Ezekiel 38 in Sunwar
1 परमप्रभु यावेमी आं कली लोव़ पाप्तु।
2 मार लोव़ पाप्तु देंशा हना “ए मुर, मागोग रागी ङा ठेयब मुर, गोग आ बाक्तीक लावो। मेशेक नु तूबल ङा सासन पाइब कली आं लोव़ पावो। इजीकीएल ३९:६; इजीकीएल २७:१३; इजीकीएल ३२:२६; उत्पत्ती १०:२
3 मिनु परमप्रभु, परमप्रभु यावेमी मेको कली ‘ए मेशेक नु तूबल ङा सासन पाइब गोग, गो इ कली लोव़ का पाइनुङ।
4 गो इ कली हिरनुङ। गो इ शांपेम बोल्सी ब्वेक्नुङ। गो इ कली, इ लडाइ पाइब नेल्ल, इ शारा नु इ शारा ङोइक्ब, या कुरब नेल्ल आन ग्रुंइनुङ। ठेयब नु आइक्च तेक्तीक कुरब, आन तरवार शेशा बाक्नीम।
5 पारसी, एथीयोपीया नु पूत ङा मुरपुकी, मेकोपुकी नु बाक्नीम। मिनु मेको नेल्लेम आन तेक्तीक शेश्शा, लडाइ ङा ताकी गुक्शो बाक्नीम।
6 गोमेर नु आ लडाइ पाइब नेल्ल, उत्तर ङा बेथ-तोगारमाह नु आ लडाइ पाइब नेल्ले शुश मुरपुकी गे नु बाक्शो बाक्नीम। इजीकीएल २७:१४
7 गे सासीशा बाक्को। मिनु गे नु गारशा लडाइ पचा कली जाक्शो लडाइ पाइब नेल्ल आन कली सासीशा बाक्पतो। मिनु गे मेको नेल्ल आन ठेयब मुर दुम्शा, सासीशा बाक्को।
8 शुश नाक्त नोले लडाइ पचा कली इन कली ब्रेत्नीम। गेपुकीम लडाइम श्येत्थ दुम्शा लेंशा सेल्शो रागी कली लडाइ तोइनीनी। मेको मुर शुश रागी रे खुप्शा, इस्राएल ङा पहाडम चाक्शो बाक्नीम। मेकेर शुश बर्स रे मुर मबाक्म। मेकोपुकी रागी रागी रे चाक्शो बाक्तेक्म। मिनु मुल मेको नेल्ल मारेइ मदुम्थु रिम्शो पा बाक्शो बाक्नीम।
9 गे फश गिवार खोदेंशो पा बारचा माल्नेवे। गे गोस्स खोदेंशो पा मेको रागी कली सुम्चा माल्नेवे। गे नु इ लडाइ पाइब नेल्ल नु गे नु बाक्ब नेल्लेम मोदेंशो पचा माल्नीनी’ देनो” देंत।
10 परमप्रभु, परमप्रभु यावेमी “मेको नाक्ती इ थुंम मार मार मिम्नेवे। मिनु गे थम मरिम्शो पचा मिम्नेवे।
11 मिनु गेम ‘गो गारो महिरशो सहर कली लडाइ तोइनुङ। गो सिक्सी पा रिम्शो पा गारो महिरशो, ठेयब लाप्चो मपाइश्शो नु आग्लो मपाइश्शो सहरम बाक्ब मुर आन रागी कली लडाइ तोइनुङ।
12 मुल गो मेको रागी ङा मार मार रोइश्शा लाइक्चा कली लडाइ पाइनुङ। मेकोपुकी श्येत्थ दुम्शो रागीम लेंशा खुम्सीशा बाक्शो बाक्तेक्म। मेकोपुकीम शुश बी ब्यफ, क्यारश भेडा थुल्शा शोंप चेम्शा रागी आ दातेम बाक्शो बाक्नीम’ देंते। न्यायाधीस ९:३७
13 शेबा नु देदान, टारशीश ङा ग्याप्ब लेयबपुकी नु मेको आन ठिटा लडाइ पाइब नेल्लेम इ कली ‘मार, गे रोइक्थ जाक्शो नवे? मार गे रोइश्शो मार मार तचा कली, सुन चांदी लाइक्चा कली, बी ब्यफ, क्यारश भेडा नु शुश मार मार रोइक्चा कली, जाक्नी?’ ” देंशो बाक्नीम।
14 मोपतीके “ए मुर, गोग कली आं लोव़ पावो। मेको कली ‘परमप्रभु, परमप्रभु यावेमी इ कली आं मुर इस्राएली मारेइ मदुम्थु रिम्शो पा बाक्मानु, गे मेक मलाइनेवे?
