Isaiah 26 in Sunwar
1 मेको नाक्ती यहूदा रागी ङा मुरपुकीम मार कुम्सो पाइनीम देंशा हना “आंइ सहर बोल्यो बाक्ब। परमप्रभुमी आंइ कली ग्राचा गेब। लडाइ पाइब आन कली ओव़ने मचाप्तीके गारो हिरब।
2 मेको सहर ङा गारो ङा लाप्चो रोक्कीन। ठीक पाइब नु परमप्रभु यावे कली थमा सुइक्चा मप्रोंइब ओव़ने चाप्मेक्ल। भजन संग्रह ११८:२०
3 गे ग्येत्थ लुक्च मदुम्ब थुं पाइश्शो मुर आन कली थुं नाइक्चा गेनीनी। मारदे हना मेकोपुकी इन कली थमा सुइक्ब बाक्नीम।
4 गे परमप्रभु यावे कली गेना हना यो थमा सुतीन। मारदे हना परमप्रभु यावे गेना हना यो बाक्ब, सेरथे फुल्लु का बाक्ब। ब्यवस्था ३२:४
5 मारदे हना मेकोमी ठेयब लेश्शो मुर ब्रेम्पाइक्तु। आन सहर कली आइक्च सेल्शा, खपीम वोइश्शा, फुरक नु उइक्थ सेल्तु।
6 मुरपुकीम मेको कली दिम्नीम। प्रुङग मुरपुकीमी मेको कली दिम्नीम। क्येट मथीबम यो मेको कली दिम्नीम।
7 ठीक निसाफ पाइब आ लां ग्येत्थ बाक्ब। गे ठीक पाइब आ लां थेल्तीनी।
8 परमप्रभु यावे, गो इन निसाफ पतीके कली रिम्नीकी। आंइ थुं नेल्लेमी इन नें नु इन कली मिम्शा बाक्नीकी।
9 गो नाक्दो इन कली शुश मिम्नुङ। गो आं थुंमी इन कली माल्ना माल्न बाक्नुङ। मारदे हना गे रागी ङा मुर आन कली निसाफ पाइतीनी हना, रागीम बाक्बपुकीमी ठीक पतीके शेंसीनीम। भजन संग्रह ६३:७
10 परमप्रभु यावे आ अरेशो लोव़ मटीब मुरपुकीमी शिशी ताम्तेक्म हना यो, ठीक पतीके मशेंसीनीम। मेकोपुकीम ठीक पाइब आन रागीमी दूली पाइनीम। मिनु परमप्रभु यावे कली मान मपाइनीम।
11 परमप्रभु यावे, इन गुइ मेको आन पर्बम क्युक्शो बाक्तीनी हना यो, मेकोपुकीमी मतुइक्नीम। गे इन मुर आन कली दाक्शो तशा, मेकोपुकी मुने दोक्मल। इन जोरी सत्रु आन कली नेक्ब मीमी मेको आन कली यो नेक्गल। यसैया ३७:३२
12 परमप्रभु यावे, गे आंइ कली थुं नाइक्चा गेनीनी। मारदे हना मार रिम्शो पका, मेको नेल्ल इन रे पा पिशो बाक्ब। यसैया ९:६
13 आंइ परमप्रभु यावे अरु ठेयब मुरुम आंइ कली हुकुम पाम्तेक्म। तन्न गे का ला आंइ कली अरेब बाक्नीनी।
14 बेक्शो मुर मब्रोंइनीम। वांकु मबोक्नीम। मारदे हना गे मेको आन कली साइश्शा, मेको आन कली मिम्तीक यो क्याम्ताक्नी।
15 तन्न गे रागी ङा मुर आन कली सोपाइश्शा बोपाइश्शा शुश सेल्तीनी। गे मान ताइब बाक्नीनी। गे मेको रागी कली ठेयब सेल्तीनी।
16 परमप्रभु यावे, मेको मुरपुकीमी श्येत जशा, इन कली माल्तेक्म। इन गेशो सजाइ तशा, आइक्च सेंदाम इन कली पुंइतेक्म। होसे ५:१५
17 दोपा आल थिचा चिक्शो मीश मुरुम आ आल थिची ना वाइ ब्रेश्शा, रोम्सीबा, मोपा परमप्रभु यावे, गो इन ङोंइती बाक्तक। यूहन्ना १७:२१; प्रकाश १२:२
18 मिनु गोपुकी यो कोव़ज कुरशा रोम्साक्क। तन्न फश ला थीतक। गोपुकी आंइ रागी कली प्रोंइने मचाप्क। मिनु आल थिशा यो शुश दुम्ने मचाप्क।
19 इन बेक्शो मुरपुकी लेंशा ब्रोंइनीम। आन बेक्शो रां सेंसीनीम। गे फुरकुम बाक्बपुकी, बोक्कीन। ग्येरसीशा कुम्सो पने। मारदे हना इन सुनी ङा सीत छेङछेङम ब्रशो बाक्ब। मिनु रागीमी शुश ङोंइती बेक्शो मुर आन कली ग्रुंइब। इजीकीएल ३७:१-१४; मत्ती २७:५२-५३
20 आं मुरपुकी जाक्शा, इन खिं ओव़ङीन। मिनु इन नोले लाप्चो चोक्कीन। गाइक्चा मनुम्म सम्म इच्का नाक्ती ख्रुंइसीन। मत्ती ६:६
21 मारदे हना परमप्रभु यावे आ बाक्तीके रे जाक्ब। मिनु रागीम बाक्ब मरिम्शो पाइब आन कली सजाइ गेब। मिनु रागी तार देम्शो हुश नु साइश्शो मुर नेल्ल मख्रुइक्थु कोंइब” दे कुम्सो पाइनीम। उत्पत्ती ४:१०-११; प्रकाश १८:२४