Ezra 5 in Sunwar
1 मिनु परमप्रभु यावे आ लोव़ पाइब हाग्गै नु इददो आ तौ जकरियामी यहूदा नु यरूसलेममी बाक्ब यहूदी आन कली इस्राएली आन परमप्रभु आ देंशो लोव़ पाम्ताक्स। हाग्गै १:१; जकरिया १:१
2 मिनु शाल्तीएल आ तौ जेरूब-बाबेल नु योसादाक आ तौ येशुआमी यरूसलेममी परमप्रभु आ खिं लेंशा सेल्चा गोम्सेनु, परमप्रभु यावे आ लोव़ पाइबपुकीमी यो मेको आन कली वारच पाम्तेक्म।
3 मिनु युफ्रेटीस आइक्ची हांबु ङा रागीम सासन पाइब तत्तेनाइ, शेथार-बोजेनाइ नु मेको नु बाक्बपुकी रीब पा यहूदी आन बाक्तीकेम जाक्शा “एको खिं लेंशा सेल्चा नु थुम्चा कली इन कली सुम अधिकार गेवा?” देंतेक्म।
4 मिनु मेकोपुकीमी मेको खिं सेल्ब आन नें यो पुंइतेक्म।
5 तन्न परमप्रभुमी यहूदी आन खाल्पा आन कली वारच पाप्तु। मिनु मेकोपुकी पिप दारा आ बाक्तीकेम आन ब्रेक्स जाक्दीश्शा, पिपमी मार देंबा, मेको लोव़ मनेन्मे सम्म, मेको गेय तेक्ने मचबेम। ब्यवस्था ११:१२; १राजा ८:२९
6 युफ्रेटीस आइक्ची हांबु ङा रागी कली हुकुम पाइब, तत्तेनाइ, शेथार-बोजेनाइ नु मेको नु बाक्ब सोइश्शोपुकीमी पिप दारा कली ब्रेक्स का ब्रेक्शा सोइश्शो बाक्तेक्म। मेको ब्रेक्स एको बाक्ब।
7 मेको आन सोइश्शो ब्रेक्समी मार ब्रेक्शो बाक्त देंशा हना “पिप दारा इन थुं नाइश्शा रिम्शो बाक्कीन।
8 पिप, इन कली लोव़ का तुइक्पाइक्चा दाक्नीकी। मार लोव़ तुइक्पाइक्चा दाक्नीकी देंशा हना, गो यहूदा रागीमी ठेयब परमप्रभु आ खिं बाक्तीक लाइतक। मेको ठेयब ख्रोइश्शो फुल्लुमी सेल्नीम। आ गारो तार शी वोइक्ने थुम्तेक्म। शुश गेय पा, रीब पा सेल्ना सेल्न बाक्नीम” दे ब्रेक्शो बाक्त।
9 मिनु मेको खाल्पा आन कली “इन कली एको खिं लेंशा सेल्चा नु थुम्चा कली सुम अधिकार गेवा? दे हिल्लो पाइतक।
10 मिनु इन कली ब्रेक्चा नु तुइक्पाइक्चा कली मेको आन ठेयब मुर आन नें यो हिल्लो पाइतक।
11 तन्न मेकोपुकीमी ‘गो सरीङ नु रागी ङा परमप्रभु आ गेय पाइब नकी। मिनु शुश बर्स ङोंइती सेल्शो खिं लेंशा सेल्ना सेल्न बाक्नीकी। मेको ङोंइती ङा खिं इस्राएल ङा ठेयब पिप कामी सेल्शो बाक्त।
12 तन्न आंइ किकी पिपीमी स्वर्ग ङा परमप्रभु कली चुरपाइश्शो बाक्तेक्म। मिनु मेकोमी मेको आन कली बेबीलोन ङा कल्दी आन पिप नेबुकदनेसर आ गुइमी गेशो बाक्त। मिनु मेको पिपमी एको खिं कली प्रेश्शो बाक्त। मुर आन कली ग्याइश्शा बेबीलोन रागीमी लाइश्शो बाक्त। २राजा २४:१०-१४; २राजा २५:९
13 तन्न बेबीलोन ङा पिप कोरेसमी आ सासन पशो ङोंइती ङा बर्समी एको परमप्रभु आ खिं लेंशा सेल्चा कली हुकुम गेशो लोव़ ब्रेक्शा ग्रुंइशो बाक्त। एज्रा १:१-२
14 नेबुकदनेसरमी यरूसलेम ङा सुन नु चांदी के बोसपुकी परमप्रभु आ खिं रे लाइश्शा बेबीलोन ङा मन्दीरम वोइश्शो बाक्त। मिनु पिप कोरेसमी मेको बोसपुकी बेबीलोन ङा मन्दीर रे ग्रुंइशा शेश-बस्सार कली गेप्तु। पिप कोरेसमी शेश-बस्सार कली सासन पचा कली योव़शो बाक्त’। एज्रा १:७-८
15 मिनु मेको कली ‘एको बोसपुकी लाइश्शा यरूसलेम ङा परमप्रभु आ खिंमी वोतो’ देंत। मिनु परमप्रभु आ खिं ङोंइती आ बाक्तीक उइ लेंशा सेल्चा माल्नीम” दे माइक्तु।
16 मिनु मेको शेश-बस्सार जाक्शा, यरूसलेममी परमप्रभु आ खिं आ जग वोइक्तु। मेना रे मुल सम्म एको लेंशा सेल्ना सेल्न बाक्नीम। मिनु मेको मुल सम्म सेल्ने मथुम्शो बाक्ब।
17 मोपतीके मुल पिप, गे दाक्नीनी हना, बेबीलोन ङा पिप आन पालामी मार मार दुम्शो बाक्मे, मेको ब्रेक्स वोइक्तीकेमी माल्पतीन। मिनु पिप कोरेसमी यरूसलेममी परमप्रभु आ खिं लेंशा सेल्चा कली हुकुम पशो लोव़ ब्रेक्शा ग्रुंइशो बाक्म कों मबाक्म? मिनु मेको आ पर्बम इन दाक्शो मार बाक्बा, मेको आंइ कली तुइक्पतीन, दे ब्रेक्शो बाक्त। एज्रा ८:३६