Ezekiel 39 in Sunwar
1 मिनु परमप्रभु यावेमी आं कली “ए मुर, गोग आ मुर आन कली आं लोव़ पावो। मिनु परमप्रभु, परमप्रभु यावेमी इ कली ‘गो इ कली लोव़ का पचा माल्नुङ। गे मेशेक नु तूबल ङा सासन पाइब बाक्नेवे। इजीकीएल ३८:२
2 गो इ कली हिरशा, ग्येत्थ गे सोइक्नन। गो इ कली ङोन उत्तर रे इस्राएल ङा पहाड गे सोइक्नन।
3 गो इ पेरा गुइम बाक्शो लिब्रा तुप्शा तोक्नुङ। मिनु इ ग्युरा गुइम बाक्शो ब्रा तोक्नुङ।
4 गे इस्राएल ङा पहाडमीन साइक्चा पुंइसीनेवे। इ लडाइ पाइब नेल्ल नु गे नु बाक्शो मुर नेल्ल मेकेर साइक्चा पुंइसीनीम। गो इ कली चिक्ब नु ब्वाकी ङा जन्तु आन ब्वतीक सेल्नुङ।
5 गे दिंमम गोल्नेवे। मारदे हना गो एको लोव़ पाता’ देंत।
6 गो मागोग ङा मुर नु समुन्द्र आ नेक्था रिम्शो पा बाक्शो आन तार मी सोइक्नुङ। मिनु मेकोपुकीम गोन परमप्रभु यावे नङ, दे तुइक्नीम।
7 गो आं नें आं मुर इस्राएली आन दातेम तुइक्पाइक्नुङमी। मिनु आं नें कली मरिम्शो सेल्चा मगेनुङ। मिनु रागी रागी ङा मुरपुकीम गोन परमप्रभु यावे, इस्राएली आन बाक्शो परमप्रभु नङ, दे तुइक्नीम।
8 मेको थमा पा दुम्ब। मेको थमा पा जाक्ब। आं देंशो नाक्ती मेकोन बाक्ब” दे परमप्रभु, परमप्रभु यावेमी देंत।
9 मिनु परमप्रभु यावेमी “ले इस्राएल ङा सहरम बाक्ब मुरपुकीमी या, आइक्च नु ठेयब तेक्तीके, लिब्रा नु ब्रा, कोक्के नु तूतीके नेल्ल खुप्शा चोइनीम। मेकोपुकीमी मेको ७ बर्स सम्म चोइनीम। यसैया ९:४
10 मेकोपुकीम रू रे शी खुप्चा ममाल्नीम। ब्वाकी ङा रवा तिम्चा ममाल्नीम। मारदे हना मेकोपुकीम मेको यामीन आन मी मुइक्नीम। मेकोपुकीम आन मार मार ग्रुंइशा लाइक्ब आन के मार मार ग्रुंइशा चाक्नीम। आन कली रोइक्ब आन कली रोइक्नीम” दे परमप्रभु, परमप्रभु यावेमी देंत। येरमीया ३०:१६
11 मिनु परमप्रभु यावेमी “मेको नाक्ती गो गोग आ मुर आन कली इस्राएल रागीम तुरस का गेनुङ। मेको इस्राएल ङा समुन्द्र आ पूर्ब गे मुर आन लतीक बेंसी ङा लांम बाक्ब। मेकेर गोग आ लडाइ पाइब नु मेको आन कली वारच पाइब हुल नेल्ल थिम्चा पुंइसीनीम। मोपतीके मेको बाक्तीक कली हामोन-गोग आ बेंसी देंनीम।
12 इस्राएल आ खिं ङा मुरपुकीम मेको आन कली ७ महिना सम्मन थिम्ना थिम्न बाक्नीम। मिनु मोपा रागी कली ग्रांग्रा मदिशो सेल्नीम।
13 मिनु रागी ङा मुर नेल्लेमी मेको आन कली थिम्नीम। गो आं सक्ति कोंइदु नाक्ती मेको आन कली ठेयब मिम्तीक का दुम्ब।
14 मेको रागी ग्रांग्रा मदिशो सेल्चा कली मुर वोइक्नीम। मेकोपुकीम नाक्त किंत किंत कोव़शा माल्शा, थिश्शा थिम्नीम। मिनु आन माल्तीक गेय ७ महिना सम्म पचा माल्नीम।
15 मेकोपुकी रागी आ एर ओंथ नेल्ल लमानु, सुइमी मुर आन रुश का थित्तेक्म हना, मेकेर चिन्ड वोइक्चा माल्बाक्तेक्म। मिनु तुरस दोइबपुकीम मेको कली हामोन-गोग ङा बेंसीम लाइश्शा, थिम्बाक्तेक्म।
