Isaiah 30 in Sunwar

1 मिनु परमप्रभु यावेमी “आबी, गे काइ मटीब आलपुकी, गे आंम इन मिम्‍शो पाइनीनी। तन्‍न आं देंशो मटीनीनी। गे कबल का पाइनीनी। तन्‍न आं दाक्‍शो मिम्‍शो कबल ममाइ। पाप तारी पाप तेम्‍नीनी। यसैया १:२

2 मेकोपुकीमी आं अर्ती आ पर्बम हिल्‍लो मपथु, इजीप्‍त रागी लाइनीम। मिनु मेकेर ङा पिप फाराओम वारच पपांइसीनीम। मेकोपुकीमी इजीप्‍त रागीम फाम्‍सीचा माल्‍नीम। २राजा १८:२१

3 मिनु फाराओ आ वारच पतीकेम इन कली मुने तोक्‍‍ब। मिनु इजीप्‍त रागीम फाम्‍सीचा माल्‍तीके इन कली थम आइक्‍च सेल्‍ब।

4 मिनु इजीप्‍त ङा ठेयब मुरपुकी सोआन नु मेको आन सोइश्‍शोपुकी हानेस जाक्‍दीश्‍शो बाक्‍नीम।

5 मेको नेल्‍ल मुने दोक्‍नीम। मारदे हना इन कली वारच पने मचाप्‍थु, शोर गाक्‍शो दुम्‍‍नीम। तन्‍न इन कली मुने दोक्‍ब नु शिशी मताइब सेल्‍‍नीम।

6 मिनु परमप्रभु यावेमी दक्‍खिन ङा नेगेब ङा जन्‍तु आन पर्बम यसैया कली मेको रागी हिंचा ङा नु श्‍येत ङा रागी बाक्‍ब। मेकेर गुप्‍सनी नु ग्रीब गुप्‍स, बुस्‍स नु बीस पाइश्‍शो बेरब बुस्‍स बाक्‍नीम। मिनु मुरपुकीमी आन शोंप गधा आन तारी नु शुश क्‍येट लाइब थोव़क दलओंठ आन तारी कुरपाइश्‍शा गाक्‍नीम। मेको शोर गाक्‍शो नु वारच मपाइब आन कली गेचा कली कुरपाइक्‍नीम। ब्‍यवस्‍था ८:१५

7 मारदे हना इजीप्‍त ङा मुर आन वारच पतीके शोर गाक्‍शो नु थमा पा वारच मपतीके बाक्‍ब। मोपतीके गो मेको कली लोव़ मपाइब, राहाब, दे नें वोइक्‍ता” देंत। भजन संग्रह ८९:११

8 मिनु परमप्रभु यावेमी यसैया कली “मुल गे लावो, मेको मुर आन ङोंइती आं लोव़ फुल्‍लु तार ब्रेक्‍तो। मिनु किताबम ब्रेक्‍तो। नोले सम्‍म लील, दे नु गेना हना यो सांकछी दुम्‍पाइक्‍चा कली ब्रेक्‍तो।

9 मारदे हना एको मुर काइ मटीब बाक्‍नीम। थमा मसुइक्‍ब आल बाक्‍नीम। मेको आलपुकीमी परमप्रभु यावे आ शेंतीक लोव़ नेंचा मदाक्‍नीम।

10 मेकोपुकीमी नोले दुम्‍ब लोव़ ताइब आन कली ‘मतने। मकोव़ङीन’ देंनीम। मिनु परमप्रभु यावे आ लोव़ पाइब आन कली ‘ठीक पचा आ पर्बम आंइ कली लोव़ मपने। जोल पा हना यो, आंइ दाक्‍शो लोव़ ला पने। आमोस २:१२

11 परमप्रभु यावे आ लां प्रोनीन। एर ओंथ लने। इस्राएली आन का ला बाक्‍शो परमप्रभु आ पर्बम मशेंदीन’ देंनीम” देंत।

