Galatians 4 in Sunwar
1 मारेइ मतुइक्ब आल हक ताइब दुम्त हना यो, मेको खिं ङा तौ बाक्त हना यो, गेय पाइब वाइल खोदेंशो मिम्सीब।
2 मेको मकोल्म सम्म ठेयब मुर आन गुइमी बाक्ब। आ आफोमी “मुल आ हक गेचा” मदेंम सम्म आ तचा ङा हक मताइब।
3 गोपुकी मेको खिं ङा आल खोदेंशो बाक्तय। कोल्शा इं हक मतशो सम्म गो एको रागी ङा सक्ति आन वाइल दुम्शो बाक्तय। गलाती ५:१; कलस्सी २:२०
4 मिनु नोले परमप्रभु यावेमी वोइश्शो नाक्त आ तौ कली सोइक्ताक्व। मेको आ तौ मीश मुर रे परमप्रभु यावे आ अरेशो लोव़मी जरमेसाक्व। मर्कूस १:१५; एफिसी १:१०
5 मेकोमी मुर दुम्शा, यहूदी आन पतीक पाइब आन कली प्रोंइशा, परमप्रभु यावे आ तमी तौ सेल्तीमी।
6 गो आ तमी तौ दुम्शोपुकी परमप्रभु यावेमी आ तौ आ सोक्त गेचा पुंइसाक्य। मेको सोक्तीमी “आब्बा, आं दाक्शो आफ” देंब। रोमी ८:१५
7 मोपतीके गो वाइलीम वाइल दुम्चा प्रोंइशा, परमप्रभु यावे आ तमी तौ दुम्शा, हक ताइब दुम्तय। रोमी ८:१६-१७
8 ङोंइती गे परमप्रभु यावे कली मतुइक्थु, देवी देवता आन कली सेउ पा, मेको आन वाइलीम वाइल दुम्तीनी।
9 मुल चहिं परमप्रभु यावे कली तुइक्ताक्नी। मिनु परमप्रभु यावेमी यो इन कली तुइक्ताक्व। मिनु मुल लेंशा ङोंइती पशो खोदेंशो पचा दाक्नीनी?
10 गेपुकीमी बार, औंसी, पूर्ने नु रीतु मानेनीनी। शुश मोदेंशो रिती थिती पाइनीनी देंशो नेंता। रोमी १४:५; कलस्सी २:१६,२०,२१
11 गो शुश श्येत पा येसु ख्रीस्त आ लोव़ शेंताक्न्नी। इन कली शेंशा श्येत ला जङा कों, दे मिम्ताक्ङ। २यूहन्ना ८
12 आं लोक्बपुकी, गो रिती थिती पचा प्रोंइशा, येसु ख्रीस्त कली थमा सुइक्ता। आं खोदेंशो पा थमा सुइक्चा मप्रोंइथु बाक्कीन, दे इन कली देंनुङ। साइ गेपुकी नु बाक्ङानु, गारशा बाक्तय। गेपुकीमी आं कली वारच पशो मिम्शा, मुल यो मप्रेंनुङ।
13 मेना गो रोइ पा, मचाप्थु यो येसु ख्रीस्त आ ग्येरपाइक्ब लोव़ शेंताक्न्नी। १कोरिन्थी २:३; प्रेरित १६:६
14 आं कली मोदेंशो रोइ पशो तशा ग्रांग्रा मदित्तीनी। मरिम्शो लोव़ यो मपाइय्यीनी। श्येत पा वारच पाइतीनी। परमप्रभु यावे आ स्वर्ग ङा गेय पाइब कली ब्रशो खोदेंशो पा मान पाइतीनी। ख्रीस्त येसु कली ब्रशो खोदेंशो पा ब्रतीनी।
15 मेना ग्येरसीशा बाक्तीनी। मुल इन ग्येरसीशो ते लाक्गा? मेना इन मिक्च फेश्शा, आं मिक्चीम केप्चा ङा दुम्तीनी। आं बेक्चा ङा गेपुकी बेक्चा ठीक दुम्तीनी।
16 मुल इन कली हुइश्शा, थमा लोव़ शेंदन्नीनु, आं कली मरिम्शो सुइक्नीनी?
