Genesis 29 in Sunwar
1 मिनु याकूब लमे लमे, पूर्ब ङा मुर आन रागी जाक्दीम्माक्त।
2 मिनु कोव़ङानु, दिंम कामी इनार का तवा बाक्त। हुल सां भेडा मेकेर बाक्शो बाक्मा बाक्त। मारदे हना मेको आन कली मेको इनार ङा ब्वाक्कु तुंइबाक्मा बाक्त। मेको इनार चहिं ठेयब फुल्लुमी सुम्शो बाक्माक्त।
3 मिनु भेडा आन हुल नेल्ल मेकेर खुम्सीशा, गोठलापुकीमी मेको इनार ङा फुल्लु क्युक्शा, भेडा आन कली ब्वाक्कु तुंइशा, नोले लेंशा इनार सुम्शा वोइक्बाक्मा बाक्त।
4 मिनु याकूबमी मेको भेडा गोठला आन कली “आं लोक्बपुकी गे ते ङा बाक्नीनी?” दे हिल्लो पवा बाक्त। मिनु मेकोपुकीमी “हारान ङा बाक्नीकी” देंमा बाक्त।
5 मिनु याकूबमी “गे नाहोर आ तौ लाबान तुइक्नीनी?” दे हिल्लो पवा बाक्त। मिनु “गो तुइक्नीकी” दे लोव़ लेत्मे बाक्त। उत्पत्ती २४:१०,२४
6 याकूबमी “रिम्शो बाक्मे?” दे हिल्लो पवानु, मेकोपुकीमी “रिम्शो बाक्ब। हयु आ तमी राहेल आ भेडा नु जाक्त” देंमा बाक्त।
7 मिनु याकूबमी “चोक्ची मजाक्शो, भेडा आन कली ब्वाक्कु तुंइशा, जोपाइक्थ लतीन” देंमाक्त।
8 मिनु मेकोपुकीमी “हुल नेल्ल मखुम्सीथु, इनार ङा फुल्लु मयाक्थु, भेडा आन कली ब्वाक्कु तुंइने मचाप्नीकी” दे लोव़ लेत्मे बाक्त।
9 मिनु याकूब मेकोपुकी नु लोव़ पवा सम्म, राहेल आ आफ आ भेडा नु जाक्माक्त। मेको गोठाल्नी बाक्माक्त।
10 मिनु याकूबमी आ मामा, लाबान आ तमी राहेल तवा बाक्त। मिनु मेको कली ग्रुम्थ लशा, इनार ङा फुल्लु याक्ता बाक्त। मिनु आ मामा आ भेडा आन कली ब्वाक्कु तुंइदा बाक्त।
11 मिनु राहेल कली चुप पाइश्शा ङाक्माक्त।
12 राहेल कली “गो इ आफ आ बहिनी रेबेका आ तौ नङ” देंमाक्त। मिनु राहेल दोरशा लशा, आ आफ कली मेको लोव़ शेंदा बाक्त।
13 मिनु लाबानमी आ भानीच याकूब जाक्शो लोव़ नेंशा, दोरशा मेको कली ग्रुम्थ जाक्माक्त। मिनु मुप्शा, पुक्पु पा, आ खिं लदा बाक्त। मिनु याकूबमी लाबान कली शुश लोव़ शोव़ङा बाक्त।
14 मिनु लाबानमी “गे थमा पा आं खिं ङा मुर बाक्नेवे” देंमाक्त। मिनु याकूब महिना का खोदेंशो मेकेर बाक्माक्त।
15 मिनु लाबानमी याकूब कली “गे आं खिं ङा मुर बाक्ते हना यो, आं कली मो गेय पचा ममाल्नेवे। मार पुंइनेवे, देनो” दे हिल्लो पवा बाक्त।
16 लाबान आ तमी निक्शी बाक्सा बाक्त। आ ङोंइती जरमेशो आ नें लेआ नु कान्छी आ नें राहेल बाक्माक्त।
17 लेआ मदारशो बाक्माक्त। राहेल चहिं शुश दारशो बाक्माक्त।
