Hosea 13 in Sunwar
1 मिनु परमप्रभुमी “एफ्राइममी लोव़ पवानु, मुरपुकी ख्रिंख्रि पाम्तेक्म। इस्राएलमी मेको कली मान पाम्तेक्म। तन्न मेको बाल देवता कली पूजा पतीके बेक्त।
2 मिनु मुल मेको क्येङा शुश पाप पाइनीम। मेकोपुकीमी आंम कली चांदी के मूर्ति सेल्नीम। मेको मूर्ति नेल्ल मुरुमी सेल्शो बाक्नीम। मिनु मुरुमी ‘मेको आन कली चढ़ेन। बाछा कली पुक्पु पने’ देंनीम। यसैया ४४:१०
3 मोपतीके मेकोपुकी सुनी ङा गोस्स, सुनी ङा जाम्शा लाइब सीत, फशेमी योल्ब खला ङा भूस नु झेल रे पा ग्रूब कुन खोदेंशो दुम्नीम” देंत। होसे ६:४; भजन संग्रह १:४
4 मिनु “गो परमप्रभु यावे, इन परमप्रभु नङ। गो इन कली इजीप्त रागी रे ग्रुंइताक्ङ। गे गो आं ङा लाक्शा अरु परमप्रभु मतुइक्नीनी। मिनु गो आं ङा लाक्शा अरुमी पाप रे प्रोंइने मचाप्नीम।
5 मिनु गो गोरशो रागी नु शुश सोव़शो रागीमी इन कली कोव़ता। होसे ९:१०
6 गो मेको आन कली रूपाइक्ता। मिनु मेकोपुकी ठेयब लेश्शा, आं कली प्रेंताक्म। ब्यवस्था ३२:१५
7 मोपतीके गो मेको आन कली गुप्स खोदेंशो पा नु जोइ खोदेंशो पा आन लांम बाप्शा बाक्नुङ। होसे ५:१४
8 चाइक्ब रोंइसीशो वां खोदेंशो पा मेको आन कली ग्याइश्शा आन रां चेत्नुङ। मिनु गुप्सुमी खोदेंशो पा मेको आन कली ब्वाइनुङ। मिनु ब्वाकी ङा जन्तुमी साइश्शो खोदेंशो पा साइक्नुङ।
9 इस्राएलीपुकी, गो इन कली खतम सेल्नुङ। इन कली सुम वारच पाइबा? येरमीया २:१७
10 इन कली प्रोंइने चाप्ब ते बाक्मा? इन कली वारच पाइब सासन पाइब, ते लाक्गमे? मेको आ पर्बम गेपुकीमी ‘गो आंइ कली पिप नु सासन पाइब गेकी’ देंतीनी। १सामुएल ८:५-९
11 मोपतीके गो गाइश्शा इन कली पिप का गेता। मिनु गो चुरशा मेको कली पोक्शा लाइक्ता।
12 एफ्राइम आ पाप ख्रुइश्शा वोइश्शो बाक्ब। मेको आ पापपुकी ब्रेक्शा वोइश्शो बाक्नीम।
13 मीश मुर आल थितीक रोइ पशो खोदेंशो पा मेको कली श्येत दुम्ब। तन्न मेको मारेइ यो मतुइक्ब आल खोदेंशो बाक्ब। मेको दूली पा जरमेशो बाक्ब।
14 गो मेको आन कली तुरस रे प्रोंइनुङा ङा? गो मेको आन कली बेक्चा रे पा प्रोंइनुङा ङा? साइक्ब, इ साइक्तीक ते बाक्बा? तुरस, इ खतम सेल्तीक ते बाक्बा? गो शिशी मपाइनुङ। २तिमोथी १:१०; प्रकाश २०:१४; १कोरिन्थी १५:५४-५५
15 मेको आ लोक्ब आन दातेमी रिम्शो दुम्शा सोशा बोशा लत हना यो, गो मेको कली शिशी मपाइनुङ। परमप्रभु यावे रे पा पूर्ब ङा फश गोरशो रागी रे पा जाक्ब। मिनु आ ब्वाक्कु बुक्तीक सोव़ब। मेको आ इनार यो सोव़नीम। मोपा मेको आ शुश क्येट लाइब मारेइ मारेइ नेल्ल नुप्नीम।
16 सामरीया ङा मुरपुकीमी आन पाप पशो ङा श्येत जचा माल्नीम। मारदे हना मेकोपुकीम आंम परमप्रभु कली मटीम। मेकोपुकी तरवारमी साइक्चा पुंइसीनीम। मेको आन आलपुकी खपीमी ताइश्शा साइक्चा पुंइसीनीम। मेको आन कोव़ज कुरशो मीश मुर आन कोव़ज चेत्चा पुंइसीनीम” देंत। २राजा १५:१६