Hebrews 11 in Sunwar
1 थमा सुइक्चा चहिं मार बाक्ब देंशा हना, आस पशो थमा दुम्शो तांइसीब नु इं मिक्चीम मतशो थोव़की बाक्नीम, दे मिम्चा बाक्ब। मिनु बाक्नीमी यो। मेको मोदेंशो मिम्चा कली थमा सुइक्चा देंसीब। २कोरिन्थी ५:७
2 मोपा थमा सुइश्शोमी इं किकी पिपीपुकी ठीक दुम्मा बाक्त।
3 गोपुकीमी यो मोपा इं थमा सुइश्शोमी सरीङ रागी नेल्ल दुम्मेनु, मिक्चीम तशो थोव़की के सेल्शो मनम, तन्न परमप्रभु यावेमी “दुमीन” देंशो लोव़मी दुम्शो बाक्नीम, दे तुइक्नय। उत्पत्ती १:१-२,४
4 काइन नु हाबील निम्फामी परमप्रभु यावे कली भेटी चढ़ेम्सेनु, काइन क्येङा हाबील आ चढ़ेशो रिम्शो बाक्माक्त। मारदे हना हाबीलमी परमप्रभु यावे कली थमा सुइक्बाक्माक्त। मिनु हाबील आ चढ़ेशो ताक्शा, परमप्रभु यावेमी “हाबीलमी थमा सुइक्ती। मोपतीके ठीक दुम्पाइक्ता” दे कोंइताक्व। हाबील बेक्शा लशा, मिश बर्स दुम्शा यो आ थमा सुइश्शो आ पर्बम चहिं मुल सम्म लोव़ पना पन बाक्नय। उत्पत्ती ४:३-४
5 हानोकमी परमप्रभु यावे कली थमा सुइक्बाक्माक्त। मोपतीके आ मबेक्थु सेसीन, परमप्रभु यावे नु लशा बाक्चा तवा बाक्त। हानोक रागीम बाक्मेनु, परमप्रभु यावे आ देंशो टिशा, आ थुं नुपाइश्शो बाक्माक्त, दे तुइक्नय। हिब्रू लोव़मी हानोक कली एनोक बाक्ब।उत्पत्ती ५:२४
6 थमा मसुइक्थु मेको आ थुं नुपाइक्ने मजाप्ब। परमप्रभु यावे आ नेक्था जाक्दीन्ने यो मजाप्ब। मेको बाक्ब, दे थमा सुइक्चा माल्ब। मिनु मेको बाक्ब, दे थमा सुइक्बपुकीम मेको कली माल्नीम। मिनु आ कली माल्ब आन कली तपांइसीब।
7 नोआह यो थमा सुइक्ब बाक्माक्त। यावेमी मेको कली “नोले ओदेंशो दुम्ब” मदानु, मेको लोव़ थमा सुइश्शा टिशा, ठेयब डोंगा सेल्शा, आ खिं ङा मुर आन कली ओंइशा, बेक्चा मगेथु प्रोंइमी बाक्त। नोआहमी मो पशो तशा यो अरुमी थमा मसुदमे बाक्त। मिनु आन थमा मसुइक्तीके दोसी दुम्शा, नेल्ल बेक्चा माल्मा बाक्त। नोआह चहिं थमा सुइश्शोमी ब्रोंइचा तांइसीब, दे कोंइब दुम्माक्त। उत्पत्ती ६:८-९,१३-२२
8 अब्राहाममी यो परमप्रभु यावे आ लोव़ थमा सुइक्बाक्माक्त। यावेमी “इ कली नोले गेनुङ देंशो रागी कोंइनन। मोपतीके एकेर रे लावो” देंमेनु, अब्राहाममी परमप्रभु यावे आ देंशो टिशा, ते लचा मतुइक्थु, यो मलेत्चा ङा पा मेको रागी प्रोंइशा गाक्माक्त। उत्पत्ती १२:- २१:-
