Isaiah 19 in Sunwar
1 मिनु परमप्रभु यावेम इजीप्त आ पर्बम यसैया कली “कोव़ङीन, परमप्रभु यावे रीब पा बेरब गोस्सुम इजीप्त रागी जाक्ब। मेकेर ङा मूर्तिपुकी हिंशा ख्रिंख्रि पाइनीम। इजीप्त ङा मुर आन थुं लुक्च लाइब।
2 गो इजीप्त ङा मुर आन कली आंम आंमा लडाइ पपाइक्नुङमी। मोपा मेको आन लोक्ब नु लडाइ पाइनीम। आन नेक्था ङा मुर लडाइ पमुइनीम। सहर सहर लडाइ तोमुइनीम। राज्य राज्य लडाइ तोमुइनीम।
3 मिनु इजीप्त ङा मुर आन थुं लुक्च लाइब। गो मेको आन मिम्शो खतम सेल्नुङ। मिनु मेकोपुकीमी आन मूर्ति नु बेक्शो मुर आन सल्ला नेंचा माल्नीम।
4 गो इजीप्त ङा मुर आन कली शिशी मपथु, सासन पाइब आ गुइमी जिम्मा गेनुङमी। मिनु हिंचा ङा पिपमी मेको आन कली सासन पाइब” दे परमप्रभु, मुर नेल्ल आन परमप्रभु यावेमी देंत।
5 मिनु नील खोला ङा ब्वाक्कु सोव़ना सोव़न लशा, ब्वाक्कु मबाक्शो दुम्ब।
6 मेकेर ङा ब्वाक्कु रिना पाइब। मिनु इजीप्त ङा नील खोला ङा आइक्च खोलापुकी सोव़शा शुश मलीनीम।
7 नील खोला आ नेक्था दिंम दुम्शा, मुरपुकीम रू सेल्नीम। तन्न आन शोक्शो मारेइ मारेइ सोव़शा, फशेम योल्ब।
8 मिनु ङांइ साइक्ब मुर नेल्ल रोंका पाइनीम। बोल्सी ग्यारबपुकी नु ग्याइल आप्बपुकी “मार पचा, दो पचा” देंनीम।
9 श्येले सेल्ब नु वा प्रोव़बपुकीम सुर्ता पाइनीम। वा प्रोव़ब हिंनीम।
10 प्रोव़ना प्रोव़न बाक्बपुकी राव किक्नीम। मिनु गाल्च ताक्शा गेय पाइबपुकी रोंका पाइनीम।
11 सोआन ङा ठेयब मुरपुकी मूर्ख बाक्नीम। फाराओ कली अर्ती गेबपुकीम दूली अर्ती गेनीम। गे दोपा फाराओ कली “गो जोक्ब तुइक्ब नङ। गो साइ ङोंइती ङा पिप आ खिं रे पिशो बाक्नुङ” देंने चाप्नीनी?
12 गे, निप्स पाइश्शो मुरपुकी ते बाक्नी? गेपुकीम मुर नेल्ल आन परमप्रभु यावेमी इजीप्त कली मार पचशो बाक्मे, मेको लोव़ पा मुर आन कली तुइक्पतीन।
13 सोआन ङा ठेयब मुरपुकी मूर्ख दुम्तेक्म। मेम्फीस ङा ठेयब मुरपुकीम जोल लोव़ कली थमा सुइक्नीम। मिनु मेको आन नेल्ल क्येङा ठेयब मुरपुकीमी इजीप्त ङा मुर आन कली हेंथे लां खोइक्पाइक्नीम।
14 परमप्रभु यावेमी मेको आन कली ग्रांग्ये माग्ये पोक्तीक सोक्तीम प्रिंताक्मी। मेकोपुकीम इजीप्त रागी कली दुक्शो मुर आन मेशो तार गाक्शो खोदेंशो सेल्तेक्म।
15 इजीप्त रागी कली सुइमी वारच पने मचाप्नीम।
16 मेको नाक्ती इजीप्त ङा मुर आन थुं मीश मुर आन थुं खोदेंशो दुम्ब। मेकोपुकी मुर नेल्ल आन परमप्रभु यावेमी आ गुइ क्युक्शो तशा ख्रिंख्रि पा हिंनीम।
17 इजीप्त रागी ङा मुरपुकी यहूदा ङा मुर आन क्येङा हिंनीम। मुर नेल्ल आन परमप्रभु यावेमी इजीप्त रागी कली मार पचशो बाक्बा, मेको लोव़ नेंब नेल्ल हिंनीम।
18 मिनु मेको नाक्त इजीप्त रागी ङा ५ ओटा सहरमी कनानी आन लोव़ ब्वाक्नीम। मिनु सहर ङा मुरपुकीमी, मुर नेल्ल आन परमप्रभु यावे आ नेंमी कसम जाइनीम। मेको सहर का आ नें इर-हेरेस बाक्ब। इर-हेरेस आ अर्थ नां आ सहर देंसीब।यसैया ६५:१६; येरमीया १२:१६
19 मेको नाक्ती इजीप्त रागी आ दातेमी परमप्रभु यावे कली चढ़ेतीके का सेल्नीम। मिनु मेको आ सांदमी परमप्रभु यावे कली थाम का सेल्नीम। लेवी २६:१
20 मेको थाम इजीप्त रागीमी मुर नेल्ल आन परमप्रभु यावे कली मिम्तीक चिन्ड का दुम्ब। मारदे हना मेकोपुकीमी श्येत गेचा पुंइसीतीके परमप्रभु यावे कली “वारच पाइक्की” दे लोव़ पाइनीम। मिनु परमप्रभु यावेमी मेको आन कली आन श्येत रे प्रोंइब का सोइक्ब। मेकोमी लडाइ पा मेको आन कली श्येत रे प्रोंइब।
21 मिनु परमप्रभु यावेमी आंम कली इजीप्त ङा मुर आन ङोंइती तुइक्पांइसीब। मिनु मेको नाक्त इजीप्त ङा मुरपुकीमी परमप्रभु यावे कली थमा सुइक्नीम। मिनु मार मार चोशा चढ़ेतीक चढ़ेशा, कबल पा, आन पशो कबल खाप्नीम। यसैया ६६:१९
22 परमप्रभु यावेमी इजीप्त ङा मुर आन कली तुप्ब। मिनु सापाइक्ब। मिनु मेकोपुकी परमप्रभु यावे आ नोले खोइक्नीम। मिनु मेको आन पुंइशो लोव़ नेंशा। मेको आन कली सापाइक्ब।
23 मिनु मेको नाक्ती इजीप्त रे अस्सुर सम्म ठेयब लां का दुम्ब। मिनु अस्सुर रागी ङा मुरपुकी इजीप्त जाक्नीम। इजीप्त ङा मुरपुकी अस्सुर लाइनीम। मिनु इजीप्त नु अस्सुर ङा मुर गारशा परमप्रभु यावे कली ठेयब सेल्नीम।
24 मिनु मेको नाक्ती इजीप्त, अस्सुर नु इस्राएल नेल्ल क्येङा नोले ङा इस्राएल रागी दुम्ब। मेको रागी रागी आन दातेमी मेको सांफा आसीक ताइब दुम्नीम। ब्यवस्था ४:२०; रोमी १५:१०
25 मिनु मुर नेल्ल आन परमप्रभु यावेमी आसीक गेशा मेको आन कली “आं इजीप्त ङा मुर, आं सेल्शो अस्सुर रागी नु आं योव़शो इस्राएल ङा मुरपुकी आसीक रमल” देंब।