Ezekiel 32 in Sunwar
1 मिनु ग्याइश्शा लाइक्चा पुंइसीशो १२ बर्स ङा १२ महिना ङा ङोंइती ङा नाक्त परमप्रभु यावेमी आं कली लोव़ पाप्तु।
2 मार लोव़ पाप्तु देंशा हना “ए मुर, इजीप्त ङा पिप फाराओ आ पर्बम रोंका पावो। मिनु मेको कली ‘गे रागी रागी ङा मुर आन दातेम गुप्स का खोदेंशो मिम्साक्वे। गे समुन्द्र ङा ठेयब जन्तु का खोदेंशो बाक्ते। गे खोला ङा ब्वाक्कुम एर ओंथ पवीनु ब्वाक्कु कली पोक्ना पोक्न नु खोइलीम ब्वाक्कु कली ख्राक्ना ख्राक्न गाक्बाक्ते। मिनु खोला कली ग्रांग्रा दिशो सेल्बाक्ते’ देनो” देंत। इजीकीएल २९:३
3 मिनु परमप्रभु यावेमी “गो मुर आन ठेयब हुल चाक्नुङ। मिनु आं ग्याइल इ तार ब्वारनुङ। मेकोपुकीम आं ग्याइलीम इ कली कीशा रागीम ग्रुंइनीम। इजीकीएल १२:१३
4 मिनु गो इ कली खपीम ताइक्नन। गो इ कली रागीम नेप्शा सोइक्नन। गो सरीङ ङा चिक्ब नेल्ल आन कली इ तार जुक्पाइक्नुङमी। मिनु गो रागी ङा जन्तु नेल्ल आन कली इ श्ये प्रोइक्पाइक्नुङमी। इजीकीएल २९:५
5 गो इ श्ये डांडा मेर फ्राइनुङ। मिनु इ बेक्शो रांम बेंसी नेल्ल प्रिंनुङ।
6 मिनु गो इ हुशेम रागी जिप्पाइक्नुङ। डांडा सम्म जिप्पाइक्नुङ। मिनु खोल्सा नेल्ल इ श्येम प्रिंनुङ।
7 गो इ कली क्याम्दुनु, सरीङ नेल्ल सुम्नुङ। मिनु सोरुल आन कली छिङछिङ सेल्नुङमी। गो नां कली गोस्सुम सुम्नुङ। मिनु तास्लाम हाम्सो मगेब। यसैया १३:१०
8 गो सरीङ ङा छेङछेङ नेल्ल आन कली इ तार छिङछिङ सेल्नुङमी। मिनु गो इ रागी छिङछिङ सेल्नुङ” दे परमप्रभु यावेमी देंत।
9 मिनु “गो इ कली रागी रागी ङा मुर आन दाते, इ मतुइश्शो रागीम ग्याइश्शा लाइक्पाइक्नन। गो शुश मुर आन थुं ग्येत्थ लुक्च पपाइक्नुङ।
10 गो शुश मुर आन कली इ कली तशा हिंब सेल्नुङमी। मेको आन पिप इ कली तशा शुश हिंनीम। गो आं तरवार मेको आन ङोंइती हिरदुनु, मेको पिपपुकी बेक्चा कली हिंशा ख्रिंख्रि पस ङा पस बाक्नीम। इ बेक्तीक नाक्ती मेको नेल्ल बेक्चा कली ख्रिंख्रि पना पन बाक्नीम” देंत।
11 मारदे हना परमप्रभु, परमप्रभु यावेमी “बेबीलोन ङा पिप आ तरवारम इ तार जाक्ब।
12 गो थम सक्ति पाइश्शो मुर आन तरवार रे इ लडाइ पाइब आन कली साइक्पाइक्नुङमी। मेको सक्ति पाइश्शो मुर रागी नेल्ल ङा मुर आन क्येङा मरिम्शो पाइब बाक्नीम। मेकोपुकीम इजीप्त रागी आ ठेयब लेश्शो खतम पोक्नीम। मिनु मेको आ लडाइ पाइब नेल्ल आन कली साइक्नीम।
