Genesis 18 in Sunwar
1 मिनु काबु नाक्ती अब्राहाम माम्रे आ ब्वाकीमी बाक्माक्त। आ ताम्बु आ लाप्चोमी निस्से बाक्त। मारदे हना शुश हुप्ता बाक्त। मेना परमप्रभु यावे मेको कली ग्रुम्थ जाक्माक्त।
2 मिनु मुर सां ग्रूशा, आ ङोंइती राप्शो तवा बाक्त। मेको आन कली तशा, छुल बोक्शा बाप्शा, सेउ पवा बाक्त। हिब्रू १३:२
3 मिनु अब्राहाममी “आं परमप्रभु, आं कली दाक्ताक्नी हना, इन गेय पाइब रे मो मलने।
4 इन खोइल चिक्चा कली ब्वाक्कु गेनन्नी। मिनु चिक्शा, रवा आगाम नांइसीन।
5 गो इन कली इच्का शोब्ले ब्रथ लाइनुङ। लाम्ज जचा माल्नीनी। मारदे हना गेपुकी इन गेय पाइब कली ग्रुम्थ जाक्शो बाक्नीनी” देंमाक्त। मिनु मेकोपुकीमी “इ देंशो खोदेंशो पावो” देंमा बाक्त।
6 मिनु अब्राहाम दोरशा, ताम्बुम लशा, सारा कली “गे रीब पा सेआह सां रिम्शो फस के शोब्ले चोवो” देंमाक्त। सेआह का ७ लिटर पुक्तीके बाक्ब।
7 अब्राहाम चहिं गोठमी दोरशा लशा, दोम्शो रिम्शो बाछा का चाक्शा क्योरपाइश्शा, गेय पाइब कली क्येपदा बाक्त।
8 मिनु दहि, दूध नु श्ये चाक्शा, मेको आन कली ख्रेत्तीमी बाक्त। मिनु मेकोपुकीमी जामेनु, अब्राहाम मेको आन नेक्था रवा आ पुंम राप्शा बाक्माक्त।
9 मिनु मेकोपुकीमी “इ मीश सारा ते बाक्मे?” दे हिल्लो पामे बाक्त। मिनु अब्राहाममी “ताम्बुम बाक्ब” देंमाक्त।
10 मिनु कामी “गो एकेर लेंशा माइक्थ जाक्नुङ। मेना इ मीशेमी तौ का थिशो बाक्ब” देंमाक्त। मिनु सारा ताम्बु आ लाप्चोम मेको लोव़ पाइब आ नोले ख्रुइश्शा बाक्शा, मेको लोव़ नेना बाक्त। उत्पत्ती १७:१९; रोमी ९:९
11 अब्राहाम नु सारा खाल्पा खाल्पी दुम्शो बाक्सा बाक्त। सारा आ रां ब्रोल्चा यो नुप्शो बाक्माक्त।
12 मोपतीके सारामी मेको लोव़ नेंशा “गो खाल्पी दुम्ती। आं वोंइश यो खाल्पा दुम्त। मिनु आल थीनुङा ङा?” दे रिस्से बाक्त। उत्पत्ती १७:१७; १पत्रुस ३:६
13 मिनु परमप्रभु यावेमी अब्राहाम कली “सारा मारदे ‘गो खाल्पी दुम्शा, आल थीनुङा ङा?’ दे रिस्से?
