Genesis 44 in Sunwar
1 मिनु योसेफमी आ खिं ङा ठेयब गेय पाइब कली “मेको मुर आन धोक्रो प्रिंपतो। गिश कुरने चाप्नीमी, मिश प्रिंपतो। मिनु आन क्येट अन्न आ शोव़म वोतो।
2 मिनु आं चांदी के कचौरा, आ क्येट नु मेको नेल्ल क्येङा ठिटा आ धोक्रो आ शोव़म वोतो” दे मदा बाक्त। मिनु मेकोमी योसेफ आ देंशो खोदेंशो पा पवा बाक्त।
3 मिनु सुनी कना रिम्शो पा नां मसोव़थु, मेको मुर नु आन गधा आन कली लचा गेमे बाक्त।
4 मिनु सहर रे लमानु, योसेफम आ ठेयब गेय पाइब कली “बोक्को, मेको आन नोले खोतो। मिनु मेको आन कली थिश्शा ‘मारदे गे रिम्शो पाइब कली मरिम्शो पनी?
5 मारदे आं प्रभु आ मार मार तूतीक नु लिंक्यु कोव़तीक चांदी के कचौरा खुइ पनी? गे मरिम्शो पाइतीनी’ दे माइक्मी” दे मदा बाक्त।
6 मिनु मेको आन कली थिश्शा, मोदेंशो लोव़ पवा बाक्त।
7 मिनु मेकोपुकीमी “आंइ प्रभुम मारदे मोदेंशो लोव़ पाइबा? गो मो मपक।
8 नेनीन, आंइ धोक्रोमी थिश्शो क्येट कनान रागी रे लेंशा चाक्तक। गो दोपा इन प्रभु आ खिं रे सुन चांदी खुइ पाइनीकी? उत्पत्ती ४३:२१
9 गो इन गेय पाइब सु नु मेको कचौरा बाक्मे, मेको बेक्ल। मिनु गोपुकी यो इन वाइल दुम्कल” दे मदमे बाक्त।
10 मिनु मेकोमी “इन देंशो खोदेंशो दुम्ल। सु आ धोक्रोम थिंसीबा, मेको आं वाइल दुम्ब। अरु मो लाइनीनी” देंमाक्त।
11 मिनु नोले मेकोपुकीमी रीब रीब पा आन धोक्रो गधा रे शोल्शा, रोक्शा कोव़ङमे बाक्त।
12 मिनु मेकोमी ङोंइती जरमेशो आ धोक्रोमी, नोले नेल्ल आन धोक्रोमी का का पा माल्शा, कान्छा ला लीमाक्त। मिनु कचौरा बेन्यामीन आ धोक्रोमी थिदा बाक्त।
13 मिनु मेकोपुकीमी आन वा खाक्शा, आन अन्न लेंशा गधा तार वोइश्शा, सहर लेम्मा बाक्त।
14 मिनु यहूदा नु आ लोक्बपुकी योसेफ आ खिं जाक्मानु, योसेफ मेक उइ बाक्माक्त। मेको आ ङोंइती खुम्की पा बाम्मा बाक्त।
15 योसेफम मेको आन कली “गे मार पनी? आं खोदेंशो मुरुम नेल्ल तुइक्ब, दे मतुइक्तीनी?” दे मेको आन कली हुइक्ता बाक्त।
16 मिनु यहूदामी “आंइ प्रभु कली मार देंनीकी? मार लोव़ पाइनीकी? गोपुकी ‘ठीक मुर बाक्नीकी’ दे दोपा देंने चाप्नीकी? परमप्रभुमी इन गेय पाइब आन मरिम्शो कोंइताक्व। नेनीन, गोपुकी नु कचौरा धोक्रोम बाक्ब, गो नेल्ल आंइ प्रभु इन वाइल दुम्तक” देंमाक्त। उत्पत्ती ४२:२१-२२
17 मिनु योसेफमी “ममाइ, मेको मपाइनुङ। तन्न सु मुर नु आं कचौरा बाक्मे, मेको ला आं वाइल दुम्चा माल्ब। गेपुकी चहिं थुं नाइश्शा, इन आफ आ बाक्तीक लने” देंमाक्त।
