Genesis 37 in Sunwar

1 याकूब आ आफ अर्को रागीम बाक्‍शो खोदेंशो पा याकूब यो कनान रागीम बाक्‍शो बाक्‍माक्‍त।

2 एको याकूब आ खिं ङा मुर आन कथा बाक्‍ब। योसेफ १७ बर्स दुम्‍शा आ लोक्‍ब आन क्‍यारश भेडा गोठ ङा गोठला बाक्‍माक्‍त। आ आफ आ मीश बिल्‍हाह नु जिल्‍पा आस तौ कली वारच पाइब बाक्‍माक्‍त। मिनु योसेफमी मेको आन मरिम्‍शो पशो आ आफ कली शोव़बाक्‍माक्‍‍त।

3 इस्राएलमी नेल्‍ल क्‍येङा योसेफ कली दाक्‍शो बाक्‍माक्‍त। मारदे हना मेकोमी खाल्‍पा दुम्‍शा थि‍माक्‍त। मिनु योसेफ कली दारशो फेक्‍तीके का फेरपदा बाक्‍त।

4 मिनु आ लोक्‍बपुकीमी “आफोम नेल्‍ल क्‍येङा योसेफ कली दाक्‍‍ताक्‍व” दे तुइश्‍शा, योसेफ कली मदाक्‍तमे बाक्‍त। मिनु योसेफ नु रिम्‍शो लोव़ यो मपामे बाक्‍त।

5 काबु नाक्‍दो योसेफमी ङोमु का तवा बाक्‍त। मिनु योसेफमी आ लोक्‍ब आन कली शेंदीमी बाक्‍त। मिनु मेकोपुकीमी ङोंइती क्‍येङा मदाक्‍तमे बाक्‍त।

6 योसेफमी मेको आन कली “गो सिनाक्‍दो ङोमु का ताता।

7 गो नेल्‍ल रूमी चेरब मुठा फ्रेंशा बाक्‍तय। मिनु आं मुठा बोक्‍शा राप्‍त। मिनु इन मुठापुकी एर ओंथ बाक्‍शा, आं मुठा कली सेउ पाम्‍तेक्‍मे” देंमाक्‍त।

8 आ लोक्‍बपुकीम “गे आंइ कली अरेब दुम्‍नेवे? आंइ कली हुकुम पाइब दुम्‍नेवे?” दे गाइश्‍शा देंमा बाक्‍त। मिनु योसेफ कली आ ङोमु नु आ देंशो आ पर्बम ङोंइती क्‍येङा मदाक्‍तमे बाक्‍त।

9 मिनु नोले योसेफम लेंशा अर्को ङोमु तवा बाक्‍त। मिनु आ लोक्‍ब आन कली “नेनीन, गो अर्को ङोमु का यो ताता। नां, तास्‍ला नु ११ ओटा सोरुलपुकीम आं कली सेउ पाइक्‍तीमी” देंमाक्‍त।

10 मेको ङोमु आ आफ नु आ लोक्‍ब आन कली शेंदीमीनु, आ आफोमी “मार ङोमु तवी? गो, इ ममा नु इ लोक्‍बपुकी इ ङोंइती थमा पा खुम्‍की पा बाप्‍चा माल्‍नीकी?” दे हुइक्‍ता बाक्‍त।

11 मिनु आ लोक्‍बपुकीमी योसेफ कली मदाक्‍तमे बाक्‍त। आ आफोम चहिं योसेफ आ देंशो मिम्‍शा आ थुंमी वोदा बाक्‍माक्‍त।

12 मिनु योसेफ आ लोक्‍बपुकी क्‍यारश भेडा योव़चा कली शेकेम माइश्‍शो रागीमी बाक्‍शो बाक्‍मा बाक्‍त। उत्‍पत्ती ३३:१८-१९

13 इस्राएलमी योसेफ कली “इ लोक्‍बपुकी शेकेम नेक्‍थान क्‍यारश भेडा योव़नीम। गो इ कली शेकेम सोइक्‍नन” देंमाक्‍त। मिनु योसेफम “लो, गो लाइनुङ” देंमाक्‍त।

14 मिनु “लावो, इ लोक्‍ब नु क्‍यारश भेडा नेल्‍ल रिम्‍शो बाक्‍मा कों, दोदेंशो पा बाक्‍मा, कोव़थ लावो। मिनु कोव़शा, शेंदी” देंमाक्‍त। मिनु योसेफ कली हेब्रोन बेंसी रे सोइक्‍तानु, शेकेम गे लमाक्‍त। उत्‍पत्ती ३५:२७

15 मिनु योसेफमी लेखमी मुर का ग्रुमाक्‍त। मिनु मेकोमी “गे मार मली?” दे हिल्‍लो पवा बाक्‍त।

16 मिनु योसेफमी “आं लोक्‍ब आन कली माल्‍थ गाक्‍ती। क्‍यारश भेडा ते योव़शो बाक्‍मा, तुइक्‍ती?” दे हिल्‍लो पवा बाक्‍त।

17 मिनु मेको मुरुमी “मेकोपुकी एकेर रे लाम्‍तेक्‍मे। ‘दोथान लचा’ देंशो नेंता” देंमाक्‍त। मिनु योसेफम आ लोक्‍ब आन कली दोथानम थिम्‍मी बाक्‍त।

18 मिनु आ लोक्‍बपुकीम योसेफ कली ङोन रे पिशो तशा, आन नेक्‍था जाक्‍चा क्‍येङा ङोंइती “मेको कली साइक्‍चा” दे सल्‍ला पामे बाक्‍त।