13 गो मेको आ शुश ब्वाक्कु बाक्तीक आ नेक्था योव़शो बी ब्यफ, क्यारश भेडा नेल्ल आन कली साइक्नुङमी। मिनु मुर नु बी ब्यफोम, मेको ब्वाक्कु मदिम्नीम।
14 मिनु नोले गो मेको ब्वाक्कु रिम्शो सेल्नुङ। मिनु मेको आ खोलापुकी तेल खोदेंशो पा शाइक्पाइक्नुङमी” दे परमप्रभु, परमप्रभु यावेमी देंत।
15 मेकोम “गो इजीप्त रागी कली मुर मबाक्शो रागी सेलुनु, मेको रागी श्येत्थ दुम्मेनु, मेकेर बाक्ब नेल्ल आन कली सदुमीनु, मेकोपुकीम गोन परमप्रभु यावे नङ, दे तुइक्नीम।
16 मेको रोंका पतीक कुम्सो का बाक्ब। मेकोन पचा माल्नीम। रागी रागी ङा मीश मुरपुकीम एको कुम्सो पचा माल्नीम। मेकोपुकीम इजीप्त रागी नु मेको आ लडाइ पाइब नेल्ल आन पर्बम एको कुम्सो पचा माल्नीम” दे परमप्रभु, परमप्रभु यावेमी देंत।
17 मिनु ग्याइश्शा लाइक्चा पुंइसीशो १२ बर्स ङा ङोंइती ङा महिना ङा १५ नाक्त परमप्रभु यावेमी आं कली लोव़ पाप्तु।
18 मार लोव़ पाप्तु देंशा हना “ए मुर, इजीप्त रागी ङा लडाइ पाइब आन पर्बम रोंका पावो। मिनु मेको आन कली तुरसुम सोइक्तो। मिनु इजीप्त नु सक्ति पाइश्शो रागी रागी ङा मुर आन तमी आन कली बेक्शो मुर आन बाक्तीक सोइक्तो। तुरसुम लाइबपुकी नु सोइक्तो। इजीकीएल ३१:१६
19 मार, गे अर्को जात आन क्येङा शुश शिशी ताइब बाक्नेवे ङा? उइ लावो। मिनु ख्रोइक्तीक चिनु मख्रोइश्शोपुकी नु गोल्शा बाक्को। यसैया १४:११,१५
20 मेकोपुकी तरवारम साइश्शो आन दातेम गोल्नीम। इजीप्त तरवारम साइक्चा पुंइसीचा कली गेशो बाक्ब। आ लडाइ पाइब नु आ शोंप निम्फा लतीन।
21 मिनु ठेयब सक्ति पाइश्शोपुकी नु आन वारच पाइबपुकीमी बेक्शो मुर आन बाक्तीकेम ‘मेकोपुकी उइ यिशो बाक्नीम। मेको गोल्शो बाक्नीम। ख्रोइक्तीक चिनु मख्रोइश्शोपुकी तरवारम साइक्चा पुंइसीशो बाक्नीम’ देंनीम।
22 अस्सुर नु आ मुर नेल्ल मेकेर बाक्नीम। आ लडाइ पाइब नेल्ल आ तुरस आ एर ओंथ बाक्नीम। मेको नेल्ल तरवारम साइक्चा पुंइसीशो बाक्नीम।
23 मेको आन तुरस बेक्शो मुर आन बाक्तीके क्येङा दी गे वोइश्शो बाक्ब। मेको आ लडाइ पाइबपुकी मेको आ तुरस आ एर ओंथ बाक्नीम। मेको नेल्ल तरवारम साइक्चा पुंइसीशो बाक्नीम। मेकोम ब्रोंइशा बाक्ब आन रागीम मुर आन कली शुश हिंपाइश्शो बाक्तेक्म।
24 एलाम मेकेर बाक्ब। आ लडाइ पाइब नेल्ल आ तुरस आ एर ओंथ बाक्नीम। मेको नेल्ल तरवारम क्योरशा साइक्चा पुंइसीशो बाक्नीम। मेकोपुकी ख्रोइक्तीक चिनु मख्रोइक्थु, उइ बेक्शो मुर आन बाक्तीक लाम्तेक्म। मेकोम ब्रोंइशा बाक्ब आन रागीम मुर आन कली शुश हिंपाइश्शो बाक्तेक्म। मेकोपुकी बेक्शो मुर आन बाक्तीकेम लशो खोदेंशो पा मुने दोक्नीम। येरमीया ४९:३७
