Ezekiel 31 in Sunwar

1 मिनु ग्‍याइश्‍शा लाइक्‍चा पुंइसीशो ११ बर्स ङा महिना सां ङा ङोंइती ङा नाक्‍ती, परमप्रभु यावेमी आं कली लोव़ पाप्‍तु।

2 मार लोव़ पाप्‍तु देंशा हना “ए मुर, इजीप्‍त ङा पिप फाराओ नु मेको आ लडाइ पाइब आन कली ‘इन ठेयब दुम्‍तीक सु नु थाप्‍ने चाम्‍सीबा?

3 अस्‍सुर रागी कली मिम्‍तीन। मेको लेबानोन ङा लाइश्‍शो रवा खोदेंशो बाक्‍त। मेको आ दारशो राशीम ब्‍वाकी आन कली सुम्‍शो बाक्‍त। मेको आ ङर लाइश्‍शो दुम्‍शा गोस्‍स सम्‍म जाक्‍दीश्‍शो बाक्‍त।

4 मिनु मेको कली ब्‍वाक्‍कुम जिश्‍शा कोल्‍पाइक्‍तु। ब्‍वाक्‍कुम मेको कली लाइश्‍शो सेल्‍तु। मेको आ एर ओंथ ङा खोलापुकीम मेको कली जिप्‍पाइक्‍तेक्‍म। मिनु मेको खोलाम दिंम ङा रवा नेल्‍ल आन कली जिप्‍पाइक्‍तु।

5 मोपा मेको दिंम ङा रवा नेल्‍ल आन क्‍येङा लाइश्‍शो दुम्‍त। शुश ब्‍वाक्‍कु बाक्‍तीके मेको आ राशी शुश दुम्‍तेक्‍म। मिनु शुश ब्‍वाक्‍कु रे मेको कोल्‍त।

6 सरीङ ङा चिक्‍बपुकीम मेको आ राशीम आन ग्‍योव़ सेल्‍तेक्‍म। मेको आ राशी आगाम ब्‍वाकी ङा जन्‍तु नेल्‍लेम आन चाइक्‍ब जरमेम्‍तेक्‍म। मिनु मेको आ वांकु आगाम रागी रागी ङा मुर जाक्‍शा बाक्‍तेक्‍म।

7 मेको एर ओंथ ब्रशा लाइश्‍शो राशी पाइश्‍शो दारशो रवा का दुम्‍त। मारदे हना मेको आ शाक्‍श शुश ब्‍वाक्‍कु बाक्‍तीकेम बाक्‍तेक्‍म।

8 परमप्रभु आ रू ङा लाइश्‍शो रवापुकीम यो मेको कली ग्राने मचबेम। तेकोइ तोव़शी रवापुकीम यो मेको आन राशी कली ग्राने मचबेम। परमप्रभु आ रू ङा तेकोइ रवा मेको खोइ दारशो मबाक्‍म।

9 गो मेको कली एर ओंथ लशो राशीपुकीम ग्‍योम्‍शा, दारशो सेल्‍ता। मिनु परमप्रभु आ रू एदेन ङा रवा नेल्‍लेम मेको कली गेहे पाम्‍तेक्‍म’ देनो” देंत।

10 मोपतीके परमप्रभु, परमप्रभु यावेमी “मेको मिश लाइश्‍शो दुम्‍तीके नु मेको आ ङरम आ राशी आन कली गोस्‍स आन दाते रे ख्रिश्‍शा लपाइक्‍तीके आ लाइश्‍शोम मेको ठेयब लेत्‍त।

11 मोपतीके गो मेको कली रागी रागी ङा सासन पाइब आ गुइम गेता। मिनु मेको लाइश्‍शो रवाम दोपा आं अरेशो मटिवा, मोपा सजाइ ताप्‍तु। गो मेको कली तिल्‍ता।

12 मिनु अर्को रागी ङा थम मरिम्‍शो मुरपुकीम मेको कली तिम्‍शा प्रोंइतेक्‍म। मेको आ राशीपुकी बेंसी नेल्‍ल नु पहाड मेर गोल्‍शा बाक्‍तेक्‍म। मिनु मेको आ ठेयब राशी रागी ङा खोला नेल्‍लेम जिक्‍शा लीतेक्‍म। मिनु रागी ङा मुर नेल्‍ले मेको आ वांकु रे ग्रूशा मेको कली प्रोंइतेक्‍म।

13 मिनु मेको दिम्‍शो रवाम सरीङ ङा चिक्‍ब नेल्‍ल बाक्‍तेक्‍म। मिनु मेको आ राशी आगाम ब्‍वाकी ङा जन्‍तु नेल्‍ल जाक्‍शा बाक्‍तेक्‍म।

14 मोदेंशो दुम्‍तीके ब्‍वाक्‍कु आ नेक्‍था वाशो रवा मेको मिश लाइश्‍शो पा मकोल्‍नीम। मिनु आन ङर गोस्‍स सम्‍म मजाक्‍दीत्‍नीम। मारदे हना मेको नेल्‍ल बेक्‍चा माल्‍नीम। नेल्‍ल मुर खोदेंशो पा बेक्‍चा माल्‍नीम। बेक्‍शो मुर आन बाक्‍तीके तुरसुम लाइनीम” देंत।

15 परमप्रभु, परमप्रभु यावेमी “गो मेको लेबानोन ङा ठेयब रवा कली बेक्‍शो मुर आन बाक्‍तीकेम तोक्‍नुङ। मेको नाक्‍ती समुन्‍द्र रोंका पा खोला मशाइक्‍नीम। ब्‍वाक्‍कु बुक्‍तीके सोव़नीम। मिनु गो लेबानोन ङा रवा आन कली रोंका पपाइक्‍नुङ। मिनु ब्‍वाकी ङा रवा नेल्‍ल ख्रिंख्रि पा हिम्‍पाइक्‍नुङमी।

16 गो मेको कली तुरस नु बेक्‍शो मुर आ बाक्‍तीके सोइश्‍शा, रागी रागी आन कली आ गोल्‍शो रेयकेमी हिम्‍पाइक्‍नुङ। मिनु एदेन ङा रवा नेल्‍ले, लेबानोन ङा नेल्‍ल क्‍येङा दार‍शो रवा नु शुश ब्‍वाक्‍कु तशो रवा नेल्‍लेमी रागी आगाम आन थुं नाइक्‍ताक्‍म। इजीकीएल २८:८

17 मेको तरवारम साइक्‍चा पुंइसीशो नु मेको रागी कली वारच पा अर्को रागी ङा मुर आ वांकुम बाक्‍ब नेल्‍ल बेक्‍शो मुर आन बाक्‍तीक लाम्‍तेक्‍म।

18 एदेन ङा रवा आन दाते ङा तेको रवा इ खोदेंशो पा सक्ति पाइश्‍शो नु ठेयब बाक्‍बा ङा? मो हना यो गे यो एदेन ङा रवापुकी नुन रागी आगा तोक्‍चा पुंइसीनेवे। गे ख्रोइक्‍तीक चिनु मख्रोइश्‍शो तरवारम साइक्‍चा पुंइसीशो आन दातेमी बाक्‍नेवे। मेकोपुकी फाराओ नु मेको आ लडाइ पाइब बाक्‍नीम, देनो” दे परमप्रभु, परमप्रभु यावेमी देंत।