14 गो परमप्रभु यावे नङ। गो नेल्ल पने चाप्नुङ। गो माइक्थ लेश्शा जाक्ङानु, सारामी तौ थिशो बाक्ब” देंमाक्त। मत्ती १९:२६; लूका १:३७
15 सारामी चहिं “गो मरिस्सीङ” दे जोल पवा बाक्त। मारदे हना हिंमाक्त। तन्न मेकोमी “गे थमा पा रिस्साक्वे” देंमाक्त।
16 मिनु मेको मुर सां बोक्शा, सोदोम सहर गे लमा बाक्त। अब्राहाममी मेको आन कली आइक्ची सम्म चोव़थ लमाक्त।
17 मिनु परमप्रभु यावेमी “गो मार पचा चिक्तु, मेको मख्रुइक्थु अब्राहाम कली शेंनुङ। आमोस ३:७
18 अब्राहाम ठेयब नु बोल्यो रागी ङा मुर आन आफ दुम्ब। मिनु रागी नेल्ल ङा मुरपुकीमी मेको आ पर्बम आसीक ताइनीम। उत्पत्ती १२:३
19 गो अब्राहाम कली तुइक्नुङ, आ आल नु आ चच युइ आन कली परमप्रभु यावे आ लां गाक्पाइक्चा कली अरेब। मिनु मेकोपुकी परमप्रभु यावे आ लां खोइक्ब दुम्शा, ठीक नु रिम्शो पचा शेंसीशा पाइनीम। परमप्रभु यावेमी अब्राहाम कली मार लोव़ देंमे, मेको नेल्ल दुम्ल” देंमाक्त। ब्यवस्था ६:७; ब्यवस्था ३२:४६
20 मिनु परमप्रभु यावेमी “गो सोदोम नु गोमोररा सहर निक्शी आस पर्बम शुश मरिम्शो लोव़ नेंता। मारदे हना मेकेर ङा मुर आन मरिम्शो पशो शुश हिंचा ङा बाक्त। उत्पत्ती १९:१३
21 मुल गो कोव़थ यीनुङ। एको नेंशो लोव़ थमा बाक्म कों, जोल बाक्म, गो तुइक्नुङ” देंमाक्त।
22 मिनु परमप्रभु यावे आ स्वर्ग ङा गेय पाइब निक्शी सोदोम गे लसा बाक्त। अब्राहाम परमप्रभु यावे आ ङोंइती राप्शा बाक्माक्त।
23 मिनु अब्राहाम मेको आ नेक्था लशा “गे ठीक पाइब आन कली नु मरिम्शो पाइब आन कली खाल का ङा पा क्याम्नीनी? गन्ती १६:२२
24 मेको सहरमी ५० जना ठीक पाइब मुर बाक्तेक्म हना, सहर कली क्याम्नीनी? मेको ५० जना ठीक पाइब मुर आन पर्बम मेको सहर मप्रोंइनीनी?
25 ममाइ, गे मोदेंशो पा मक्याम्नीनी। गे ठीक पाइब नु मरिम्शो पाइब आन कली खाल का ङा पा मसाइक्नीनी। थमान, ठीक पाइब नु मरिम्शो मुर आन कली खाल का ङा मपाइनीनी। गे रागी रागी ङा निसाफ पाइब बाक्शा, ठीक निसाफ पाइनीनी” देंमाक्त। भजन संग्रह ८२:१; भजन संग्रह ९४:२
26 मिनु परमप्रभु यावेमी “सोदोम सहरम ५० जना ठीक पाइब मुर बाक्तेक्म हना, गो मेको आन पर्बम सहर मक्याम्नुङ” देंमाक्त। यसैया ६५:८; मत्ती २४:२२
27 मिनु अब्राहाममी “गो फुरक नु पुलु रे दुम्शो मुरुमी परमप्रभु नु लोव़ पाता।
28 मेको सहरम ४५ जना मुर ला ठीक पाइब बाक्तेक्म हना, गे मेको ४५ जना मुर, ५ जना मजाक्दीतीके सहर क्याम्नीनी?” दे हिल्लो पवा बाक्त। मिनु मेकोमी “गो मेकेर ४५ जना ठीक पाइब मुर थित्तामी हना, गो सहर मक्याम्नुङ” देंमाक्त।
29 मिनु अब्राहाममी लेंशा “४० जना ठीक पाइब बाक्तेक्म हना?” देंमेनु, मेकोमी “गो मेको ४० जना आन पर्बम यो सहर मक्याम्नुङ” देंमाक्त।
30 मिनु अब्राहाममी “परमप्रभु, मगाइक्तीने, गो चिनु लोव़ पाइनुङ। ३० जना ठीक पाइब मुर बाक्तेक्म हना?” देंमाक्त। मिनु परमप्रभुमी “३० जना बाक्तेक्म हना, मेको आन पर्बम यो मक्याम्नुङ” देंमाक्त।
31 मिनु अब्राहाममी लेंशा “गो परमप्रभु इन कली लेंशा लोव़ पाइनुङ, सहरमी २० जना ला ठीक पाइब मुर बाक्तेक्म हना?” देंमाक्त। मिनु मेकोमी “२० जना ठीक पाइब मुर बाक्तेक्म हना यो, मेको आन पर्बमी सहर मक्याम्नुङ” देंमाक्त।
32 मिनु अब्राहाममी “परमप्रभु, मगाइक्तीने। गो चिनु लोव़ हिल्लो पाइनुङ। १० जना ला ठीक पाइब मुर बाक्तेक्म हना?” देंमाक्त। मिनु मेकोमी “गो मेको १० जना ठीक पाइब आन पर्बम यो सहर मक्याम्नुङ” देंमाक्त। न्यायाधीस ६:३९
33 मिनु अब्राहाम नु लोव़ पने थुम्शा, परमप्रभु यावे आ लां लमाक्त। अब्राहाम आ बाक्तीके लेम्माक्त।