9 मिनु थमा सुइश्शा कोंइशो रागीम जाक्दीश्शा, परमप्रभु यावे आ गेशो लोव़ ताइब आ तौ इसहाक, आ चच याकूब नु काथा बाक्शा, अर्को रागी ङा मुर खोदेंशो पा खिं मसेल्थु ताम्बु कीशा बाक्माक्त।
10 सरीङ नु रागी कली सेल्ब परमप्रभु यावेमी दुशा ग्येरशा बाक्तीक सहर यो सेल्ब बाक्ब। अब्राहाममी मेको सहर कली रिम्शो बाक्माक्त।
11 थमा सुइश्शोमी अब्राहाम आ मीश सारा आल मथीब थारी बाक्शा यो, आल थीब दुम्माक्त। मारदे हना लोव़ गेब परमप्रभु यावेमी आ लोव़ दोपा यो खाप्ब, दे थमा सुइश्शो बाक्माक्त।
12 मेना अब्राहाम आल मथीब खाल्पा बाक्माक्त हना यो, नोले आ खिं ङा मुर सोरुल खोदेंशो पा शुश दुम्शा, हिक्ने मचाप्चा ङा दुम्मा बाक्त।
13 अब्राहाम नु आ खिं ङा मुरपुकीमी परमप्रभु यावेमी गेशो लोव़ थमा सुइश्शा बेक्मा बाक्त। मेको लोव़ गाप्शो मतथु, ङोन रे तशा मजाक्दीत्थु, बेक्मा बाक्त। मेकोपुकीमी “इं रागी मजाक्दीत्थु, अर्को आन रागीम बाक्तय” देंशो बाक्मा बाक्त। उत्पत्ती २३:४; उत्पत्ती ४७:९; १इतिहास २९:१५
14 मो देंमानु “आंइ रागी माल्शा गाक्तक” दे तुइक्पाइक्नीम।
15 मेकोपुकीमी आन ग्रूशा लशो रागी मिम्ताक्म हना, लेश्शा लम वा।
16 तन्न ग्रूशा लशो रागी क्येङा रिम्शो बाक्तीके परमप्रभु यावेम गेब, दे तुइश्शा, परमप्रभु यावे गे लमा बाक्त। मिनु परमप्रभु यावे मेको आन परमप्रभु यावे दुम्चा मुने मपाइब। मेको आन कली बाक्तीके सहर का सेल्शा वोइश्शो बाक्ब।
17 अब्राहाममी आ थुं थाम्चा पुंइसीशा थमा सुइश्शा, आ तौ इसहाक कली चढ़ेवा बाक्त। इसहाक अब्राहाम आ कांइचीक तौ बाक्माक्त। मेको रे पा परमप्रभु यावे आ गेशो लोव़ थमा दुम्चा माल्शो बाक्माक्त। उत्पत्ती २२:१-१९; याकूब २:२१
18 मारदे हना परमप्रभु यावेमी अब्राहाम कली “इसहाक रे पा इ चच युइ रागीम लीनीम” दे लोव़ गेशो बाक्माक्त। उत्पत्ती २१:१२
19 अब्राहाममी “आं तौ बेक्त हना यो, परमप्रभु यावेमी बेक्शो रे सेंने चाप्ब” दे मिम्ता बाक्त। परमप्रभुमी अब्राहाम आ मिम्शो तुइश्शा, आ तौ कली मसाइक्पाइक्थु लेत्ता बाक्त।
20 इसहाकमी परमप्रभु यावे आ देंशो नोले दुम्ब लोव़ थमा सुइश्शा, आ तौ याकूब नु एसाव आस कली आसीक गेम्सी बाक्त। उत्पत्ती २७:१-४०; उत्पत्ती ४८:- ५०:-
21 याकूबमी थमा सुइश्शा, आ बेक्ची ना कोक्केमी आ पिया तिक्शा, परमप्रभु यावे कली ठेयब सेल्शा, योसेफ आ तौ आस कली आसीक गेम्सी बाक्त। उत्पत्ती ४७:३१
