Galatians 2 in Sunwar
1 यरूसलेममी केफास नु याकूब ग्रुम्शा, १४ बर्स नोले लेंशा, यरूसलेम लती। गो नु बारनाबास यो लत। तीतस कली यो लाइक्तस्कु। प्रेरित १५:१-२९; प्रेरित ४:३६
2 येसु ख्रीस्तमी यरूसलेमम बाक्ब सोइश्शोपुकी नु लोव़सी पथ लावो, दे तुइक्पाइक्तीके लशो नङ। मिनु जाक्दीश्शा, सोइश्शोपुकी नु अरु आन कली लां कोंइब दुम्शो आन कली खुप्शा, अर्को रागी ङा मुर आन कली मार मार शेंदुमी, मेको नेंपाइक्तामी। मारदे हना मेकोपुकीमी गोम शेंशो तुइक्चा माल्नीम। मतुइक्ताक्म हना, आं मिम्शो नु आन मिम्शो मगारब। मिनु आं देंशो मनेंनीम, दे मिम्शो नङ। मिनु मेको नेंपदुमीनु, आं देंशो ठीक लाक्तेक्म।
3 मारदे हना गो नु लशो ग्रीक ङा तीतस कली ख्रोइक्तीक चिनु ख्रोइक्पांइसो मदेंथु, ब्राम्तेक्म। प्रेरित १६:३; १कोरिन्थी ९:२१
4 तन्न मेकेर खुम्सीशा बाक्ब आन मतुइक्थु थमा सुइक्ब दुम्खु पा, दूली शेंब ब्वांइसाक्म। मोपा गोपुकी नु ब्वांइसीशा, आंइ थुं कोव़शा बाक्तेक्म। गोपुकी ख्रीस्त येसुमी यहूदी आन रिती थिती पचा प्रोंइशा बाक्तक। तन्न मेकोपुकीमी यहूदी आन रिती थितीम लेप्पाइक्चा बोल पाम्तेक्म।
5 येसु ख्रीस्त आ लोव़ थमा बाक्ब देंशा, मेको दूली शेंब आन लोव़ नेंशा, छिन का यो गु ब्रेश्शा मबाक्क। मिनु मोदेंशो पशोमी इन कली शेंशो ग्येरपाइक्ब लोव़ थमा बाक्ब, दे कोंइताक्क। गलाती ३:१
6 परमप्रभु यावेमी मुर आन कली ठेयब आइक्च मसेल्ब। मुर आन थुं नेल्ल तुइक्ब। मुल लां कोंइब दुम्शो आन कली मान पाइनुङमी। मेको लां कोंइबपुकीमी अर्को लोव़ शेंचा कली मतेम्देम।
7 मेकोपुकीमी आं कली परमप्रभु यावेमी अर्को रागी ङा मुर आन कली शेंथ सोइक्ताक्व, पत्रुस कली चहिं यहूदी आन कली शेंथ सोइक्ताक्व, दे रुप्तेक्म। एफिसी ३:१२
8 पत्रुस कली यहूदी आन कली शेंथ सोइक्ब नु आं कली अर्को रागी ङा मुर आन कली शेंथ सोइक्ब कानाइ बाक्ब, दे रुप्तेक्म।
9 गो थमा पा एको शेंतीक गेय कली योव़शो नङ, दे रुप्शा, याकूब, केफास नु यूहन्ना सांफामी बारनाबास नु आं कली “गो इं यहूदी आन कली शेंनीकी। गे निक्शी चहिं अर्को रागी ङा मुर आन कली शेंथ लसे” देंशा, ग्युरा गुइमी ग्याइश्शा, लोव़सी गारपाइक्तेक्म। यूहन्ना १:४२
10 मिनु दोपा शेंचा, मार शेंचा, दे मारेइ मदेंम। मथीब आन कली शिशी पाइक्चा ला देंतेक्म। मेको आन लोव़ टिशा, शुश आन कली शिशी पाइक्तामी। प्रेरित ११:२९-३०; २कोरिन्थी ८:९
11 काबु केफास एन्टीओकमी जाक्त। मिनु ग्रुम्स्कुनु हुइक्ताक्ङ। मारदे हना आ पशो तशा आं थुं मनुङ।
