Genesis 20 in Sunwar
1 मेकेर रे अब्राहाम दक्खिनम बाक्ब नेगेब गे लमाक्त। मिनु कादेश नु शुर आस दाते गेरार सहरमी अर्को रागी ङा मुर दुम्शा बाक्माक्त। उत्पत्ती १२:९; उत्पत्ती २६:१
2 मेकोमी मुर आन कली आ मीश, सारा आ पर्बम “आं समी बाक्ब” देंमाक्त। मिनु गेरार ङा पिप अबीमेलेकमी मेको कली ब्रथ सोइक्ता बाक्त।
3 मिनु अबीमेलेकम आ ङोमुमी परमप्रभु आ ङोंइती ग्रूशो तवा बाक्त। मिनु “गे मीश चाक्शो आ पर्बम बेक्चा माल्नेवे। मारदे हना मेको ग्युंबे पशो मीश मुर बाक्ब” देंमाक्त।
4 मिनु अबीमेलेकम मेको नु मइप्तीके “परमप्रभु, गे दोस मताइब मुर आन कली यो साइक्नीनी?
5 मेकोमी आं कली ‘आं समी बाक्ब’ मदेंम ङा? आ मीशेमी यो ‘आं लोक्ब बाक्ब’ देंत। गो रिम्शो थुं नु थमा पा मतुइक्तीकेमी चाक्ता” देंमाक्त।
6 मिनु परमप्रभुमी मेको आ ङोमुमी “गे रिम्शो थुंमी पाप्तीवी। गो तुइक्नुङ। मोपतीके गो इ कली मेको कली थिचा मगेथु, आं ङोंइती मरिम्शो पचा मगेङ।
7 मुल मेको मुर आ मीश लेत्तो। मारदे हना मेको आं लोव़ पाइब का बाक्ब। मेकोमी इ पर्बम पुंइब। मिनु गे ब्रोंइनेवे। गे आ मीश कली मलेत्ताक्वी हना, गे थमा पा बेक्चा माल्नेवे। इ मुर नेल्ल यो बेक्चा माल्नीमी, दे तुइक्तो” देंमाक्त। १राजा १३:६
8 मोपतीके अबीमेलेक सुनी कना बोक्शा, आ गेय पाइब नेल्ल आन कली ब्रेश्शा, आ ङोमु नेल्ल शोव़ङा बाक्त। मिनु मुर नेल्ल शुश हिंमा बाक्त।
9 मिनु अबीमेलेकम अब्राहाम कली यो ब्रेत्ता बाक्त। मिनु मेको कली “मारदे आंइ कली ओदेंशो पवी? गो नु आं रागी कली ओदेंशो मरिम्शो पपाइक्चा कली गो इ कली मार मरिम्शो पाइक्ना? गे मपचा ङा गेय पाप्तीवी।
10 गे मारदे ओदेंशो पचा मिम्ती?” देंमाक्त।
11 मिनु अब्राहाममी “थमा पा, एको रागी ङा मुरपुकी परमप्रभु कली मान पा महिंनीमी। मिनु आं मीश आ पर्बम आं कली साइक्नीम, दे मिम्ताक्ङ।
12 मेको थमा आं समी यो बाक्ब। आं आफ आ तमी बाक्ब। तन्न आं ममा आ तमी ममाइ। गो मेको कली चाक्ता। लेवी १८:९
13 मिनु परमप्रभुमी आं कली आं आफ आ खिं रे गाक्पाइय्यीनु, गो आं मीश कली ‘आं कली दाक्नेवे हना, गो ते ते जाक्दीस्सा, मेक मेक एको आं लोक्ब बाक्ब, देनो’ दे माइक्ता” देंमाक्त।
14 मिनु अबीमेलेकमी भेडापुकी, बी ब्यफ नु वाइलीम वाइल आन कली लाइश्शा, अब्राहाम कली गेवा बाक्त। आ मीश सारा यो लेत्ता बाक्त।
15 मिनु “नेनीन, आं रागीमी ते ते बाक्चा दाक्नेवे, मेक मेक बाक्ने चाप्नेवे” देंमाक्त।
16 मिनु सारा कली “नेनो, इ लोक्ब कली हजार का चांदी टुक्रा गेता। मेको इन कली इ मुर आन ङोंइती इ कली रिम्शो पचा कली गेता। मोपा नेल्ल आन ङोंइती इ कली ठीक पाता” देंमाक्त।
17 मिनु अब्राहामम अबीमेलेक आ पर्बम परमप्रभु कली पुना बाक्त। मिनु परमप्रभुमी अबीमेलेक, आ मीश नु आ गेय पाइब नेल्ल आन पर्बम आल मथितीक रोइ रे सापदा बाक्त।
18 मारदे हना परमप्रभु यावेमी अब्राहाम आ मीश सारा आ पर्बम अबीमेलेक आ खिं ङा मुर नेल्ल आन कली आल मथीब सेल्शो बाक्माक्त।