12 मोपतीके इस्राएली आन का ला बाक्‍शो परमप्रभुम “मारदे हना गेपुकीमी आं देंशो नेंचा मदाक्‍नीनी, मुर आन कली दिप्‍तीके नु दूली पतीके कली ला थमा सुइक्‍नीनी। मिनु मेको पाइनीनी।

13 मोपा इन मरिम्‍शो पशो ब्रेत्‍चा चिक्‍शो लाइश्‍शो गारो खोदेंशो दुम्‍शो बाक्‍ब। मेको इन मतुइक्‍थु याम काम ब्रेप्‍ब।

14 दोदेंशो पा मुरुमी खप के ग्‍योंब बोल्‍यो पा प्रोल्‍नीमी, मेको के चुप्‍लु रे मी कोइला गुप्‍चा नु कुवा रे ब्‍वाक्‍कु ताप्‍चा ङा टुक्रा का यो मलीबा, मोदेंशो पा प्रोल्‍चा पुंइसीनीनी” देंत।

15 मिनु परमप्रभु, इस्राएली आन का ला बाक्‍शो परमप्रभु यावेमी “आं गे लेश्‍शा, सिक्‍सी पा बाक्‍नी हना, ब्रोंइनी वा। सिक्‍सी पा बाक्‍तीनी नु थमा सुइक्‍तीनी हना, गे बोल्‍यो दुम्‍नी वा। तन्‍न गे मटिनी। यसैया ७:४; प्रस्‍थान १४:१४

16 गेपुकीमी ‘ममाइ, गो शारा ङोइश्‍शा प्रोक्‍नीकी’ देंनीनी ‘मोपतीके गे प्रोक्‍चा माल्‍नीनी’ देंत। मिनु गेपुकीमी ‘रीब पा दोरब शारा ङोइक्‍नीकी’ देंनीनी। मोपतीके इन कली खेदा पाइबपुकी यो दोरनीम।

17 मिनु मुर कामी हिंच कोंइशोमी, हजार का मुर प्रोक्‍नीम। ५ जना मुरुम हिंच कोंइशोमी नेल्‍ल प्रोक्‍शा, डांडा तारी कोक्‍के का ख्रुक्‍शो खोदेंशो पा लीनीनी। डांडा तार ङा छे‍दर का खोदेंशो पा लीनीनी” देंत। ब्‍यवस्‍था ३२:३०

18 मुल सम्‍म परमप्रभु यावेमी इन कली शिशी पचा कली रिम्‍ब। इन कली आ दाक्‍तीके कोंइचा कली बोक्‍ब। मारदे हना परमप्रभु यावे ठीक निसाफ पाइब परमप्रभु बाक्‍ब। सु सुम मेको कली रिम्‍नीमी, मेको ग्‍येरसीशो बाक्‍नीम।

19 यरूसलेमम बाक्‍ब सियोन ङा मुरपुकी, गे लेंशा मङाक्‍नीनी। मेकोमी इन ब्रेश्‍शो नेंशा, इन कली थमा पा शिशी पाइब। इन लोव़ नेंशा, लोव़ लेप्‍ब। यसैया ६५:२४

20 परमप्रभुमी इन कली श्‍येत ङा शोब्‍ले नु श्‍येत ङा ब्‍वाक्‍कु गेप्‍तु हना यो, मुल रे इन कली शेंब मख्रुंइ‍सीब। गेपुकीमी इन कली शेंब कली ताइनीनी।

21 मिनु गेपुकीमी “ग्‍युरा लां लङ कों, पेरा लां लङ” देंनीनु, इन नोले लोव़ कामी “लां मेकोन बाक्‍ब, मेको लां गाक्‍कीन” देंशो नेंनीनी। ब्‍यवस्‍था ५:३२

22 मेना इन मुशा सेल्‍शो चांदी नु सुनम गिल्‍शो मूर्तिपुकी ग्रांग्रा दीनीनी। गे मेको आन कली ग्रांग्रा दिचा ङा वा खोदेंशो पा ताइक्‍नीनी। मिनु मेको आन कली “ङोन लने” दे ताइक्‍नीनी। यसैया २७:९