19 मिनु मेकोपुकीमी “कोव़ङीन, ङोमु ताइब जाक्‍त।

20 मुल मेको कली साइय्‍य। मिनु ढोडोङगा कामी पिक्‍य। मिनु ‘जन्‍तुम साइश्‍शा ब्‍वाप्‍तु’ देंय। आ ङोमु तशो गाप्‍बाक्‍म कों, मगाप्‍बाक्‍म तुइक्‍नय” देंमुमा बाक्‍त।

21 मिनु रूबेनमी मेको आन लोव़ नेंशा, मेको कली “मसाइय्‍य” देंमाक्‍त। मेकोमी “आ लोक्‍बपुकी रे प्रोंइनुङ” दे मिम्‍ता बाक्‍त। उत्‍पत्ती ४२:२२

22 रूबेनमी मेको आन कली “मसतीने। लेख ङा ढोडोङगा कामी ताइक्‍चा” दे माइक्‍मी बाक्‍त। मारदे हना योसेफ कली आन गुइ रे प्रोंइशा, आफ आ खिं सोइक्‍नुङ, दे मिम्‍ता बाक्‍त।

23 मिनु योसेफ आ लोक्‍ब आन बाक्‍तीके जाक्‍मेनु, मेकोपुकीमी आ नक फेरशो रिम्‍शो फेक्‍तीक वा प्रुइक्‍तमे बाक्‍त।

24 मिनु लेख ङा ढोडोङगा कामी पिक्‍गमे बाक्‍त। मेको ढोडोङगाम ब्‍वाक्‍कु मबाक्‍शो बाक्‍माक्‍त।

25 मिनु शोब्‍ले जथ निस्‍सीमा बाक्‍त। मिनु कोव़ङमेनु, गिलाद सहर रे इश्‍माएल जात ङा ग्‍याप्‍ब लेयब मुर नु आन दलओंठपुकी पिशो तामे बाक्‍त। मेको आन दलओंठपुकीमी मस्‍लापुकी, ख्रेक्‍तीकपुकी नु धूप इजीप्‍तमी लेयचा कली लाइक्‍बाक्‍मा बाक्‍त।

26 मिनु यहूदामी आ लोक्‍ब आन कली “इं लोक्‍ब साइश्‍शा, जोल पचा, मार रिम्‍शो दुम्‍बा ङा?

27 नेनीन, इश्‍माएल आ मुर आन कली लेयशा सोइक्‍तय, मसाइय्‍य। मारदे हना इं लोक्‍ब, इं आंम मुर बाक्‍ब” देंमाक्‍त। मिनु आ लोक्‍बपुकी बिस्‍समा बाक्‍त।

28 मिदयान ङा इश्‍माएली ग्‍याप्‍ब लेयब मुर पिना पिन बाक्‍मा बाक्‍त। मिनु योसेफ कली ढोडोङगा रे फेश्‍शा, इश्‍माएली आन कली चांदी के २० शेकेलम लेयङमे बाक्‍त। मिनु मेकोपुकीमी योसेफ कली इजीप्‍त लदमे बाक्‍त। शेकेल का ११.५ ग्राम, तोला खोदेंशो बाक्‍ब।उत्‍पत्ती २५:२; लेवी २७:१-८

29 मिनु रूबेनमी योसेफ प्रोंइचा कली मेको ढोडोङगा लशा कोव़ङानु, योसेफ कली मथित्‍थु, सुर्ता पा, आ वा खाक्‍गा बाक्‍त।

30 मिनु आ लोक्‍ब आन कली “मेको आल मबा। दोपा आ आफ आ ङोंइती जाक्‍दीत्‍नुङा?” दे लोव़ पवा बाक्‍त।

31 मिनु मेकोपुकीमी योसेफ आ फेक्‍शो वा लाइश्‍शा, पाठा का क्‍योरशा, आ फेक्‍शो वा हुशेम ख्रुम्‍मे बाक्‍त।

32 मिनु मेको फेरशो फेक्‍शो वा आन आफ कली लाइश्‍शा गेमे बाक्‍त। मेकोपुकीमी आन आफ कली “कोव़ङीन, एको वा थित्‍तक। इन तौ आ फेक्‍शो वा कों?” दे हिल्‍लो पामे बाक्‍त।

33 मिनु मेको वा तशा “आं तौ आ फेक्‍शो वा बाक्‍‍त, दे तुइक्‍ता बाक्‍त। मिनु ब्‍वाकी ङा जन्‍तुमी मेको कली साइश्‍शा, नेक्‍ग्‍मे बाक्‍त” दे ङाक्‍माक्‍त। उत्‍पत्ती ३७:२०

34 मिनु याकूबम आ फेक्‍शो वा खाक्‍शा, अरन्‍डी फेक्‍शा, शुश नाक्‍ती रोंका पवा बाक्‍त।

35 आ तमी तौ आन आफ कली लेम्‍थ जाक्‍मा बाक्‍त। मिनु याकूबमी “गो आं बेक्‍ची ना सम्‍म आं तौ कली रोंका पाइनुङ” दे लेम्‍चा मगेमी बाक्‍त। मोपा आ आफ योसेफ आ पर्बम ङाक्‍माक्‍त।

36 मिनु मेको मिदयान ङा मुरपुकीमी योसेफ कली इजीप्‍त रागी ङा फाराओ आ नेल्‍ल क्‍येङा ठेयब गेय पाइब पोतीफर कली लेयङमे बाक्‍त।