Genesis 47 in Sunwar
1 मिनु नोले योसेफमी फाराओ कली “आं आफ, आं लोक्बपुकी, आन क्यारश भेडा, बी ब्यफ, आन मारेइ मारेइ नेल्ल कनान रागी रे चाक्शा, गोशेनमी जाक्शो बाक्नीमी” दे शेंदा बाक्त।
2 मिनु आ लोक्ब आन दाते रे ५ जना योव़शा, फाराओ आ ङोंइती राप्पदा बाक्त।
3 मिनु फाराओमी मेको आन कली “इन गेय मार बाक्बा?” दे हिल्लो पवा बाक्त। मिनु मेकोपुकीमी “गो, इन गेय पाइबपुकी, भेडा गोठला बाक्नीकी। गो आंइ किकी पिपी रे गोठला बाक्तक” दे फाराओ कली देंमा बाक्त। उत्पत्ती ४६:३३-३४
4 मिनु लेंशा “कनान रागीमी ठेयब अन्काल दुम्तीके, गो अर्को रागी ङा मुर दुम्शा, एक बाक्थ जाक्तक। मारदे हना आंइ क्यारश भेडा आन कली जोतीके मबा। मोपतीके आंइ कली गोशेन माइक्तीकेमी बाक्चा गेने, दे पुंइनीकी” दे पुंइदमे बाक्त।
5 मिनु फाराओम योसेफ कली “इ आफ नु इ लोक्बपुकी इ बाक्तीक रागी जाक्तेक्मे।
6 इजीप्त रागी इ रागी खोदेंशो मिम्तो। नेल्ल क्येङा रिम्शो जोतीके गोशेनमी मेको आन कली बाक्पतो। मिनु मेको इ मुर आन दातेमी रिम्शो गेय पाइब बाक्तेक्म हना, आं बस्तु भाव आन कली यो कोव़पतो” दे मदा बाक्त।
7 मिनु नोले योसेफमी आ आफ कली फाराओ आ ङोंइती राप्पदा बाक्त। मिनु याकूबमी फाराओ कली आसीक गेवा बाक्त।
8 मिनु फाराओमी “गिश बर्स दुम्नी?” दे हिल्लो पवा बाक्त।
9 मिनु याकूबमी “गो मुल सम्म रागीम बाक्शो, सहे का ३० बर्स दुम्ती। आं किकी पिपी खोदेंशो पा शुश बर्स मदुम्ङ। गो मरिम्शो नाक्त यो ताता” देंमाक्त। हिब्रू ११:१३
10 मिनु आसीक गेशा, फाराओ रे लमाक्त।
11 मिनु योसेफमी फाराओ आ देंशो खोदेंशो पा आ आफ नु आ लोक्ब आन कली इजीप्त रागीमी रू गेवा बाक्त। रागी ङा नेल्ल क्येङा रिम्शो बाक्तीके रामेसेस आ रागी गोशेनमी बाक्पाइक्मी बाक्त।
12 मिनु योसेफम आ आफ, आ लोक्ब नु आ आफ आ खिं ङा मुर नेल्ल आन कली आन खिं खिं कली गाप्चा ङा पा जचा थोव़क गेशा थुल्मी बाक्त। उत्पत्ती ४५:११
13 रागी नेल्लेमी जचा थोव़क मथिदमे बाक्त। मारदे हना मेको अन्काल बारना बारन लमाक्त। मिनु इजीप्त नु कनान रागी ङा मुर शुश श्येत जामे बाक्त।
14 मिनु योसेफमी इजीप्त नु कनान रागी ङा अन्न ग्याप्थ जाक्ब आन गुइ रे क्येट ताक्शा, फाराओ आ खिंमी वोदा बाक्त।
15 मिनु इजीप्त नु कनान ङा मुर आन क्येट नुप्शा, योसेफ आ बाक्तीकेमी जाक्शा, मेकोपुकीमी “जचा थोव़क गेकी। आंइ के क्येट नुप्त। गे जचा थोव़क मगेतीनी हना, गो इन ङोंइती बेक्चा माल्नीकी” दे मदमे बाक्त।
16 मिनु योसेफमी “इन के क्येट मबाक्त हना, इन बस्तु भाव चाक्कीन। मेको रे पा जचा थोव़क ताइनीनी” देंमाक्त।
17 मिनु आन बस्तु भाव योसेफ आ बाक्तीके चाक्ग्मे बाक्त। मिनु योसेफमी शारापुकी, क्यारश भेडा, बी ब्यफ, गधा ताक्शा, जचा थोव़क गेमी बाक्त। मेको बर्समी मेको आन कली आन बस्तु भाव आन पा ङा अन्न गेवा बाक्त।