23 मिनु परमप्रभुमी इन शोक्‍शो रू कली रेउ यिपाइश्‍शा, अन्‍न सिप्‍पाइक्‍ब। मिनु अन्‍न ग्रेल्‍शा, शुश जचा ताइनीनी। मेना इन बी ब्‍यफ ठेयब दिंममी जोइनीम।

24 इन गेय पपाइश्‍शो ब्‍यफ नु गधापुकीमी ग्‍योलोम क्राप्‍शा, हिक्‍सी सुप्‍शो जचा थोव़क जाइनीम।

25 आइक्‍च नु ठेयब डांडा नेल्‍ल रे ब्‍वाक्‍कु बुक्‍शा, खोल्‍सा नु खोला यिशा, ठेयब लडाइ दुम नाक्‍ती गारो ङा लाइश्‍शो खिं यो ब्रेत्‍नीम।

26 मिनु तास्‍ला आ छेङछेङ नां आ छेङछेङ खोदेंशो दुम्‍ब। नां आ छेङछेङ चहिं ७ ओटा नां आ छेङछेङ खोदेंशो दुम्‍ब। मेको ७ नाक्‍त ङा छेङछेङ दुम्‍ब। मेना परमप्रभु यावेमी आ मुर आन गार फ्रेंब। तुप्‍शो गार सापाइक्‍ब।

27 कोव़ङीन, परमप्रभु यावे ङोन रे जाक्‍ना जाक्‍न बाक्‍ब। आ गाइश्‍शो मी खोदेंशो पा ब्रशा, शुश कुन ग्रूब। आ शोव़ चुरचामी ब्रीशो नु आ लें ग्राव ग्रु दाक्‍ब मी खोदेंशो बाक्‍ब।

28 आ सास शुर सम्‍म ख्रुम्‍ब बारशो खोला खोदेंशो बाक्‍ब। मिनु मेकोमी रागी रागी ङा मुर आन कली खतम सेल्‍तीक ग्‍योलोम क्राप्‍शा, आन शोव़मी हेंथे लां कोंइब लगम पाइक्‍ब।

29 गेपुकी चाड मानेतीक नाक्‍दोम कुम्‍सो पशो खोदेंशो पा ग्‍येरसीनीनी। गेपुकी बांसुरी ताप्‍बपुकी नु परमप्रभु यावे, इस्राएली आन सेरथे फुल्‍लु आ डांडा लाइब खोदेंशो पा ग्‍येरसीशो मुर बाक्‍नीनी। ब्‍यवस्‍था १६:१४

30 मिनु परमप्रभु यावेमी आ ठेयब सेंदामी लोव़ पशा नेंपाइक्‍ब। मेकोमी गाइश्‍शा चुरशा, आ गुइ याम पाइश्‍शा, मारेइ मारेइ नेक्‍ब मी ब्रपाइश्‍शा, बुंबु पपाइश्‍शा, रेउ नु मुप्‍स यिपाइश्‍शा कोंइब।

31 मिनु परमप्रभु यावेमी अस्‍सुर ङा मुर आन कली कोक्‍केम तेप्‍ब। मेको आ सेंदा नेंशा, अस्‍सुर ङा मुर साप्‍पान हिंनीम। २राजा १९:३५-३७

32 मिनु परमप्रभु यावेमी गिश खेयप तुप्‍बा, मीश खेयप खैजडी नु बीना ताप्‍शो नेंसीब। परमप्रभु आंमा अस्‍सुर ङा मुरपुकी नु लडाइ पाइब।

33 मारदे हना ङोंइती रे ठेयब चोतीके का सेल्‍शो बाक्‍त। मेको थमा पा पिप कली सेल्‍शो बाक्‍त। मेको शुश लुक्‍च लशो नु ब्रेम्‍शो बाक्‍त। मेकेर मी नु शुश शी बाक्‍त। परमप्रभु यावे आ मुइश्‍शो गन्‍धक खोदेंशो पा मेको मी ब्राइ‍ब।