22 मिनु नोले योसेफमी यो आ बेक्ची जाक्त, दे तुइश्शा ङा मिन “इस्राएलीपुकी इजीप्त रे ग्रूशा गाक्नीम” दे परमप्रभु यावे आ देंशो लोव़ मिम्शा, आ मुर आन कली “गे लेन्नीनु, आं रुश यो लाइश्शा लने” दे माइक्मी बाक्त। मारदे हना आ यो “परमप्रभु यावे आ देंशो जाक्दीप्ब” दे थमा सुइश्शो बाक्माक्त।
23 मोसा जरमेसेनु, आम आफोमी थमा सुइश्शा “परमप्रभु यावेमी एको आल कली ब्रोंइपाइक्ने चाप्ब। मोपतीके एको इश दारशो आल कली मसाइक्चा” देंशा, पिप आ हुकुम मटिथु महिंथु, आस तौ मोसा कली महिना सां सम्म ख्रुइश्शा वोदसे बाक्त। प्रस्थान २:१२,१४
24 मिनु मोसा मोपा कोल्शा ठेयब दुम्शा, परमप्रभु यावे कली थमा सुइश्शा, मार पवा बाक्त देंशा हना “मुल ङा मेरे फाराओ आ तमी आ तौ मदुम्नुङ, आं मुर नु लाइनुङ” दे लमाक्त।
25 पापीपुकी नु काथा बाक्शा, सुख जचा क्येङा परमप्रभु यावे आ मुर नु बाक्शा, श्येत जशा बाक्चा योव़तु।
26 मारदे हना इजीप्त ङा शोंप नु मान तशा यो मारेइ मसुइक्थु “ख्रीस्तमी श्येत जशो खोदेंशो पा श्येत जचा थमा ङा शोंप नु मान बाक्ब, दे मिम्ताक्व। मिनु नोले इनाम यो तांइसीब” दे तुइश्शा थमा सुइश्शो बाक्माक्त।
27 “मतांइसीब परमप्रभु यावे कली मिक्चीम तशो खोदेंब पा आं नेक्थान ताइनुङ” दे थमा सुइश्शा, पिपी गाइश्शो तशा यो महिंथु, इस्राएली आन कली इजीप्त रे ग्रुंइशा लाइक्मी बाक्त।
28 इजीप्त रे ग्रुंइचा ङोंइती पास्सा चाड ङा भोज जपाइक्मी बाक्त। मारदे हना “तेको खिं ङा लाप्चो आ पियामी हुश ब्रुइश्शो बाक्मे, मेकेर परमप्रभु यावे आ स्वर्ग ङा गेय पाइबमी जेठा तौ कली मसाइक्ब” दे परमप्रभु यावे आ लोव़ थमा सुइश्शा, हुश ब्रुइक्पाइक्मी बाक्त।
29 मिनु थमा सुइश्शोमी लल समुन्द्रम सोव़शो लां दुम्माक्त। मिनु खोइल का यो मजित्थु शोक्समा बाक्त। मेको आन नोले खोइश्शा खेदा पाइब इजीप्त ङा मुरपुकी चहिं समुन्द्रमी ग्रुम्शा बेक्मा बाक्त।
30 परमप्रभु यावे आ देंशो लोव़ थमा सुइश्शा, यरीको सहर ७ नाक्त सम्म हिरसमा बाक्त। मिनु ७ नाक्त गारो नेल्ल ब्रेम्मा बाक्त। यहोसु २:-; ६:१-२५
31 ङोंइती राहाब तेल्लेममी मोसाम सोइश्शो क्यारी पाइब आन कली जतीक बाक्तीक गेशा मान पशो बाक्माक्त। मिनु आन देंशो लोव़ थमा सुइक्तीके मटीब नेल्ल नु मबेक्थु, ब्रोंइचा तवा बाक्त। याकूब २:२५