25 मेकोपुकीमी एलाम कली आ साइश्शो लडाइ पाइब आन दातेमी तुरस सेल्शो बाक्नीम। आ लडाइ पाइब आन तुरस मेको आ एर ओंथ बाक्नीम। मेको नेल्ल ख्रोइक्तीक चिनु मख्रोइक्थु तरवारम साइक्चा पुंइसीशो बाक्नीम। मारदे हना मेकोम ब्रोंइशा बाक्ब आन रागीम मुर आन कली शुश हिंपाइश्शो बाक्तेक्म। मेकोपुकी बेक्शो मुर आन बाक्तीके लाइब खोदेंशो पा मुने दोक्नीम। मेको साइक्चा पुंइसीशो मुर आन दातेमी बाक्नीम।
26 मेशेक, तूबल नु आस शुश मुर मेकेर बाक्नीम। आस मुर आस तुरस आस एर ओंथ बाक्नीम। मेको नेल्ल ख्रोइक्तीक चिनु मख्रोइक्थु तरवारम साइक्चा पुंइसीशो बाक्नीम। मारदे हना मेकोम ब्रोंइशा बाक्ब आन रागीम मुर आन कली शुश हिंपाइश्शो बाक्तेक्म। इजीकीएल २७:१३; इजीकीएल ३८:२
27 मेकोपुकी साइ ङोंइती साइश्शो अरु लडाइ पाइब नु मबाक्नीम। मिनु मेको आन या सुन्दा बेक्शो मुर आन बाक्तीकेम लशो बाक्नीम। मेको आन तरवार आन पिया आगाम वोइश्शो बाक्ब। मिनु आन तेक्तीके आन रुश तार वोइश्शो बाक्नीम। मारदे हना मेको लडाइ पाइबम ब्रोंइशा बाक्ब आन रागी ङा मुर आन कली शुश हिंपाइक्तेक्म।
28 इजीप्त गे यो खतम दुम्शा ख्रोइक्तीक चिनु मख्रोइक्थु तरवारम साइक्चा पुंइसीशा गोल्चा माल्नेवे।
29 एदोम मेकेर बाक्ब। मेको आ पिप नु आ तौ नेल्ल मेकेर बाक्शो बाक्नीम। मेको आन के सक्ति बाक्त हना यो, मेको तरवारम साइक्चा पुंइसीशा गोल्शा बाक्शो बाक्नीम। मेकोपुकी ख्रोइक्तीक चिनु मख्रोइश्शो नु तुरसुम गोल्शा बाक्नीम। इजीकीएल २५:१२-१४
30 उत्तर रागी ङा सासन पाइब नु सीदोन ङा मुर नेल्ल मेकेर बाक्नीम। मेको आन सक्तिम मुर नेल्ल आन कली शुश हिंपाइक्तेक्म। मोपतीके मेकोपुकी तरवारम साइक्चा पुंइसीशो मुरपुकी नु मुने दोक्शा उइ लाम्तेक्म। मेकोपुकी ख्रोइक्तीक चिनु मख्रोइक्थु तरवारम साइक्चा पुंइसीशो नु मुने दोक्शा तुरसुम बाक्शो बाक्नीम। इजीकीएल २८:२१-२३
31 फाराओमी मेको कली तशा, आ लडाइ पाइब नेल्ल तरवारम साइक्चा पुंइसीशो तुइश्शा, आ थुं नाइक्ब।
32 मारदे हना मेकोमी ब्रोंइशा बाक्ब आन रागी ङा मुर आन कली शुश हिंपाइक्तु। मोपतीके फाराओ ख्रोइक्तीक चिनु मख्रोइक्थु तरवारम साइश्शो मुर आन दातेमी बाक्ब” दे परमप्रभु, परमप्रभु यावेमी देंत।