Genesis 30 in Sunwar
1 मिनु राहेलमी “आल मथीब बाक्ङा बाक्त” दे तुइश्शा, आ लोक्ब कली गेहे पवा बाक्त। मिनु याकूब कली “गे आं कली आल मगेतीनी हना, गो बेक्नुङ” देंमाक्त।
2 मिनु याकूबमी राहेल आ लोव़ आ पर्बम गाइश्शा “परमप्रभुमी इ कली आल मथीब सेल्तु। गो मेको क्येङा ठेयब नङा ङा?” देंमाक्त। भजन संग्रह १२७:३
3 मिनु राहेलमी “गो इन कली आं गेय पाइब बिल्हाह गेनुङ। मेकोमी आं कली आल थिचा माल्ब। मिनु आं के आल दुम्मल” देंमाक्त। उत्पत्ती १६:२
4 मिनु मेकोमी याकूब कली आ गेय पाइब बिल्हाह गेवा बाक्त। मिनु याकूब मेको नु इम्माक्त।
5 मिनु बिल्हाह कोव़ज कुरशा, तौ का थिमाक्त।
6 मिनु राहेलमी “परमप्रभुमी आं कली नाक्शा, आं पुंइशो नेंतु। मिनु आं कली तौ का गेती” देंमाक्त। मोपतीके आ नें दान वोदा बाक्त।
7 मिनु राहेल आ गेय पाइब बिल्हाहमी लेंशा कोव़ज कुरशा, अर्को तौ का थिमाक्त।
8 मिनु राहेलमी “गो आं लोक्ब नु परमप्रभु खोदेंशो पा जिशा ग्राती” देंमाक्त। मोपतीके मेको आ नें नाप्ताली वोदा बाक्त।
9 मिनु लेआमी “लेंशा आल मथीनुङ” दे मिम्शा, याकूब कली आ गेय पाइब जिल्पा गेवा बाक्त।
10 मिनु लेआ आ गेय पाइब जिल्पामी तौ का थिमाक्त।
11 मिनु लेआमी “रिम्शो दुम्त” दे आ नें गाद वोदा बाक्त।
12 मिनु लेआ आ गेय पाइब जिल्पामी अर्को तौ का नु थिमाक्त।
13 मिनु लेआमी “गो ग्येरसाक्यी। मारदे हना मीश मुरपुकीमी आं पर्बम ‘आसीक राइब बाक्ब’ देंनीम” देंमाक्त। मिनु आ तौ कली आशेर नें वोदा बाक्त।
14 मिनु काबु रूबेनमी चेरब रिक्ची ना आल थिपाइक्ब फल थिदा बाक्त। मिनु आ ममा लेआ कली गेवा बाक्त। मिनु राहेलमी लेआ कली “इ तौ आ चाक्शो फल आं कली का निक्शी गेयी” देंमाक्त।
15 मिनु मेकोमी “गे आं वोंइश आ थुं रोइक्चा ला ममाइ, आं तौमी चाक्शो फल यो रोइक्नेवे?” देंमाक्त। मिनु राहेलमी “इ तौ आ फल आ पर्बम मुलाक्दो याकूब इ खिंम बाक्ल” देंमाक्त।
16 मिनु नाक्नाक्दो याकूब रू रे जाक्मेनु, लेआम ग्रुम्थ लशा “गे आं खिंम बाक्चा माल्नीनी। गो आं तौ आ चाक्शो फल इन पर्बम थाप्ताक्ङ” देंमाक्त। मिनु मेको नाक्दो याकूब लेआ नु इम्माक्त।
17 मिनु परमप्रभुमी लेआ आ पुंइशो गेवा बाक्त। मिनु याकूब के ४ जना तौ थिशा नोले अर्को तौ का नु थिमाक्त।
18 मिनु लेआमी “परमप्रभुमी आं कली रिम्शो पाप्तु। मारदे हना गो आं गेय पाइब आं वोंइश कली गेता” देंमाक्त। मिनु आ नें इस्साकार वोदा बाक्त।
19 मिनु लेंशा कोव़ज कुरा बाक्त। मिनु ५ जना तौ थिशा यो, अर्को तौ का नु थिमाक्त।
20 मिनु “परमप्रभुमी आं कली रिम्शो पाप्तु। मुल आं वोंइश गो नु बाक्ब। मारदे हना गो ६ जना तौ थीतामी” देंमाक्त। मिनु मेको कली जबूलून नें वोदा बाक्त।
21 मिनु नोले तमी का यो थिमाक्त। मेको कली दीना नें वोदा बाक्त।
22 नोले परमप्रभुमी राहेल कली मिम्ता बाक्त। मिनु आ पुंइशो गेशा, आल थीब दुम्माक्त। १सामुएल १:१९
23 मिनु कोव़ज कुरशा, तौ का थिमाक्त। मिनु “परमप्रभुमी श्येत रे प्रोंइती” देंमाक्त। यसैया ४:१; लूका १:२५
