Hebrews 4 in Sunwar
1 मोपतीके होस पांइसय, थुं नाइक्चा ताइनीनी देंशो लोव़ मुल यो लीशो बाक्तीके, होस पा बाक्य। मारदे हना सु सुमी आ लोव़ मटीमे, मेको ओव़चा मताइनीम।
2 थमा पा, इं कली यो मेको आन कली खोदेंशो पा परमप्रभु यावे आ लोव़ नेंपाइश्शो बाक्त। तन्न इं किकी पिपी आन कली नेंपाइश्शो लोव़ शोर गाक्शो दुम्त। मारदे हना नेंबपुकीमी थमा मसुइक्थु मटिशो बाक्तेक्म।
3 गो थमा सुइक्बपुकी चहिं थुं नाइक्चा ताइनय। परमप्रभु यावेमी “गो चुरशा, मेको आन कली गेनायो थुं नाइक्चा मगेनुङमी, दे कसम जाता” देंशो बाक्त हना यो, आ राज्यमी नाइश्शा बाक्तीके वोइक्ने थुम्शो बाक्त। हिब्रू ३:११
4 परमप्रभु यावेमी रागी मारेइ मारेइ सेल्शा, ७ नाक्त आ पर्बम “परमप्रभु यावेमी नेल्ल सेल्ने थुम्शा, ७ नाक्तीमी नाइक्से बाक्त” दे ब्रेक्शो बाक्ब। उत्पत्ती २:२
5 मिनु लेंशा लोव़ का चहिं “मेको आन कली गेनायो आं राज्य ओव़शा, नाइक्चा मगेनुङमी” दे ब्रेक्शो बाक्ब।
6 मो हना यो का निक्शी ओव़चा ताइनीम। तन्न आ लोव़ ङोंइती ङा नेंबपुकीमी मटिथु, ओव़चा मतामे बाक्त।
7 मोपतीके अर्को नाक्त का वोइक्ब। नाप्खे देंशो लोव़ “मुलाक्ती आ लोव़ नेंतीनी हना, इन थुं खकटा पा मटीब मदुमीन” दे शुश बर्स नोले दाऊद कली ब्रेक्पाइश्शो बाक्माक्त। हिब्रू ३:७
8 यहोसुमी मेको आन कली नाइक्तीकेम चाक्दीन्ने चाप्शो हना, मेकोमी मो देंचा ममाल वा। ब्यवस्था ३१:७; यहोसु २२:४
9 मोपतीके परमप्रभु यावे आ मुर आन कली नाइक्तीक नाक्त का बाक्ब, दे तुइक्नय।
10 मिनु सुमी परमप्रभु यावे आ नाइक्तीके ताइबा, मेको परमप्रभु यावे खोदेंशो पा आ गेय रे नाइक्चा ताइब। प्रकाश १४:१३
11 मोपतीके सुइमी परमप्रभु यावे आ लोव़ मटिथु जाम्शा मलमल। गो नेल्ले नाइक्चा ततीकेमी ओव़चा माल्य। हिब्रू ३:१६-१९
12 मारदे हना परमप्रभु यावे आ लोव़ ब्रोंइतीक सक्ति पाइश्शो, गेय पाइब नु निम्फा पटटी हेश्शो तरवार क्येङा हेश्शो बाक्ब। मेकोमी श्ये नु रुश, सोक्त नु थुं तिल्ब। मिनु मिम्तीके नु थुं ङा लोव़ नेल्ल नाक्ने चाप्ब। प्रकाश २:१२; येरमीया २३:२९
13 मेको आ ङोंइती सुइमी मारेइ ख्रुइक्ने मचाप्नीम। नेल्लेमी पशो नु मिम्शो मेको आ ङोंइती तांइसीब।
14 तन्न गो इं के ठेयब चढ़ेब का बाक्ब। मेको स्वर्ग लाक्शा लाइब, परमप्रभु यावे आ तौ, येसु बाक्ब। इं थमा सुइक्तीके बोल्यो सेल्शा, गेनायो मप्रोंइय। हिब्रू ३:१; हिब्रू ९:११,१२; हिब्रू १०:२३
15 मारदे हना इं नेल्ल क्येङा ठेयब चढ़ेबमी इं चाप्तीक नु मचाप्तीक दोदेंशो बाक्बा, नेल्ल तुइक्ब। गोपुकी इं थुं थाम्चा पुंइसीशो खोदेंशो पा, आ यो थुं थाम्चा पुंइसाक्व। तन्न थुं थाम्चा पुंइसाक्व हना यो, पाप मपव। हिब्रू २:१८; यूहन्ना ८:४६
16 मोपतीके इं कली मार मार माल्यानु, वारच पपांइसीशा, माफ नु शिशी तचा कली परमप्रभु यावे आ ङोंइती महिंथु, थुं बारपा जाक्दीय्य। रोमी ३:२५; रोमी ५:२