Genesis 42 in Sunwar
1 मिनु याकूबमी इजीप्त रागीमी अन्न बाक्ब दे तुइश्शा, आ तौ आन कली “गे मारदे कोव़मुशा बाक्नीनी? मारेइ मपाइनीनी?
2 नेनीन, इजीप्त रागीमी अन्न बाक्ब। मिनु गोपुकी अन्कालमी मबेक्य, ब्रोंइय अन्न ग्याप्थ लने” देंमाक्त।
3 मिनु योसेफ आ १० जना लोक्बपुकी इजीप्त अन्न ग्याप्थ लमा बाक्त।
4 याकूबमी योसेफ आ लोक्ब बेन्यामीन कली चहिं श्येत दुम्बा कों, दे हिंशा, आ लोक्बपुकी नु मसोइक्ता बाक्त।
5 मोपा याकूब आ तौपुकी अर्को मुर नु इजीप्त अन्न ग्याप्थ जाक्दीम्मा बाक्त। मारदे हना कनान रागीमी यो अन्काल दुम्माक्त।
6 मिनु योसेफ सरकार ङा ठेयब मुर दुम्शा, रागी नेल्ल ङा मुर आन कली अन्न लेयपदा बाक्त। योसेफ आ लोक्बपुकी जाक्शा, योसेफ आ ङोंइती खुम्की पा बाप्शा, सेउ पामे बाक्त।
7 मिनु योसेफमी आ लोक्ब आन कली तशा, तुइक्ता बाक्त। तन्न मतुइश्शो खोदेंशो पा ठेयब सेंदामी “ते रे जाक्नी?” दे हिल्लो पामी बाक्त। मिनु मेकोपुकीमी “गो कनान रागी रे अन्न ग्याप्थ जाक्तक” देंमा बाक्त।
8 योसेफम आ लोक्ब आन कली तुइक्ता बाक्त। मेकोपुकीमी चहिं योसेफ कली मतुइक्त्मे बाक्त।
9 मिनु योसेफम आ लोक्ब आन पर्बम आ ङोमु मिम्ता बाक्त। मिनु मेको आन कली “गे क्यारी पाइब बाक्नीनी। एको रागीम ते रे ओव़चा, दे कोव़थ जाक्तीनी” दे आ लोक्ब आन कली माइक्मी बाक्त। उत्पत्ती ३७:५-९
10 मिनु मेकोपुकीमी “ममाइ प्रभु, इन गेय पाइब अन्न ग्याप्थ जाक्तक।
11 गो नेल्ल मुर का आ तौ नकी। गोपुकी ठीक पाइब बाक्नीकी। इन गेय पाइब, गो क्यारी पाइब मनकी” देंमा बाक्त।
12 मिनु योसेफमी “ममाइ, गे एको रागी ‘दोपा ओव़चा’ दे कोव़थ जाक्तीनी” देंमाक्त।
13 मिनु मेकोपुकीमी “गो इन गेय पाइब १२ जना लोक्ब बाक्नीकी। कनान रागी ङा मुर का आ तौ नकी। नेनीन, कान्छा मुल आ आफ नु बाक्ब। का चहिं मबाक्ब” दे योसेफ कली मदमे बाक्त।
14 मिनु योसेफमी “आं देंशो खोदेंशो पा, गे क्यारी पाइब बाक्नीनी।
15 गो इन कली कोव़नुङ, फाराओ आ नेंमी इन लोक्ब कान्छा मजाक्म सम्म गे एकेर रे लचा मताइनीनी।
16 इन दाते ङा का कली इन लोक्ब कान्छा ब्रथ सोइक्तीन। मेना सम्म गे एक जेल्खानम बाक्नीनी। इन लोव़ थमा बाक्म कों, जोल बाक्म कों, नोले तुंइसीब। गे इन लोक्ब कान्छा मचाक्तीनी हना, फाराओ आ नेंमी गे क्यारी पाइब बाक्नीनी” देंमाक्त।
17 मेको नेल्ल आन कली नाक्त सां सम्म जेल्खानम चोक्मी बाक्त। उत्पत्ती ३७:२४
18 मिनु नाक्त सां नोले योसेफमी “गो परमप्रभु कली मान पा हिंनुङ। मोपतीके गेपुकी ब्रोंइचा कली आं देंशो पने।
19 गे ठीक पाइब मुर बाक्तीनी हना, इन दाते ङा का चहिं जेल्खानम बाक्कीने। अर्को अन्न कुरशा, इन खिं लने।
20 इन लोक्ब कान्छा कली एक चाक्कीन। मिनु इन लोव़ थमा बाक्ब, दे तुंइसीब। मिनु गे बेक्चा ममाल्नीनी” दे आ लोक्ब आन कली माइक्मी बाक्त। मिनु आ देंशो पामे बाक्त।
21 मेकोपुकीमी “गो थमा पा इं लोक्ब आ पर्बम ठेयब पाप पाइतय। मेकोमी इं कली तशा, शुश हिंशा, पुनानु यो, मेको आ लोव़ मनेंय। मोपतीके इं कली एको श्येत दुम्त” देंमुमा बाक्त। भजन संग्रह ५०:२१
