Hebrews 2 in Sunwar

1 इं नेंशो लोव़ थुंमी वोइक्‍चा माल्‍ब। थुंमी मवोइक्‍तय हना, मेको लोव़ साम्‍नय।

2 परमप्रभु यावे आ स्‍वर्ग ङा गेय पाइबपुकीम तुइक्‍पाइश्‍शो लोव़ थमा दुम्‍त। मिनु सु सुमी मेको आन लोव़ मटीमे, मेकोपुकीमी सजाइ ताम्‍तेक्‍म। प्रेरित ७:५३; गलाती ३:१९

3 पाप आ सजाइ रे ब्रोंइतीक ठेयब गेय कली ममिम्‍ताक्‍य हना, दोपा सजाइ रे ब्रोंइने चाप्‍नया ङा? मेको ठेयब गेय ङोंइती प्रभुमी तुइक्‍पाइश्‍शो बाक्‍त। मिनु आ लोव़ नेंबपुकीमी “थमा बाक्‍ब” दे तुइक्‍पाइश्‍शो बाक्‍तेक्‍म। हिब्रू १०:२९; हिब्रू १२:२५

4 परमप्रभु यावेमी पपाइश्‍शो चिन्‍ड नु छक लाक्‍चा ङा गेय, सक्ति पाइश्‍शो शुश गेय नु परमप्रबु यावेमी आ दाक्‍शो पा योव़शा आ सोक्‍तीमी मुर आन कली पपाइश्‍शो गेय, मेको सांफा सांकछी बाक्‍नीम। मर्कूस १६:२०; २कोरिन्‍थी १२:१२; १कोरिन्‍थी १२:४-११; प्रेरित २:१-१३; प्रेरित १०:४४-४५

5 इं देंशो लोव़ मार बाक्‍ब देंशा हना, पाप रे प्रोंइचा नु नोले जाक्‍ब परमप्रभु यावे आ राज्‍य चहिं परमप्रभु यावेमी आ स्‍वर्ग ङा गेय पाइब आन गुइमी जिम्‍मा मगेशो बाक्‍ब।

6 परमप्रभु यावे आ लोव़ पाइब कामी “मुर आइक्‍च बाक्‍त हना यो, मेको कली मिम्‍नीनी। रागीम जरमेशो मुर आन कली मारदे कोव़नीनी?

7 मेको कली इन स्‍वर्ग ङा गेय पाइब क्‍येङा इच्‍ची आइक्‍च सेल्‍शा वोइक्‍तीनी। नोले मान पाइक्‍चा पुंइसीतीके सिरपेच गुप्‍चा गेशा, सक्ति पाइश्‍शो सेल्‍तीनी।

8 मिनु मारेइ मारेइ मेको आ अधिकारम गेतीनी” दे ब्रेक्‍शो बाक्‍त। परमप्रभु यावेमी आ गुइमी मारेइ मारेइ जिम्‍मा गेशा अधिकार गेप्‍तु देंशो लोव़मी मार रुम्‍सीब देंशा हना, मेको नेल्‍ल कोव़ब बाक्‍ब, दे रुम्‍सीब। तन्‍न गो मुल सम्‍म मोदेंशो अधिकार पाइब बाक्‍ब, दे मरुप्‍नय। भजन संग्रह ८:४-६

9 गोपुकीमी येसु कली मान पाइक्‍चा पुंइसीतीके, छेङछेङ ङा सिरपेच गुप्‍शो नु सक्ति पाइश्‍शो दुम्‍शो ताइतय। रागीम बाक्‍मेनु, परमप्रभु यावे आ स्‍वर्ग ङा गेय पाइब क्‍येङा इच्‍ची आइक्‍च दुम्‍शो बाक्‍त। मारदे हना परमप्रभु यावेमी मुर नेल्‍ल आन कली शिशी पाइनुङ, दे कोंइचा कली मुर आन पर्बम श्‍येत जपाइश्‍शा बेक्‍चा गेप्‍तु। फिलिप्‍पी २:८-९

10 नेल्‍ल सेल्‍ब नु नेल्‍ल आन कली ब्रोंइतीक सोक्‍त गेबमी शुश मुर आन कली आन पाप रे प्रोंइतु। मेको प्रोंइब कली शुश श्‍येत जपाइश्‍शा, पाको सेल्‍तु। हिब्रू १२:२

11 पाप रे प्रोंइब नु पाप रे ब्रोंइब नेल्‍ल खिं का ङा मुर दुम्‍तेक्‍म। मोपतीके पाप रे प्रोंइबमी पाप रे ब्रोंइब आन कली आ लोक्‍बपुकी देंचा मुने मपाइब। यूहन्‍ना १७:१९; मर्कूस ३:३४-३५; यूहन्‍ना २०:१७

12 मेकोमी “गो आं लोक्‍ब आन कली इन नें तुइक्‍पाइक्‍नुङमी। थमा सुइक्‍ब आन दातेमी इन कली ठेयब सेल्‍शा कुम्‍सो पाइनुङ” देंत। भजन संग्रह २२:२२

13 मिनु लेंशा “गो मेको कली थमा सुइक्‍‍नुङ” दे ब्रेक्‍शो बाक्‍त। मिनु चिनु लेंशा “नेनीन, परमप्रभु यावेमी आं कली गेशो तमी तौ, गो नेल्‍ल काथा बाक्‍नीकी” देंत। यसैया ८:१६-१७

14 तमी तौ हुश नु रुश के जोल्‍शो नम। मोपतीके येसु ख्रीस्‍त मेकोपुकी नु खाल का ङा पा हुश नु रुश के दुम्‍त। बेक्‍पाइक्‍ब सक्ति पाइश्‍शो कली खतम पोक्‍चा कली आंमन बेक्‍त। २तिमोथी १:१०; १यूहन्‍ना ३:८

15 मारदे हना बेक्‍पाइक्‍ब सक्ति पाइश्‍शो सैतान कली ग्राचा नु मबेक्‍म सम्‍म बेक्‍चा हिंब मुर आन कली हिंचा रे प्रोंइचा कली मो पाप्‍तु।

16 परमप्रभु यावे आ स्‍वर्ग ङा गेय पाइब आन कली ममाइ। अब्राहाम आ खिं ङा मुर आन पर्बम मोदेंशो पशो बाक्‍त।

17 मोपतीके मेको आ लोक्‍ब खोदेंशो दुम्‍चा माल्‍ताक्‍व। मोपा परमप्रभु यावे आ गेय पा मुर आन पाप क्‍याम्‍चा कली शिशी पाइब नु गेनायो आ दाक्‍चा मप्रोंइब ठेयब चढ़ेब दुम्‍त। फिलिप्‍पी २:७

18 मारदे हना आ यो शुश श्‍येत जशा, थुं थाम्‍चा पुंइसाक्‍व। मोपा आन थुं थाम्‍चा पुंइसीशा, श्‍येत जाइब आन कली वारच पने चाप्‍ब। हिब्रू ४:१५