12 ङोंइती मेकोमी अर्को रागी ङा थमा सुइक्ब नु काथा जशा, नोले याकूबमी सोइश्शो वारच का निक्शी जाक्मा रे यहूदीपुकी नु ला जचा गोप्तु। मारदे हना यहूदी जात ङा थमा सुइक्बपुकीमी आ कली मोदेंशो पा जशो तशा, मरिम्शो सुइक्नीम, आ लोव़ यो मनेंनीम, दे हिंशा मो पाप्तु। प्रेरित ११:२-३
13 मोदेंशो पाइब आ ला ममाइ। यहूदी थमा सुइक्ब नेल्लेमी दिल्शा, जखु पा कोंइताक्म। बारनाबासमी यो आन पशो खोदेंशो पचा गोप्तु।
14 मिनु मेको आन मोदेंशो पशो चहिं ख्रीस्त आ लोव़ नु मगारब देंती। मोपतीके मेको आन कली खुप्शा, केफास कली “गे यहूदी नवे। तन्न इं यहूदी बुद पा आन पतीके पचा प्रोंइशा, अर्को रागी ङा मुर खोदेंशो दुम्ते। मोपतीके अर्को रागी ङा मुर आन कली इं यहूदी रिती थिती पपाइक्चा दुम्बा?
15 गोपुकी यहूदी नय। अर्को रागी ङा मुरपुकीमी परमप्रभु यावे कली मतुइक्नीमी। आ अरेशो लोव़ मतुइक्थु, मटीनीम। गो मोदेंशो मनय।
16 इं यहूदी रिती थिती पतीके ठीक मदुम्नय। ख्रीस्त येसु कली थमा सुइक्तीके ठीक दुम्नय, दे रुप्तय। मोपतीके इं यहूदी रिती थिती पचा प्रोंइशा, ख्रीस्त येसु कली थमा सुइक्तय। गो लेंशा देंनुङ, रिती थिती पतीके सुइ ठीक मदुम्नीम। परमप्रभु यावेमी मुर आन कली येसु ख्रीस्त कली थमा सुइश्शो तशा, ठीक दुम्पाइक्ब। रोमी ३:२०,२८; एफिसी २:८
17 गो यहूदी बाक्तय हना यो, येसु ख्रीस्त कली थमा सुइक्तीके ठीक दुम्तय। मोपान अर्को रागी ङा मुर खोदेंशो दुम्तय। मिनु येसु ख्रीस्तमी मुर आन कली पापी सेल्शा, पाप बारपाइक्ब, दे मिम्चा ङा? मोदेंशो ममिम्चा।
18 गो रिती थिती पचा प्रोंइता। मुल लेंशा रिती थिती पशा, ठीक दुम्चा माल्ता हना, गो थमान परमप्रभु यावे आ लोव़ मटीब दुम्नुङ, दे रुप्ता।
19 गो यहूदी आन पतीके आन पर्बम बेक्शो मुर दुम्ती। ख्रीस्त नु काथा शीम कांटी थोक्शा, क्याइश्शा साइक्चा पुंइसाक्यी। मुल गो परमप्रभु यावे आ दाक्शो पा ब्रोंइनुङ।
20 तन्न गो मब्रोंइनुङ। ख्रीस्त आं आगामी ब्रोंइब। तन्न आं मुल ब्रोंइतीके गो परमप्रभु यावे आ तौ कली थमा सुइश्शा ब्रोंइनुङ। मेकोमी आं कली शुश दाक्शा, आं पशो पाप आ पर्बम साइक्चा पुंइसाक्व। यूहन्ना १७:२३; प्रेरित १:४
21 परमप्रभु यावेमी मो गेशो शिशी खेर मसोइक्नुङ। यहूदी आन पतीके पाप रे ब्रोंइसीब हना, ख्रीस्त साइक्चा पुंइसीशा बेक्शो शोर गाक्शो मदुम्बा ङा?” दे केफास नु मेकेर देल्शा बाक्ब आन कली माइक्तामी।