Isaiah 23 in Sunwar
1 मिनु परमप्रभु यावेमी टायर आ पर्बम यसैया कली “गे, टारसीस ङा जहाजपुकी रोंका पने। मारदे हना टायर खतम दुम्शो बाक्ब। मेकेर खिं नु जहाज नाइक्तीके मलीब। साइप्रस टापु रे जाक्ब आन कली नेंपाइश्शो बाक्तेक्म। इजीकीएल २७:१२
2 समुन्द्र आ नेक्था बाक्बपुकी रोंका पने। गे सीदोन ङा ग्याप्ब लेयबपुकी इन मुर समुन्द्र शोक्साक्म।
3 इन मुर ठेयब ब्वाक्कु शोक्शा, लशो बाक्तेक्म। शीहोरम शोक्शो अन्न नु नील खोला आ एर ओंथ खुप्शो इन ग्याप्तीक लेयतीक बाक्त। मिनु गे रागी रागी ङा मुर आन ग्याप्ब लेयब बाक्तीनी।
4 सीदोन, गे मुने पावो। मारदे हना समुन्द्र ङा बोल्यो टायर सहरमी ‘गो सुत्केरी रोइ मपङ। गो आल मथिङ। गो वोंइश आल नु मीश आल आन कली मथुलु’ देंतीनी।
5 इजीप्त रागीम टायर आ पर्बम लोव़ जाक्दीम्मेनु, मेकेर ङा मुर हिंनीम।
6 गेपुकी टारशीश शोक्शा, लने। समुन्द्र आ नेक्था बाक्ब मुरपुकी रोंका पने।
7 मार, मेको इन ठेयब सहर बाक्बा ङा? मेको साइ ङोंइती रेन बाक्शो सहर बाक्त। मेकेर ङा ग्याप्ब लेयब मुरपुकी ङोन ङोन सम्म लाम्तेक्म।
8 सुमी टायर कली मोदेंशो पचा मिम्ता? ङोंइती टायर सिरपेच योक्ब बाक्त। आ ग्याप्ब लेयब मुर पिप आ तौ खोदेंशो बाक्तेक्म। आ ग्याप्ब लेयबपुकी रागीम मान पाइक्चा पुंइसीब बाक्तेक्म।
9 मिनु मुर नेल्ल आन परमप्रभु यावेमी मेको मिम्ताक्व। आ शुश दारस आ पर्बम ठेयब लेत्तीके खतम सेल्चा नु आ मान पाइक्चा पुंइसीब आन कली मुने तोक्चा कली मिम्ताक्व।
10 टारशीश ङा जहाजपुकी इन रागी लने। मुल रे मेकेर जहाज नाइक्तीके मबाक्ब। इजीकीएल २७:१२
11 परमप्रभु आ गुइ समुन्द्र तार दिंशो बाक्ब। मिनु राज्य राज्य आन कली हिम्पाइश्शो बाक्ब। परमप्रभु यावेमी कनान रागी ङा बोल्यो दरवार आन कली खतम सेल्चा” दे अरेशो बाक्ब।
12 मिनु मेकोमी “गे दिप्चा पुंइसीशो कन्ने तमी सीदोन, मुल रे ठेयब लेश्शो मबाक्नेवे। बोक्को, साइप्रस टापु गे लावो। गे मेकेर यो इ थुं नाइश्शा बाक्चा मताइनेवे” देंत।
13 कल्दी ङा मुर आन रागी कोव़ङीन। अस्सुरम ममाइ, कल्दीपुकीम सहर नेल्ल मुर मबाक्तीके सेल्तेक्म। मेको टायर सहर ब्वाकी ङा जन्तु आन बाक्तीक सेल्तेक्म। मेको सहर पुम्चा कली लाइश्शो खिं सेल्तेक्म। सहर ङा दरवार प्रेत्तेक्म। सहर नेल्ल खतम सेल्तेक्म।
14 टारशीश ङा जहाजपुकी रोंका पने। मारदे हना इन बोल्यो दुम्तीके प्रेत्तेक्म।
15 मिनु नोले टायर ७० बर्स, पिप का आ ब्रोंइतीके बर्स खोदेंशो, मदुम्म सम्म प्रेंचा पुंइसीब। मिनु मेको ७० बर्स नोले टायर सहर तेल्लेम आ कुम्सो देंशो खोदेंशो दुम्ब।
16 गे प्रेंसीशो तेल्लेम, इ बीना रिम्शो पा ताप्शा, सहरम हिरसो। शुश कुम्सो पावो। मिनु इ कली फ्रुक्नीमी कों?
17 मिनु ७० बर्स नोले परमप्रभु यावेमी टायर सहर कली मिम्ब। मिनु मेकोम लेंशा आ तेल्लेम पशो ङा क्येट ताइब। मिनु मेकोमी तेको तेको रागी ङा राज्य ङा पिपपुकी नु तेल्लेम पाइब।
18 मिनु आ तेल्लेम पा चेम्शो क्येट परमप्रभु यावे के दुम्ब। मेको क्येट महेंनीम। आ चेम्शो क्येट परमप्रभु यावे आ ङोंइती बाक्ब। मेको क्येट मुर आन कली जचा फेक्चा कली गेनीम।