22 मिनु रूबेनमी “मेको आल कली मारेइ पाप मपने, दे गो इन कली मदेंङा ङा? तन्न गे आं लोव़ मनेंनी। मेको कली श्येत गेशो हुश आ क्येक्क लेत्चा पुंइसाक्य” दे आ लोक्ब आन कली देंमाक्त। उत्पत्ती ३७:२१-२२
23 मिनु योसेफमी मेको आन लोव़ नेल्ल रुप्तु, दे मतुइक्तमे बाक्त। मारदे हना योसेफमी मेकोपुकी नु लोव़ पवानु, आन लोव़ रुप्ब नु आ कली आ अर्थ देंब मुर का वोदा बाक्त।
24 मिनु योसेफ आ लोक्बपुकी रे लशा ङाक्माक्त। मिनु लेश्शा जाक्शा, मेकोपुकी नु लोव़ पशा, मेको आन ङोंइती सिमियोन कली पाइक्ता बाक्त।
25 मिनु नोले योसेफमी आन धोक्रोम अन्न प्रिंपाइश्शा, आन गेशो क्येट यो लेंशा, आन धोक्रोम कुर पपाइश्शा, लां कली जचा थोव़क यो गेपाइक्मी बाक्त। आ लोक्ब आन कली मोदेंशो पाइक्मी बाक्त।
26 मिनु मेकोपुकी अन्न आन गधा तारी वोइश्शा लमा बाक्त।
27 मिनु लांमी बास बाक्मानु, आन दाते ङा कामी आ गधा कली थुल्चा, दे आ धोक्रो रोक्गा बाक्त। मिनु आ धोक्रो आ शोव़मी आ थाप्शो क्येट थिदा बाक्त।
28 मिनु मेकोमी आ लोक्ब आन कली “आं क्येट लेत्मे देय मार में? आं धोक्रो आ शोव़म बाक्त, शां” दे लोव़ पवा बाक्त। मिनु नेल्लेमी सुर्ता पशा “परमप्रभुमी इं कली मार पवा” दे हिंमा बाक्त।
29 मेकोपुकीमी आन आफ याकूब आ खिं कनान रागी जाक्दीश्शा, मार मार दुम्मे, नेल्ल शोव़ङमे बाक्त।
30 मेकोपुकीमी “मेको रागी ङा ठेयब मुरुम आंइ कली ठेयब सेंदामी लोव़ पशा, आंइ कली आन रागी क्यारी पाइब सुइक्तु।
31 गोपुकीमी ‘गो ठीक पाइब बाक्नीकी, गो क्यारी पाइब मनकी।
32 गो १२ लोक्ब, आफ का आ तौ नकी। का मुल मबाक्ब, कान्छा कनान रागीम आफ नु बाक्ब’ दे माइक्तक।
33 मिनु मेको रागी ङा ठेयब मुरुम आंइ कली ‘गो दोपा तुइक्नुङा, गे ठीक मुर बाक्नीनी, दे इन लोक्ब का गो नु बाक्चा माल्ब। अरु चहिं अन्कालम जचा कली अन्न कुरशा, खिं लेश्शा लने। उत्पत्ती ४२:२४
34 मिनु इन लोक्ब कान्छा कली एक चाक्कीन। मेको नोले ला गेपुकी क्यारी पाइब मननी, दे तुइक्नुङ। मेना इन लोक्ब कली प्रोंइशा, लचा गेनुङ’ दे माइक्तीकी” दे आन आफ कली देंमा बाक्त।
35 मिनु नोले आन धोक्रो रोक्शा, नेल्लेमी आन थाप्शो क्येट आन धोक्रोमी थित्मे बाक्त। मिनु मेकोपुकी नु आन आफ मेको क्येट तशा, हिंमा बाक्त।
36 मिनु आन आफ याकूबमी “गे आं आल कली रोइक्ब बाक्नीनी। योसेफ लत। सिमियोन लत। मुल बेन्यामीन लाइक्चा माल्नीनी। एको नेल्ल आं कली श्येत गेचा कली बाक्ब” दे आ तौ आन कली देंमाक्त।
37 मिनु रूबेनमी “गो बेन्यामीन ठीक पा मलेत्ताक्ङ हना, आं तौ निक्शी आस कली सतीन” दे आ आफ कली मदा बाक्त।
38 मेकोमी “आं तौ गे नु लचा मगेनुङ। आ लोक्ब बेक्त, आ का ला बाक्ब। मेको कली लांमी मार मार दुम्ने चाप्ब। बेक्त हना, गेपुकीमी चां बोइश्शो आं कली ठेयब श्येत जपाइश्शा तुरसुम वोइक्चा माल्नीनी” दे याकूबम आ तौ आन कली माइक्मी बाक्त।