Genesis 11 in Sunwar

1 ङोंइती रागी नेल्‍ल ङा मुर लोव़ का ब्‍वाक्‍बाक्‍मा बाक्‍त।

2 मुरपुकी पूर्ब गे लना लन बाक्‍मानु, शिनार नें पाइश्‍शो रागीम ठेयब दिंम का थित्‍मे बाक्‍त। मिनु मेकेर खिं सेल्‍शा बाक्‍मा बाक्‍त।

3 मिनु मुरपुकीमी “लो, इंटा सेल्‍य। मिनु मीमी रिम्‍शो पा चोय” देंमा बाक्‍त। मिनु फुल्‍लु आ पा ङा इंटा नु हिलो आ पा ङा अल्‍कत्रा ग्रुंइदमे बाक्‍त।

4 मिनु नोले मेकोपुकीमी “गोपुकी इं कली सहर का सेल्‍सीय, ठेयब लाइश्‍शो सरीङ थिचा ङा खिं का सेल्‍य। इं नें ठेयब सेल्‍सीशा, इं मुरपुकी रागी नेल्‍लेमी मब्राथु बाक्‍य” देंमुमा बाक्‍त।

5 मिनु परमप्रभु यावे मेको मुरपुकीमी सेल्‍शो सहर नु सरीङ थिचशो ठेयब लाइश्‍शो खिं कोव़थ यिमाक्‍त। उत्‍पत्ती १८:२१; भजन संग्रह १४:२

6 मिनु परमप्रभु यावेमी “लो, मेको नेल्‍ल थुं का ङा मुर नमी। मेको नेल्‍ल लोव़ का ब्‍वाक्‍नीम। मेको आन नक गोशो गेय ला बाक्‍ब। मार मार मिम्‍त्‍मे, मेको नेल्‍ल पने चाप्‍नीम। प्रेरित २:१-११

7 मुल उइ लय। मेको आन पशो लोव़ खाल्‍शा पपाइय्‍य। मिनु कामी अर्को आ लोव़ मरुबल” देंमाक्‍त।

8 मोपा परमप्रभु यावेमी मुर आन कली नेल्‍ल रागीम फ्रादीमी बाक्‍त। मिनु मेकोपुकीमी सहर सेल्‍चा प्रोन्‍मे बाक्‍त। ब्‍यवस्‍था ३२:८; लूका १:५१

9 मोपतीके मेको सहर आ नें बाबेल वोदमे बाक्‍त। मारदे हना मेकेर रे परमप्रभु यावेमी रागी नेल्‍ल ङा मुर आन लोव़ खाल्‍दा बाक्‍त। मिनु परमप्रभु यावेमी मोपा मुर नेल्‍ल आन कली फ्रादीमी बाक्‍त।

10 शेम आ आ चच युइ सु सु बाक्‍मा बाक्‍त देंशा हना, शेम सहे का बर्स दुम्‍मेनु, अरपक्‍शाद आ आफ दुम्‍माक्‍त। मेना ब्‍वाक्‍कु बारशा सोव़शो बर्स निक्‍शी दुम्‍शो बाक्‍माक्‍त। १इतिहास १:२४-२७; लूका ३:३४-३६; उत्‍पत्ती १०:२१-२२

11 मिनु शेम अरपक्‍शाद थिशा नोले ५ सहे बर्स ब्रोंइमाक्‍त। अरु तमी तौ यो थि‍माक्‍त।

12 मिनु अरपक्‍शाद ३५ बर्स दुम्‍मेनु, शेलाह आ आफ दुम्‍माक्‍त।।

13 मिनु शेलाह थिशा नोले ४ सहे बर्स सां ब्रोंइमाक्‍त। अरु तमी तौ यो थि‍माक्‍त।

14 मिनु शेलाह ३० बर्स दुम्‍मेनु, एबेर थि‍माक्‍त।

15 मिनु शेलाह एबेर थिशा नोले ४ सहे बर्स सां ब्रोंइमाक्‍त। अरु तमी तौ यो थि‍माक्‍त।

16 मिनु एबेर ३४ बर्स दुम्‍मेनु, पेलेग आ आफ दुम्‍माक्‍त।

17 मिनु एबेर पेलेग थिशा नोले ४ सहे ३० बर्स ब्रोंइमाक्‍त। अरु तमी तौ यो थि‍माक्‍त।

18 मिनु पेलेग ३० बर्स दुम्‍मेनु, रेऊ आ आफ दुम्‍माक्‍त।

19 मिनु पेलेग रेऊ थिशा नोले सहे निक्‍शी ९ बर्स ब्रोंइमाक्‍त। अरु तमी तौ यो थि‍माक्‍त।

20 मिनु रेऊ ३२ बर्स दुम्‍मेनु, सेरूग आ आफ दुम्‍माक्‍त।

21 मिनु रेऊ सेरूग थिशा नोले, सहे निक्‍शी ७ बर्स ब्रोंइमाक्‍त। अरु तमी तौ यो थि‍माक्‍त।

22 मिनु सेरूग ३० बर्स दुम्‍मेनु, नाहोर आ आफ दुम्‍माक्‍त।

23 मिनु सेरूग नाहोर थिशा नोले सहे निक्‍शी बर्स ब्रोंइमाक्‍त। अरु तमी तौ यो थि‍माक्‍त।

24 मिनु नाहोर २९ बर्स दुम्‍मेनु, तेराह आ आफ दुम्‍माक्‍त।

25 मिनु नाहोर तेराह थिशा नोले सहे का १९ बर्स ब्रोंइमाक्‍त। अरु तमी तौ यो थि‍माक्‍त।

26 मिनु तेराह ७० बर्स दुम्‍मेनु, अब्राम, नाहोर नु हारान आन आफ दुम्‍माक्‍त।

27 तेराह आ चच युइ सु सु बाक्‍मा बाक्‍त देंशा हना, तेराह अब्राम, नाहोर नु हारान आन आफ दुम्‍माक्‍त। हारानमी लोत थि‍माक्‍त।

28 हारान चहिं आ आफ तेराह क्‍येङा ङोंइती आ जरमेशो कल्‍दी ङा ऊर सहरमी बेक्‍माक्‍त।

29 मिनु अब्राम नु नाहोर निम्‍फामी ग्‍युंबे पाम्‍से बाक्‍त। अब्राम आ मीश आ नें साराइ बाक्‍माक्‍त। नाहोर आ मीश आ नें मिल्‍का बाक्‍माक्‍त। मिल्‍का हारान आ तमी बाक्‍माक्‍त। हारान मिल्‍का नु यिस्‍का आस आफ बाक्‍माक्‍त। उत्‍पत्ती २२:२०

30 साराइ आल मथीब बाक्‍माक्‍त।

31 मिनु तेराहमी आ तौ अब्राम, आ चच लोत, हारान आ तौ, नु आ चाइमी, अब्राम आ मीश साराइ आन कली लाइश्‍शा, कल्‍दी रागी ङा ऊर रे कनान रागी लचा गोव़मे बाक्‍त। मिनु हारान माइश्‍शो सहर जाक्‍दीश्‍शा बाक्‍मा बाक्‍त। यहोसु २४:२; नेहेम्‍याह ९:७

32 तेराह सहे निक्‍शी ५ बर्स दुम्‍शा, हारान सहरम बेक्‍माक्‍त।