32 में ङा लाक्शा मार देंनुङा? मारदे हना मोदेंशो थमा सुइक्ब शुश बाक्नीम। गिदोन, बाराक, साम्सोन, येफ्ता, दाऊद, सामुएल नु परमप्रभु यावे आ लोव़ पाइब नेल्ल आन पशो मिम्पाइक्तन्नी हना, आं लोव़ गेनायो मनुप्ब। न्यायाधीस ६:११- ८:३२; न्यायाधीस ४:४-२४; न्यायाधीस १३:१-१६,३१; न्यायाधीस ११:१-१२,७; १सामुएल १७:-; दानीएल ६:-
33 मोदेंशो थमा सुइक्बपुकीमी मार पामे बाक्त देंशा हना, कोइमी लडाइ पा ग्राशा, रागी आंम के सेल्मे बाक्त। कोइमी श्येत जाइब आन कली वारच पामे बाक्त। कोइमी ङोंइती देंशो लोव़ थमा दुम्शो तामे बाक्त। गुप्स आन शोव़ रे यो ब्रोंइमा बाक्त।
34 मीम हुम्चा पुंइसीशा यो मबेक्मा बाक्त। तरवारमी क्योरचामेनु यो ब्रोंइमा बाक्त। मारेइ पने मचाप्ब बाक्मा बाक्त हना यो, पने चाप्ब दुम्मा बाक्त। लडाइ पामेनु यो ठेयब थुं पाइश्शो दुम्शा, आन जोरी सत्रु आन कली फ्रुशा खेरमे बाक्त।
35 मीश मुरपुकीमी आन तौ बेक्शा लशा, बेक्शो रे सेंसीशो तामे बाक्त। मिनु मेको आलपुकी एको रागीम ब्रोंइमा बाक्त। कोइमी “बेक्शा नोले बेक्शो रे सेंसीशा गेनायो मबेक्सीब, ग्येरशा बाक्चा तांइसीब” दे थमा सुइश्शा, श्येत जशा यो फाल्शा बाक्मा बाक्त। शुश श्येत जशा तुप्चा पुंइसमा बाक्त हना यो “थमा सुइक्चा प्रोंइनीकी” दे मदेंमा बाक्त। “थमा सुइक्चा प्रोंइनीकी” देंशो नम हना, प्रोंइशा सोइक्तेम वा। “थमा सुइक्चा मप्रोंइनीकी” देंशोमी श्येत जना जन साइक्चा पुंइसमा बाक्त। १राजा १७:१७-२४; २राजा ४:८-३७;
36 का निक्शी शुक्शी लोव़ पा कोर्राम युक्शा, गुइ खोइली साङलोम पाइश्शा, जेल्खानम चोक्शा वोइक्चा पुंइसमा बाक्त। १राजा २२:२७; येरमीया २०:१-३; येरमीया ३७:११-१६
37 फुल्लु आप्शा साइक्चा पुंइसमा बाक्त, आरामी रिक्शा साइक्चा पुंइसमा बाक्त, तरवारम क्योरशा साइक्चा पुंइसमा बाक्त। २इतिहास २४:२१
38 तेइ बाक्चा मतथु, जचा फेक्चा मतथु, भेडा नु क्यारश आन कुशुल फेक्शा, एर ओंथ हिरना हिरन गोरशो रागी रोंगुमी प्रोक्शा, पुक्खीमी ख्रुइक्ना ख्रुइक्न बाक्मा बाक्त। मोपा श्येत जाइब आन कली एको रागीमी बाक्शा ब्रोंइचा मगारब। मारदे हना रिम्शो मुर बाक्नीम। एको रागी चहिं मरिम्शो बाक्ब।
39 मेको नेल्ले थमा सुइश्शा, परमप्रभु यावे आ ङोंइती ठीक दुम्मा बाक्त। परमप्रभु यावे आ गेशो लोव़ चहिं गाप्शो मतामे बाक्त। हिब्रू ११:४-५
40 मारदे हना परमप्रभु यावेमी इं पर्बम शुश रिम्शो मिम्शो बाक्मा बाक्त। मिनु मेकोपुकी यो गोपुकी नु रिम्शो दुम्मल। मेको नक लां रे पा पाको मसेल। मेको आन कली नु इं कली काथा वोइश्शो बाक्ब, दे रुब्य।