18 मिनु मेको बर्स नुप्शा ङा मिन, अर्को बर्स लेंशा जाक्शा योसेफ कली मेकोपुकीमी “गो आंइ प्रभु आ ङोंइती आंइ क्येट नुप्त, आंइ क्यारश भेडा, बी ब्यफ नेल्ल आंइ प्रभु केन दुम्तेक्म। मुल आंइ के रूपुकी नु आंम रां ला लीब।
19 मारदे गो इन ङोंइती बेक्नीकी? आंइ कली नु आंइ रू कली यो अन्न गेशा ग्यापीन। गोपुकी फाराओ आ वाइलीम वाइल दुम्नीकी। गोपुकी ब्रोंइचा नु आंइ रागीम मुरपुकी लीचा कली वांचेर गेने” देंमा बाक्त।
20 मिनु योसेफमी इजीप्त रागी नेल्ल फाराओ कली ग्यबा बाक्त। मारदे हना ठेयब अन्काल आ पर्बम इजीप्त ङा मुरपुकीमी आन रू नेल्ल लेयङमे बाक्त। मिनु रू नेल्ल फाराओ के दुम्माक्त।
21 मुर नेल्ल आन कली वाइलीम वाइल सेल्शा, आन बाक्तीक रे याक्शा वोदा बाक्त।
22 नाक्सो आ रू चहिं मग्यबा बाक्त। मारदे हना आन जचा फाराओ आ गुइ रे तामे बाक्त। मोपतीके आन रू यो लेयचा ममाल्मा बाक्त। गन्ती १८:२०; यहोसु १३:१४; इजीकीएल ४४:२८; इजीकीएल ४५:१-५
23 मिनु योसेफम मुर आन कली “नेनीन, मुलाक्ती रे गेपुकी नु इन रू नेल्ल फाराओ के दुम्त। गो ग्याप्ता। एको वांचेर लाइश्शा, शोक्कीन।
24 मिनु रिक्ची ना ५ भाग ङा भाग १ फाराओ कली गेचा माल्नीनी। अर्को ४ भाग वांचेर कली नु इन कली, इन खिं ङा मुर नु आइक्च आल नेल्ल आन कली थुल्चा कली लीब” दे माइक्मी बाक्त। एफाह का २२ लिटर खोदेंशो बाक्ब।
25 मिनु मेकोपुकीमी “गे आंइ कली बेक्चा रे प्रोंइतीनी। गे आंइ कली थम रिम्शो पाइतीनी। गो फाराओ आ वाइल बाक्नीकी” देंमा बाक्त।
26 मिनु योसेफमी इजीप्त रागी ङा ऐन कानुनमी “फाराओ कली ५ भाग ङा भाग का गेचा माल्नीम। नाक्सोपुकीमी चहिं गेचा ममाल्नीम। मारदे हना आन रू फाराओ के मदुम” दे ब्रेक्पदा बाक्त। मेको मुल सम्म मोदेंशो बाक्ब।
27 मिनु इस्राएल इजीप्त रागी ङा गोशेनमी बाक्मेनु, आन मारेइ मारेइ नु मुरपुकी सोशा बोशा, शुश दुम्मा बाक्त। उत्पत्ती ४६:३; प्रस्थान १:७,१२
28 याकूब इजीप्त रागीमी १७ बर्स ब्रोंइमाक्त। मेको आ ब्रोंइतीक नेल्ल पा सहे का ४७ बर्स बाक्माक्त।
29 मिनु आ बेक्ची जाक्माक्त। मिनु आ तौ योसेफ कली ब्रेश्शा “गे आं कली शिशी पाप्तीवी हना, इ गुइ आं फिला तार वोइश्शा, जोल मपथु, आं कली रिम्शो पावो। आं कली इजीप्त रागीम मथिम्यी, दे पुंइनुङ। उत्पत्ती ५०:५
30 गो बेक्शा, आं कली इजीप्त रगी रे कुरशा, आं कली आं किकी पिपी आन तुरसुम थिम्यी” दे पुंइदा बाक्त। मिनु योसेफमी “इन देंशो पाइनुङ” देंमाक्त। उत्पत्ती २३:२०
31 मिनु मेकोमी “कसम जावो” दे मदा बाक्त। मिनु योसेफमी कसम जवा बाक्त। मिनु इस्राएल ब्राख्येम बाक्शा, खुम्की पांइसे बाक्त। हिब्रू ११:२१