16 मेकेर हामोनाह देंशो सहर का यो बाक्ब। मोपा मेकोपुकीम रागी कली ग्रांग्रा मदिशो सेल्नीम” दे परमप्रभु यावेम देंत। हामोनाह आ अर्थ “ठेयब हुल” देंशो बाक्ब।
17 मिनु परमप्रभु, परमप्रभु यावेमी “ए मुर, नेल्ल खाल ङा चिक्ब नु ब्वाकी ङा जन्तु नेल्ल आन कली ‘एर ओंथ नेल्ल रे जाक्कीन। गो इस्राएल ङा पहाडम इन कली ठेयब चढ़ेतीक भोज का सेल्नुङ। गेपुकीम मेकेर श्ये ब्वाइनीनी। मिनु हुश तूनीनी। प्रकाश १९:१७-१८
18 गेपुकीम शुश सक्ति पाइश्शो मुर आन श्ये ब्वाइनीनी। मिनु रागी ङा पिप आन सासन पाइब, बाशान ङा सांड, पाठा, बोका नु ब्यफ आन हुश तूनीनी।
19 गो इन कली चढ़ेतीक भोज का गेङानु, गे रूथ्री बोंसो ब्वने चाप्नीनी। गे मदुक्नी सम्म हुश तूने चाप्नीनी।
20 गेपुकी आं भोजम शारा, बग्गी ङोइक्ब, सक्ति पाइश्शो मुर नु नेल्ल खाल ङा लडाइ पाइब ब्वशा रूनीनी’ ” दे परमप्रभु, परमप्रभु यावेमी देंत।
21 मिनु परमप्रभु, परमप्रभु यावेमी “गो रागी रागी ङा मुर आन ङोंइती आं सक्ति कोंइनुङ। मिनु रागी रागी नेल्लेम आं निसाफ पशो ताइनीम। आं सजाइ गेशो ताइनीम।
22 मिनु मेको नाक्त रे इस्राएल आ खिं ङा मुरपुकीम गोन परमप्रभु यावे, मेको आन परमप्रभु नङ, दे तुइक्नीम।
23 मिनु रागी रागी ङा मुरपुकीम इस्राएल आ खिं ङा मुर आन मरिम्शो पतीके ग्याइश्शा लाइक्चा पुंइसीशो बाक्तेक्म, दे तुइक्नीम। मारदे हना मेकोपुकीम आं कली मरिम्शो पाम्तेक्म। मोपतीके गो आं कुल मेको आन रे ख्रुइक्ताक्ङ। मिनु मेको आन कली आन जोरी सत्रु आन गुइम गेतामी। मिनु मेको नेल्ल तरवारम साइक्चा पुंइसाक्म। यसैया ५४:८
24 मेको आन ग्रांग्रा दिशो नु आन हेंथे पशो आ पर्बम गो मेको आन कली सजाइ गेतामी। मिनु गो आं कुल मेको आन रे ख्रुइक्ताक्ङ” देंत।
25 मोपतीके परमप्रभु, परमप्रभु यावेमी “गो याकूब आ खिं ङा मुर आन कली ङोंइती ङा खोदेंशो पा रिम्शो सेल्नुङ। मिनु इस्राएल आ खिं ङा मुर नेल्ल आन कली शिशी पाइक्नुङमी। गो आं का ला बाक्शो नें आ पर्बम रुश पाइनुङ।
26 मेकोपुकी रिम्शो पा महिंथु आन रागीम बाक्ची ना, आन मुने नु आं कली मरिम्शो पशो नेल्ल प्रेंनीम।
27 मिनु गो मेको आन कली रागी रागी ङा मुर आन दाते रे चाक्नुङमी। मिनु मेको आन कली आन जोरी सत्रु आन रागी रे खुप्नुङमी। मिनु गो शुश रागी ङा मुर आन ङोंइती मेको आन रे पा गो का ला परमप्रभु नङ, दे कोंइनुङमी।
28 मेना मेकोपुकीम गोन परमप्रभु यावे, आन परमप्रभु नङ, दे तुइक्नीम। मारदे हना गो मेको आन कली रागी रागी ङा मुर आन दातेम ग्याइश्शा लाइक्पाइक्तामी। मिनु का यो मजाम्चा ङा पा खुप्शा आन रागीम चाक्नुङमी।
29 मुल रे गो आं कुल मेको आन ङोंइती रे गेनायो मख्रुइक्नुङ। मारदे हना गो आं सोक्त इस्राएल आ खिं ङा मुर आन तार मोइक्नुङ” दे परमप्रभु, परमप्रभु यावेमी देंत। इजीकीएल ३६:२६-२७; योएल ३:१