18 मिनु यहूदा मेको आ नेक्था लशा “आं प्रभु, लोव़ का पचा गेयीनी। इन गेय पाइब आ पर्बम मगाइक्तीने। गे फाराओ खोदेंशो बाक्नीनी।
19 आं प्रभुमी ङोंइती आ गेय पाइब आन कली ‘इन के आफ बाक्बा? अर्को लोक्ब यो बाक्बा?’ दे हिल्लो पाइतीनी। उत्पत्ती ४२:७,१३; उत्पत्ती ४३:७
20 मिनु गोपुकीमी आंइ प्रभु कली ‘आंइ के आफ खाल्पा दुम्शो बाक्ब। मिनु खाल्पाम थिशो तौ का यो बाक्ब। मेको आ लोक्ब चहिं बेक्त। मेको लीशो आ ममा आ का ला तौ बाक्ब। मिनु आ आफोमी मेको कली शुश दाक्ब’ दे इन कली देंतक।
21 मिनु गेमी ‘आं कली कोंइचा कली मेको एक चाक्कीन’ देंतीनी।
22 गोपुकीमी आंइ प्रभु कली ‘मेको वोंइश आलमी आ आफ कली प्रोंइने मचाप्ब। प्रोंइतु हना, आ आफ बेक्ब’ देंतक।
23 मिनु गेमी इन गेय पाइब आन कली ‘इन लोक्ब कान्छा मचाक्तीनी हना, गे आं कली ग्रुम्थ मपिने’ देंतीनी। उत्पत्ती ४२:१५; उत्पत्ती ४३:३-५
24 गोपुकी आंइ आफ इन गेय पाइब आ बाक्तीके जाक्दीश्शा, इन लोव़ नेल्ल माइक्तक।
25 आंइ आफोमी ‘लेंशा जचा थोव़क ग्याप्थ लने’ देंत।
26 मिनु गोपुकीमी ‘आंइ लोक्ब कान्छा मलाइक्तक हना, गो लने मचाप्नीकी। मारदे हना आंइ कान्छा भाइ गोपुकी नु मलत हना, ग्रुम्चा मदुम्ब’ देंतक।
27 मिनु इन गेय पाइब आंइ आफोम आंइ कली ‘आं मीशेम तौ निक्शी थिप्तु, गे तुइक्नीनी।
28 का आं बाक्तीक रे लत। जन्तुमी मेको कली ब्वाम्तेक्मे। गो मेको कली लेंशा मतङ। उत्पत्ती ३७:३२-३३
29 मिनु गे एको कली यो लाइक्तीनी हना, लांम बेक्बा कों, बेक्त हना, गे आं बोइश्शो चां श्येतम प्रिंशा, तुरसुम वोइक्चा माल्नीनी’ दे लोव़ पाप्तु। उत्पत्ती ४२:३८
30 मिनु गो इन गेय पाइब आंइ आफ आ बाक्तीक जाक्दीकानु, एको वोंइश आल, आ आफ आ थुं नेल्लेमी दाक्ब। मोपतीके गोपुकी नु मबाक्त हना,
31 मेको तशा, आ आफ बेक्ब। मिनु गोपुकीमी आंइ आफ, चां बोइश्शो इन गेय पाइब कली सुर्ता पपाइश्शा, श्येत जपाइश्शा तुरसुम वोइक्चा माल्नीकी।
32 गो मेको आ जमानी बाक्शो बाक्नुङ। गो आफ कली ‘मेको आल मचाक्ता हना, आं मरिम्शो पशो गेना हना यो आं तारी लील’ देंती। उत्पत्ती ४३:९
33 मोपतीके एको वोंइश आल ममाइ, आं प्रभु, आं कली इन वाइल वोतीन। एको वोंइश आल आ लोक्बपुकी नु लचा गेने।
34 गो आं आफ आ ङोंइती एको वोंइश आल मलाइक्थु, दोपा लने चाप्नुङा? आं आफ आ श्येत तशा, गो यो फाल्ने मचाप्नुङ” दे यहूदामी योसेफ कली देंमाक्त।