Isaiah 11 in Sunwar
1 येस्से आ ठुटा रे ठोसा का दाप्ब। मेको आ शाक्श रे वाशो राशीम फल फुल सिप्ब।
2 मिनु परमप्रभु यावे आ सोक्त मेको तारी नाइश्शा बाक्ब। मेको जोक्ब तुइक्ब नु रुप्तीक सोक्त बाक्ब। अर्ती गेब नु सक्ति गेब सोक्त बाक्ब। मेको जोक्तीक तुइक्तीक थुं गेब नु परमप्रभु यावे कली मान पा हिंब सोक्त बाक्ब।
3 मेको आ दाक्शो परमप्रभु यावे कली मान पा हिंचा बाक्ब। मेकोमी मुर आन थुं कोव़शा निसाफ पाइब। सुइ आन लोव़ मनेंथु निसाफ पाइब।
4 ठीक पतीकेमी प्रुङग आन कली निसाफ पाइब। रागी ङा आइक्च नु ठेयब मुर नेल्ल आन कली उइक्थ पा निसाफ पाइब। मिनु रागी ङा मुर आन कली आ लोव़मी तुप्ब। परमप्रभु यावे आ अरेशो लोव़ मटीब आन कली मुइश्शा साइक्ब। २थिस्सलोनिकी २:८
5 मेको आ ठीक पतीके आ किप्शुर किप्शो खोदेंशो बाक्ब। मेको थमा पा थमा सुइक्तीक आ किप्तीक बाक्ब।
6 मेना फर नु पाठा काथा बाक्नीम। जोइ क्यारश आ पाठा नु इप्ब। बाछा नु गुप्स आ चाइक्ब काथा जोइनीम। आइक्च आलमी मेको आन कली योव़ब। यसैया ६५:२५
7 बी नु वां काथा जोइनीम। मेको आन चाइक्बपुकी काथा बाक्नीम। गुप्समी ब्यफ खोदेंशो पा नल ब्वाइब।
8 मिनु दूध तूब आल बुस्स आन पोव़लाम ग्यारनीम। दूध प्रोंइशो आलमी बीस पाइश्शो बुस्स आन बाक्तीकेम गुइ शुइक्नीम।
9 आं डांडामी मारेइ श्येत नु खतम दुम्तीके मबाक्ब। मारदे हना दोदेंशो पा ब्वाक्कुम समुन्द्र ब्रीबा, मोदेंशो पा परमप्रभु यावे कली तुइक्तीकेम रागी नेल्ल ब्रीब।
10 मिनु मेको नाक्ती येस्से आ शाक्श जात जात ङा मुर आन कली चिन्ड दुम्ब। मिनु रागी रागी ङा मुर नेल्लेमी मेको कली हिल्लो पाइनीम। मेको आ बाक्तीके छेङछेङम बाक्ब। रोमी १५:१२
11 मेना परमप्रभुमी आ लीशो मुर आन कली लेंशा प्रोंइशा चाक्ब। मिनु ते रे प्रोंइशा चाक्ब देंशा हना, अस्सुर, इजीप्त, पथ्रोस, एथीयोपीया, एलाम, शिनार, हमाथ नु समुन्द्र आ नेक्था रे प्रोंइशा चाक्ब। इजीकीएल ३७:२१-२२
12 मेकोमी रागी रागी ङा मुर आन कली चिन्ड का वोइक्ब। मिनु इस्राएल ङा प्रोक्शो मुर आन कली खुप्ब। यहूदा ङा ब्रशो मुर आन कली यो तेइ तेइ रे खुप्ब।
13 एफ्राइम आ गेहे पतीके जाम्शा लाइब। यहूदा कली श्येत गेब साइक्चा पुंइसीनीम। मेना एफ्राइममी यहूदा कली गेहे मपाइब। मिनु यहूदामी यो एफ्राइम कली श्येत मगेब।
14 मिनु मेको निक्शी पलिस्ती नु लडाइ पचा कली पच्छिम गे बारनीस। मेकोपुकी गारशा, पूर्ब ङा मुर आन मारेइ मारेइ रोइक्नीम। एदोमी नु मोआबी आन कली लडाइ तोइनीम। अम्मोनीपुकीमी मेको आन देंशो टीनीम।
15 मिनु परमप्रभु यावेमी इजीप्त ङा समुन्द्र ङा ब्वाक्कु नेल्ल सोव़पाइक्ब। मेकोमी युफ्रेटीस तारी यो आ गुइ क्युक्शा, मेको रे ७ ओटा खोला सेल्ब। मिनु मुरपुकी गाक्शा शोक्शा लाइनीम।
16 अस्सुर ङा लीशो आ मुर इस्राएली आन कली जाक्चा कली ठेयब लां का दुम्ब। मेको लां इस्राएली इजीप्त रे ग्रूशा गाक्शो लां खोदेंशो दुम्ब। प्रस्थान १४:२९