24 मोपतीके आ नें योसेफ वोदा बाक्त। मिनु “परमप्रभु यावेमी आं कली अर्को तौ का नु गेयील” दे पुना बाक्त। उत्पत्ती ३५:१७-१९
25 मिनु राहेलमी योसेफ थिशा नोले याकूबमी लाबान कली “आं कली लचा गेयीनी। गो आं रागी, आं खिं लचा दाक्नुङ।
26 आं मीशपुकी, आं आलपुकी नु आं कली लचा गेकी। गो एको तचा कली इन गेय पाता। गो इन कली दोदेंशो रिम्शो गेय पङा, मेको गे तुइक्नीनी” देंमाक्त। उत्पत्ती २९:२०,३०; उत्पत्ती ३१:४३
27 मिनु लाबानमी “गे आं कली दाक्नेवे हना, इच्का नु बाक्को। मारदे हना गे एक बाक्शा, परमप्रभु यावेमी इ गेय पतीके आं कली आसीक गेती, दे तुइक्नुङ। उत्पत्ती ३९:५
28 गे मार माल्नेवे, मेको इ कली गेनुङ” दे मदा बाक्त।
29 मिनु याकूबमी “गो दोदेंशो गेय पङा, इन बी ब्यफ गिश दुम्मा, गे तुइक्नीनी।
30 आं जाक्ची ना का निक्शी बाक्तेक्मे, मुल शुश दुम्तेक्म। मिनु गो जाक्ङा रे परमप्रभु यावेमी इन कली आसीक गेप्तु। मिनु आं खिं गेना कोव़नुङा?” दे मदा बाक्त।
31 मिनु लाबानमी “गो मार गेचा माल्नुङा?” देंमेनु, याकूबमी “आं कली मारेइ गेचा ममाल्नीनी। आं देंशो पाइतीनी हना, गो लेंशा इन गोठला दुम्नुङ।
32 गो मुलाक्ती इन क्यारश भेडा नेल्ल कोव़थ लाइनुङ। मिनु पुत्ले पाङग्रे नेल्ल ग्रुंइनुङ। क्यारश भेडा रे यो क्येर नु पुत्ले पाङग्रे ग्रुंइनुङ। मेको आं गाल्च दुम्नीम।
33 मोदेंशो दुम्मेनु, आं ठीक पतीके तुइक्नीनी। तेको क्यारश आन दातेमी पुत्ले पाङग्रे मपाइश्शो नु पाठा आन दातेमी क्येर मबाक्मा, मेको आं खुइ पशो, दे तुइक्नीनी” दे मदा बाक्त।
34 मिनु लाबानमी “इ देंशो खोदेंशो दुम्ल” देंमाक्त।
35 मिनु मेको नाक्ती लाबानमी गोठ नेल्ल रे टाटे पाङग्रे क्यारश बोका नेल्ल नु पुत्ले पाङग्रे भेडा सांड ग्रुंइदा बाक्त। तेक तेको इच्का बुश नु क्येर बाक्मा, मेको योव़शा, आ तौ आन गुइमी गेवा बाक्त।
36 मिनु आ तौ आन गोठ नु याकूब आ गोठ नाक्त सां गाक्तीक लां ङोन वोदा बाक्त। याकूबम चहिं लाबान आ अरु क्यारश भेडा कोव़ङा बाक्त।
37 मिनु याकूबमी ब्वाकीम पिपल, कटुस नु अर्को रवा आन क्येख राशी जिक्शा, बुश रेखा ग्रुंइशा खेवा बाक्त।
38 मिनु मेको कोक्केपुकी क्यारश नु भेडा आन ब्वाक्कु तूतीकेमी वोदा बाक्त। मिनु ब्वाक्कु तूशा ङा मिन ब्वांइसीमानु,
39 मेको आ टाटे पाङग्रे कोक्के तशा, टाटे पाङग्रे पाठापुकी जरमेसीमा बाक्त।
40 याकूबमी मेको पाठा आन कली ग्रुंइशा फ्राशा आंम बगाल ङा गोठ सेला बाक्त। आंम क्यारश भेडा लाबान आ गोठम मवोदा बाक्त।
41 मिनु गेना बोल्यो नु रिम्शो बोकापुकी माल्ची ना बाक्मा नु ब्वाक्कु तूथ जाक्मा, मेना मेको कोक्केपुकी तूतीकेमी आन ङोंइती वोदा बाक्त। मिनु “कोक्के आन ङोंइती ब्वांइसीमल” देंमाक्त।
42 बगाल ङा मरिम्शो क्यारश भेडा जाक्तेक्म हना, कोक्के मवोदा बाक्त। मोदेंशो पा मरिम्शो क्यारश भेडा लाबान कली, रिम्शो बोल्यो चहिं याकूब के दुम्मा बाक्त।
43 मिनु याकूब शुश शोंप पाइश्शो दुम्शा, क्यारश भेडा, वाइलीम वाइल, दलओंठपुकी नु गधा शुश पाइश्शो दुम्माक्त।