17 नेनीने, दूली शेंबपुकीमी इन कली मिलो शिलो पा, येसु आ लां खोइक्चा प्रोंइपाइक्चा माल्नीम। मेकोपुकीमी इन कली मान पखु पा, आंम आन कली मान पपांइसीनीम। गलाती १:७
18 शेंब आन लोव़ नेंचा रिम्शो बाक्ब। गेपुकी नु बाक्ती हना यो, मबाक्ती हना यो, शेंब आन लोव़ नेंचा मप्रोनीन। तन्न शेंशो लोव़ थमा बाक्म कों दूली बाक्म, मेको रुप्चा माल्नीनी।
19 आं दाक्शो आलपुकी, मीश मुरुमी आल थिचामेनु, श्येत जाइनीमी। शुश खाइक्ब। आल थिचशो मीश मुरुमी श्येत जशा खाइश्शो खोदेंशो पा, गो इन कली मिम्शा, श्येत जाइनुङ। इन थुंमी ख्रीस्त बारल, दे मिम्शा, मोदेंशो पा आं थुं खाइक्ती। १कोरिन्थी ४:१५
20 गेपुकी नु काथा बाक्शा लोव़ पचा तङ हना, गिश रिम्शो दुम वा। गो इन कली तशा मार पचा दो पचा दुम्शो बाक्नुङ।
21 गे रिती थिती पचा दाक्बपुकी, अरेशो लोव़मी मार ब्रेक्शो बाक्बा, मेको तुइक्नीनी?
22 मार ब्रेक्शो बाक्ब देंशा हना, अब्राहाम आ तौ निक्शी बाक्ताक्स। का वाइलीम आ तौ बाक्त, का ग्युंबे पशो मीश आ तौ बाक्त, दे ब्रेक्शो बाक्ब। उत्पत्ती १६:१५; उत्पत्ती २१:२
23 वाइलीम आ तौ मुर आ दाक्शो पतीकेम जरमेशा ब्रोंइशो बाक्त। ग्युंबे पशो मीश आ तौ चहिं परमप्रभु यावेमी अब्राहाम कली गेशो लोव़ गाप्शा, जरमेशा ब्रोंइशो बाक्त। रोमी ९:७-९
24 अब्राहाम आ ग्युंबे पशो मीश नु आ वाइलीम मीशेमी कबल पशा लां निक्शी कोंइनीसी। लां का सीनै ङा लां बाक्ब। मेकोपुकी वाइलीम वाइल बाक्तेक्म। मारदे हना हागार माइश्शो वाइलीम आ चच युइ बाक्तेक्म। गलाती ५:१; रोमी ८:१५
25 हागार देंशो मार रुम्सीब देंशा हना, अराब रागी ङा सीनै डांडा रुम्सीब। सिनाक्त मुलाक्त यरूसलेममी बाक्बपुकीमी हागार आ लां खोइश्शा, रिती थिती पा वाइलीम वाइल दुम्शो बाक्नीम।
26 इर ङा यरूसलेम चहिं प्रोंइसीशो बाक्ब। मेको यरूसलेम कली इं ममा मिम्नय। हिब्रू १२:२२; प्रकाश २१:२
27 मारदे हना “ए गेनायो आल मथीब मीश मुर, कुम्सो पा ग्येरसो। गे आल मथिशो मुर बाक्ते हना यो, इ कली ममा देंब शुश दुम्नीम। ग्युंबे पा आल थिशो नेल्ल आन क्येङा गे मान पाइक्चा पुंइसीनेवे” दे ब्रेक्शो बाक्ब। यसैया ५४:१
28 आं लोक्बपुकी, इसहाक जरमेशो खोदेंशो पा गे परमप्रभु यावे आ गेशो लोव़ गाप्शा, आ तमी तौ दुम्तीनी।
29 मुर रे जरमेशोमी मेको सोक्त रे जरमेशो कली मदाक्थु हेला पा खेदा पाइब। मेको मोदेंशो मुल यो बाक्ब।
30 मिनु मार ब्रेक्शो बाक्त देंशो हना “वाइलीम आ तौ कली ग्रुंइशा खेरचा। मारदे हना वाइलीम आ तौ ग्युंबे पशो आ तौ नु हक मताइब” दे ब्रेक्शो बाक्ब। उत्पत्ती २१:१०
31 आं लोक्बपुकी, वाइलीम आ चच युइ मनय। ग्युंबे पशो मीश आ चच युइ नय, दे रुब्य।