ३७:१२

19 हमाथ नु अरपाद ङा देवी देवता ते लाक्‍गमे? सेफारवाइम ङा देवी देवता ते लाक्‍गमे? मेकोपुकीमी सामरीया कली अस्‍सुर आ पिप गुइ रे प्रोंइने चाप्‍मे ङा?

20 एको रागी नेल्‍ले ङा तेको देवी देवताम आ रागी आं गुइ रे प्रोंइने चाप्‍बा ङा? मार, परमप्रभु यावेमी यरूसलेम कली आं गुइ रे प्रोंइने चाप्‍बा ङा?’ ” देंत।

21 तन्‍न मेकोपुकी सिक्‍सी पा बाक्‍शा, राब्‍शाके कली काइ लोव़ मलेत्‍तेम। मारदे हना पिपमी मेको आन कली “लोव़ मलेत्‍तीन” दे माइश्‍शो बाक्‍‍त।

22 मिनु दरवार कोव़ब, हिल्‍कीयाह आ तौ, एल्‍याकीम, ब्रेक्‍ब शेब्‍ना नु इतिहास ब्रेक्‍ब आसाफ आ तौ, योआहम आन वा खाक्‍शा हिज्‍कीयाह आ ङोंइती जाक्‍शा, मेको राब्‍शाके आ लोव़ नेल्‍ल शोव़तेक्‍म।