18 याकूबम राहेल कली दाक्ता बाक्त। मिनु लाबान कली “इन कान्छी तमी राहेल आ पर्बम गो इन कली ७ बर्स गेय पाइनुङ” देंमाक्त।
19 मिनु लाबानमी “अर्को मुर कली गेचा क्येङा इ कली गेचा रिम्शो बाक्ब। गो नु गेय पा बाक्को” देंमाक्त।
20 मिनु याकूबम राहेल आ पर्बम ७ बर्स गेय पवा बाक्त। मेको ७ बर्स याकूब कली नाक्त का निक्शी खोदेंशो पा लमाक्त। मारदे हना राहेल कली शुश दाक्ता बाक्त।
21 मिनु याकूबमी लाबान कली “आं मीश गेयीनी। ७ बर्स दुम्माक्त। मेको नु ग्युंबे पाइनुङ” दे मदा बाक्त।
22 मिनु लाबानमी सहर ङा मुर नेल्ल ब्रेश्शा, भोज गेमी बाक्त।
23 मिनु नाक्नाक्दो लाबानमी आ तमी लेआ लाइश्शा, याकूब कली गेवा बाक्त। मिनु याकूब मेको नु इम्माक्त।
24 लाबानमी आ तमी लेआ कली आ गेय पाइब वाइलीम जिल्पा गेवा बाक्त।
25 मिनु याकूब सुनी कना बोक्शा, आ मीश कोव़ङानु, लेआ बाक्माक्त। मिनु गाइश्शा लाबान कली “गे आं कली मार पनी? गो इन कली राहेल आ पर्बम गेय मपङा ङा? मारदे आं कली ठगेनी?” दे मदा बाक्त।
26 मिनु लाबानमी “आंइ रागीमी जेठी क्येङा ङोंइती कान्छी मगेनीकी।
27 हप्ता का मेको नु बाक्को। नोले गो इ कली अर्को यो गेनन। गे अर्को ७ बर्स गेय पचा माल्नेवे” दे मदा बाक्त।
28 मिनु याकूब मेको बिश्शा, लेआ नु हप्ता का बाक्माक्त। मिनु नोले लाबानमी राहेल कली यो गेवा बाक्त।
29 लाबानमी आ तमी राहेल कली आ गेय पाइब वाइलीम बिल्हाह गेवा बाक्त।
30 मिनु याकूबम राहेल कली यो चाक्गा बाक्त। मिनु लेआ क्येङा राहेल कली शुश दाक्ता बाक्त। मिनु लाबान कली अर्को ७ बर्स गेय पवा बाक्त। लेवी १८:१८
31 मिनु परमप्रभु यावेमी याकूबमी लेआ कली मदाक्शो तशा “आल थीब दुम्ल” दे आसीक गेवा बाक्त। तन्न राहेल आल मथीब बाक्माक्त।
32 मिनु लेआ कोव़ज कुरशा, तौ का थिमाक्त। मेको आ नें रूबेन वोदा बाक्त। मारदे हना “परमप्रभु यावेमी आं श्येत ताप्तु। मुल रे आं वोंइशेम आं कली दाक्ब” देंमाक्त।
33 मिनु लेंशा कोव़ज कुरशा, तौ का नु थिमाक्त। मिनु “परमप्रभु यावेमी आं कली मदाक्शो तशा, अर्को तौ का यो गेती” देंशा, मेको आ नें सिमियोन वोदा बाक्त।
34 मिनु लेंशा कोव़ज कुरशा, अर्को तौ का थिमाक्त। मिनु “मुल रे आं वोंइश गो नु बाक्ब। मारदे हना गो तौ सां थीतामी” देंमाक्त। मोपतीके आ नें लेवी वोदा बाक्त।
35 मिनु लेंशा कोव़ज कुरशा, तौ का नु थिमाक्त। मिनु “गो परमप्रभु यावे कली ठेयब सेल्नुङ” दे मेको कली यहूदा नें वोदा बाक्त। मिनु आल थिचा नांइसे बाक्त।