Genesis 50 in Sunwar
1 मिनु योसेफ आ आफ आ कुल तार गुर ब्वेशा, पुक्पु पाइश्शा, ङाक्माक्त।
2 मिनु आ गेय पाइब नु डाक्टर आन कली “आं आफ आ रां कली ख्रेक्तीन” दे माइक्मी बाक्त। मिनु मेकोपुकीमी बेक्शो मुर आ रां ख्रेक्तमे बाक्त।
3 मिनु ४० नाक्त ख्रेक्तमे बाक्त। मारदे हना ख्रेक्चा कली ४० नाक्ती माल्बाक्माक्त। इजीप्त ङा मुरपुकी यो ७० नाक्ती रोंका पामे बाक्त।
4 मिनु रोंका पतीक नाक्ती नुम्मेनु, योसेफमी फाराओ आ खिं ङा मुर आन कली “गो इन ङोंइती शिशी ताइनुङ हना, गे फाराओ कली आं पर्बम लोव़ पने।
5 आं आफोम आं कली ‘गो बेक्ङानु, कनान रागीम आं कली थिम्तीके ठीक पाता, मेकेर थिम्चा माल्नेवे’ दे कसम जपाइक्ती। मोपतीके आं आफ थिम्चा कली मेकेर लचा गेयीनी। मिनु गो थिम्शा लेत्नुङ। एको लोव़ फाराओ कली देनीन” दे मेको आन कली मदा बाक्त। उत्पत्ती ४७:२९-३०
6 मिनु फाराओमी “इ कसम जशो खोदेंशो पा इ आफ कली थिमो” दे योसेफ कली देंमाक्त।
7 मिनु योसेफ, फाराओ आ गेय पाइबपुकी, मेको आन ठेयब मुरपुकी, इजीप्त रागी ङा ठेयब मुरपुकी,
8 योसेफ आ खिं ङा मुर नेल्ल, आ लोक्बपुकी नु आ आफ आ खिं ङा मुर नेल्ल आ आफ थिम्थ लमा बाक्त। आन आइक्च आलपुकी नु आन क्यारश भेडा, बी ब्यफ ला गोशेनमी बाक्मा बाक्त।
9 मिनु योसेफ नु बग्गी नु शारा ङोइक्बपुकी लमा बाक्त। मिनु शुश मुर दुम्मा बाक्त।
10 मिनु मेकोपुकी आताद आ चेरब तुप्तीके यर्दन खोला आइक्ची हांबु जाक्दीश्शा, ठेयब रोंका पामे बाक्त। मिनु योसेफमी आ आफ कली ७ नाक्त सम्म रोंका पवा बाक्त।
11 मिनु मेकेर बाक्ब कनान रागी ङा मुरपुकीम आताद आ चेरब तुप्तीक खलाम मेको रोंका पाइब आन कली तशा “एको इजीप्त ङा मुर आन ठेयब रोंका का बाक्ब” देंमा बाक्त। मोपतीके मेको यर्दन आइक्ची हांब ङा बाक्तीके कली आबेल-मिस्रैम नें वोदमे बाक्त। आबेल-मिस्रैम आ अर्थ “ठेयब रोंका पतीके” बाक्ब।
12 मोपा याकूब आ तौपुकीमी आन आफ आ अरेशो खोदेंशो पामे बाक्त। उत्पत्ती ४९:२९
13 मिनु आ तौपुकीम आन आफ आ रां कनान रागी चाक्दीश्शा, अब्राहाममी मुर थिम्चा कली हित्ती ङा एफ्रोन रे ग्याप्शो माम्रे आ नेक्था माक-पेला ङा रूमी थिम्मे बाक्त। उत्पत्ती २३:१३-२०
14 मिनु आ आफ थिम्शा नोले, योसेफ नु आ नु गाक्ब नेल्ल इजीप्त रागी लेम्मा बाक्त।
15 मिनु आन आफ बेक्म नोले योसेफ आ लोक्बपुकीम “मुल योसेफमी इं कली क्येक्क लेप्बा कों। मारदे हना गोपुकीमी मेको कली मरिम्शो पाइतय” दे लोव़ पमुमा बाक्त। उत्पत्ती २७:४१
16 मिनु आ लोक्बपुकीमी लोव़ पचा कली मुर का योसेफ आ बाक्तीके सोइक्तमे बाक्त। मेकोमी “इन आफ आ बेक्चा क्येङा ङोंइती मार अरेवा बाक्त देंशा हना,
17 गे योसेफ कली ‘इन लोक्ब आन मरिम्शो पशो आ पर्बम माफ गेने। मारदे हना इन कली मरिम्शो पाम्तेक्मे। मिनु इन आफ आ परमप्रभु आ गेय पाइब आन कली आन पाप माफ गेने’ दे माइक्चा” दे सोइश्शो मुरुमी योसेफ कली देंमाक्त। मिनु योसेफमी मेको आ लोव़ नेंशा ङाक्माक्त।
18 मिनु आ लोक्बपुकी यो जाक्मा बाक्त। मिनु आ ङोंइती खुम्की पा बाप्शा “इन वाइल नकी” दे सेउ पामे बाक्त।
19 मिनु योसेफमी “महिनीन, गो परमप्रभु मनङ।
20 गेपुकीमी आं कली मरिम्शो पाइतीनी। परमप्रभुमी चहिं रिम्शो सेल्ती। मो दुम्शा परमप्रभुमी शुश मुर आन कली ब्रोंइचा गेप्तु। उत्पत्ती ४५:५,७
21 मोपतीके महिनीन, गो इन कली नु इन आल आन कली कोव़नुङ” दे आ लोक्ब आन कली लेम्शा, रिम्शो लोव़ पवा बाक्त।
22 योसेफ नु आ खिं ङा मुर नेल्ल इजीप्त रागीमी बाक्मा बाक्त। मिनु योसेफ सहे का १० बर्स ब्रोंइमाक्त।
23 मिनु आ तौ एफ्राइम आ चच युइ यो तवा बाक्त। आ ङोंइती जरमेशो, मनस्से आ तौ माकीर आ तौ आ थुकुम वोदा बाक्त।
24 मिनु योसेफमी आ लोक्ब आन कली “गो बेक्नुङ। परमप्रभुमी इन कली कोव़ब। परमप्रभुमी अब्राहाम, इसहाक नु याकूब कली ‘इन कली कनान रागी लेप्पाइक्नुङ’ दे कसम जशा, लोव़ पशो बाक्ब” देंमाक्त।
25 मिनु योसेफमी आ लोक्ब आन कली “परमप्रभुमी इन कली थमा पा एकेर रे लेप्पाइक्ब। मेना आं रुश यो लतीने” दे कसम जपाइक्मी बाक्त। प्रस्थान १३:१९; यहोसु २४:३२
26 मिनु योसेफ सहे का १० बर्स दुम्शा बेक्माक्त। मिनु आ रां कली मराक्चा ङा पा ओख्ती ख्रेक्शा, इजीप्त रागीमी बाकसम कुर पा वोदमे बाक्त।