15 ङोन इ बाक्तीक उत्तर रागी रे ठेयब हुल, सक्ति पाइश्शो लडाइ पाइब नु शुश जात ङा मुर शारा ङोइश्शा, गो नु जाक्नीम।
16 गे आं मुर इस्राएली नु लडाइ पचा कली रागी कली सुम्ब गोस्स खोदेंशो पा जाक्नेवे। ए गोग, नोले ङा नाक्ती गो इ कली आं रागी नु लडाइ पपाइक्नुङ। रागी रागी ङा मुरुम आं कली तुइक्तमेक्ल, दे मोदेंशो पाइनुङ। मेको रागी रागी ङा मुर आन ङोंइती गो का ला परमप्रभु यावे नङ’ दे कोंइनुङ” देंत।
17 मिनु परमप्रभु, परमप्रभु यावेमी “साइ आं गेय पाइब, इस्राएल ङा आं लोव़ पाइबम इ पर्बम लोव़ मपामे ङा? मेना मेकोपुकीम शुश बर्स सम्म ‘गो इ कली इस्राएली नु लडाइ पथ सोइक्नुङ’ दे आं लोव़ पाम्तेक्म” देंत। सेफन्याह ३:८
18 परमप्रभु यावेमी “मेको नाक्त मार दुम्ब देंशा हना, गोगम इस्राएल कली लडाइ तोइब। मिनु गो थाम्पा चुरनुङ।
19 मेको नाक्ती गो आं जोंब बोक्शा, गाइश्शो चुरशोम इस्राएल रागीम ठेयब ख्रिनु कुइब।
20 मेको नाक्ती समुन्द्र ङा ङांइ, सरीङ ङा चिक्ब, रागी ङा जन्तु, खपीम ग्रेशा गाक्ब जन्तु नेल्ल नु रागी ङा मुर नेल्ल आं ङोंइती ख्रिंख्रि पाइनीम। पहाड नेल्ल ब्रेत्नीम, रोंगु नेल्ल दोक्नीम। मिनु गारो नेल्ल गोल्नीम।
21 गो आं पहाड नेल्लेम गोग आ पर्बम तरवार का क्युक्नुङ। मिनु मेको आ मुर नेल्लेम आन तरवार आन लोक्ब आन पर्बम शोइक्नीम। प्रकाश २०:८-९
22 गो मुर बेक्तीक रोइम नु हुश ख्राक्श पोक्तीकेम मेको कली निसाफ पाइनुङ। गो मेको आ लडाइ पाइब आन तार, मेको नु बाक्शो जात जात ङा मुर आन हुल तार थम हिंचा ङा रेउ, मुप्स, मी नु गन्धक यिपाइक्नुङ।
23 मोपा गो आं ठेयब दुम्तीक नु गो आं बाक्शो परमप्रभु बाक्नुङ, दे कोंइनुङमी। मिनु शुश रागी ङा मुर आन ङोंइती आं कली तुइक्पांइसीनुङ। मेना मेकोपुकीम गोन परमप्रभु यावे नङ, दे तुइक्नीम” देंत।