Genesis 39 in Sunwar

1 मेको इश्‍माएल जात ङा ग्‍याप्‍ब लेयबपुकीमी योसेफ कली इजीप्‍त रागी चाक्‍दीत्‍मे बाक्‍त। मिनु इजीप्‍त रागी ङा पिप आ नेल्‍ल क्‍येङा ठेयब गेय पाइब पोतीफरमी योसेफ कली ग्‍यबा बाक्‍त। उत्‍पत्ती ३७:२८,३६

2 मिनु परमप्रभु यावे योसेफ नु बाक्‍शो बाक्‍माक्‍त। योसेफ इजीप्‍त ङा होव़प आ खिंम बाक्‍मेनु, मार मार पवा, मेको नेल्‍ल रिम्‍शो दुम्‍शा लमाक्‍त। उत्‍पत्ती २६:२४

3 मिनु आ होव़पमी “परमप्रभु यावे योसेफ नु बाक्‍माक्‍त। मिनु योसेफमी मार मार पवा, मेको नेल्‍ल परमप्रभु यावेमी रिम्‍शो दुम्‍पदा बाक्‍त।” दे तुइक्‍ता बाक्‍त।

4 मिनु योसेफ पोतीफर आ ङोंइती शिशी तवा बाक्‍त। मिनु आ खिंमी गेय पवानु, आ ठेयब गेय पाइब सेला बाक्‍त। मिनु अर्को गेय पाइबपुकी कली अरेब यो सेला बाक्‍त। आ मारेइ मारेइ योसेफ कली कोव़पदा बाक्‍त।

5 मिनु पोतीफरमी योसेफ कली आ खिं ङा नेल्‍ल कोव़ब मुर सेलानु, परमप्रभु यावेमी योसेफ आ पर्बम मेको कली शुश आसीक गेवा बाक्‍त। पोतीफर आ खिंम मार मार बाक्‍मा, आ रूम मार मार ब्‍वारा, मेको नेल्‍ल कली परमप्रभु यावेमी आसीक गेवा बाक्‍त। उत्‍पत्ती ३०:२७

6 मोपा पोतीफरमी आ मार मार नेल्‍ल योसेफ आ गुइमी जिम्‍मा गेवा बाक्‍त। आ जचा ब्‍वचा ला आंमा कोव़ङा बाक्‍त। योसेफ आ रां नु कुल थम दारशो बाक्‍माक्‍त। उत्‍पत्ती ४३:३२

7 मिनु पोतीफर आ खिंमी बाक्‍मेनु, आ होव़पोक्ममी योसेफ कली दाक्‍शा, मेको नु बाक्‍चा मला बाक्‍त। मेको मीश मुरुम योसेफ कली “पिवो, गो नु बाक्‍को” दे मदा बाक्‍त।

8 योसेफमी “गो गे नु मबाक्‍नुङ। आं होव़पमी आ मार मार नेल्‍ल आं कली ‘कोव़ङो’ दे जिम्‍मा गेती।

9 आं कली आ खिं ङा नेल्‍ल क्‍येङा ठेयब सेल्‍ती। मार मार बाक्‍मा, नेल्‍ल जिम्‍मा गेती। इन कली चहिं आं कली मगेयी। मारदे हना गे आ मीश ननी। गो दोपा परमप्रभु आ ङोंइती मोदेंशो मरिम्‍शो पाप पने चाप्‍नुङा? गो मपाइनुङ?” दे मदा बाक्‍त। प्रस्‍थान २०:१४; लेवी १८:२०

10 मिनु मेको मीश मुरुमी नाक्‍त किंत किंत योसेफ कली लोव़ पशा “पिवो, गो नु बाक्‍को” दे मदा बाक्‍त। योसेफम चहिं मेको आ लोव़ मटिवा बाक्‍त।

11 मिनु काबु योसेफ आ गेय पचा कली पोतीफर आ खिंम बाक्‍माक्‍त। खिंम गेय पाइब मुर सुइ मबाक्‍मा बाक्‍त।

12 मिनु मेको मीश मुरुमी योसेफ आ फेक्‍शो वा ग्‍याइश्‍शा कीशा “गो नु बाक्‍को” देंमाक्‍त। मिनु योसेफ आ फेक्‍शो वा प्रोंइशा, खिं रे दोरशा लाङगा ग्रूमाक्‍त।

13 पोतीफर आ मीशेमी योसेफ आ फेक्‍शो वा आंम गुइमी प्रोंइशा वोइश्‍शा, खिं रे प्रोक्‍शो तशा,

14 खिं ङा मुर आन कली ब्रेश्‍शा “कोव़ङीन, पोतीफरमी एको हिब्रू मरिम्‍शो पपाइक्‍चा कली चाक्‍तु। एकोमी आं कली ग्‍याइक्‍ताक्‍यी ‘गो नु बाक्‍को’ दे माइक्‍ती। गो चहिं ठेयब सेंदामी वाइ ब्रेत्‍ती।

15 मिनु आं कली वाइ ब्रेश्‍शो तशा, आ वा प्रोंइशा प्रोक्‍त” दे माइक्‍मी बाक्‍त।

16 मिनु मेकोमी योसेफ आ फेक्‍शो वा आ नेक्‍था वोइश्‍शा, आ वोंइश मजाक्‍म सम्‍म रिम्‍दा बाक्‍त।

17 पोतीफर जाक्‍मेनु, आ मीशेमी “एको इन चाक्‍शो गेय पाइब हिब्रूमी आं कोठा ओव़शा ‘गो नु बाक्‍को’ देंत।

18 गो चहिं वाइ ब्रेत्‍ती। मिनु आ फेक्‍शो वा प्रोंइशा, खिं रे ग्रूशा प्रोक्‍त” दे मदा बाक्‍त।

19 मिनु आ होव़पमी आ मीश आ लोव़ नेंशा, चुरमाक्‍त।

20 योसेफ कली लाइश्‍शा, जेल्‍खानम चोक्‍पदा बाक्‍त। मेकेर पिप आ चोक्‍शो मुरपुकी यो बाक्‍मा बाक्‍त। मिनु योसेफ मेकोपुकी नु बाक्‍माक्‍त।

21 मिनु परमप्रभु यावेमी योसेफ कली वारच पशा, जेल्‍खान ङा कोव़ब कली “योसेफ रिम्‍शो मुर बाक्‍ब” दे तुइक्‍पदा बाक्‍त।

22 मिनु मेको कोव़ब मुरुमी योसेफ कली जेल्‍खानम चोक्‍शो मुर आन कली कोव़ब सेला बाक्‍त। मिनु मेकेर बाक्‍शो गेय नेल्‍ल योसेफमी पवा बाक्‍त।

23 मेको जेल्‍खान ङा कोव़ब मुरुमी योसेफ आ पशो यो मकोव़ङा बाक्‍त। मारदे हना परमप्रभु यावे मेको नु बाक्‍शो तुइक्‍ता बाक्‍त। मेको नेल्‍ल रिम्‍शो पाइब, दे थमा सुदा बाक्‍त। मिनु परमप्रभु यावे मेको नु बाक्‍मेनु, आ गेय नेल्‍ल रिम्‍शो दुम्‍माक्‍त।