Ezekiel 27 in Sunwar
1 परमप्रभु यावेमी आं कली लोव़ पाप्तु।
2 मार लोव़ पाप्तु देंशा हना “ए मुर, टायर सहर आ पर्बम रोंका पावो।
3 मेको समुन्द्र आ ओव़तीक बाक्ब। मेको टायर सहर शुश मुर आन ग्याप्तीक लेयतीक बाक्ब। मिनु परमप्रभु, परमप्रभु यावेमी ए टायर, गे ‘गो नेल्ल क्येङा दारशो बाक्नुङ’ देंते। होसे ९:१३
4 इ सांद समुन्द्र आ आगाम बाक्त। इ कली सेल्बपुकीमी नेल्ल आन क्येङा दारशो पा सेल्तेमी।
5 मेकोपुकीम इ डोंगा नेल्ल सेनीर ङा शी के सेल्तेक्म। आ दाते ङा थाम लेबानोन ङा लाइश्शो रवा आ शी के सेल्तेक्म। ब्यवस्था ३:८-९
6 मेकोपुकीम इ ब्वाक्क शाक्तीके बाशान ङा बोल्यो शी के सेल्तेक्म। इ थेक्शा गाक्तीक साइप्रस ङा समुन्द्र आ शुंइच रे चाक्शो तोव़शी रवा आ शी के सेल्शा हात्ती आ दारा के बुटा आप्शा सेल्तेक्म।
7 इ जहाज ङा वापुकी इजीप्त रागी ङा दारशो बुटा आप्शा सेल्शो रिम्शो किरशो सुती वा के बाक्तेक्म। मेको इ छेदर दुम्शो बाक्तेक्म। मेको एलीशाह रागी ङा समुन्द्र आ शुंइच ङा नीलो नु प्याजी रङ ङा चाक्शो बाक्त। उत्पत्ती १०:४
8 सीदोन नु अरवाद ङा मुरपुकी इ जहाजम गेय पाइब बाक्तेक्म। टायर, इन जोक्ब तुइक्ब मेकेर बाक्तेक्म। सेमेर सहर ङा मुर इ जहाज चलेब बाक्तेक्म।
9 गेबाल ङा खाल्पा नु दारशो थोव़क सेल्स जोक्ब तुइक्ब इ आगाम बाक्तेक्म। मेकोपुकी जहाज ङा बिग्रेशो मार मार सेल्ब बाक्तेक्म। जहाज नु आ गेय पाइब नेल्ल इ आगाम बाक्तेक्म। मेकोपुकीमी लेयतीक नु ग्याप्तीक गेय यो पाम्तेक्म। यहोसु १३:५; १राजा ५:३२
10 पारसी, लूद नु पूत रागी ङा मुरपुकी इ लडाइ पाइब बाक्तेक्म। मेकोपुकी बोल्यो लडाइ पाइब बाक्तेक्म। मेको आन तेक्तीक नु ताकी इ आगामीन क्युक्शा इ दारस बारपाइक्तेक्म।
11 अरवाद नु हेलेक ङा मुरपुकी इ गारो आ एर ओंथ खाल पाइब बाक्तेक्म। गमाद ङा मुरपुकी इ लाइश्शो खिं खाल पाइब बाक्तेक्म। मेकोपुकीम आन तेक्तीक नु ब्रा कुरतीक इ एर ओंथ ङा गारोम क्युक्बाक्तेक्म। मिनु मोपा इ दारस बारपाइक्तेक्म।
12 गे नु शुश शोंप नु शुश मार मार बाक्तीके टारशीश ङा मुरपुकीम गे नु ग्याप्तीक लेयतीक गेय पा चांदी, फलाम, टिन नु सिसा चाक्शा फाइक्तेक्म।
13 यावान तूबल नु मेशेक ङा मुरपुकीम गे नु ग्याप्तीक लेयतीक गेय पाम्तेक्म। मेकोपुकीम वाइलीम वाइल नु कांसा के ग्योंब चाक्शा इ मार मार नु फाइक्तेक्म। इजीकीएल ३८:२
14 मिनु बेथ-तोगारमाह ङा मुरपुकीम शारा, लडाइ पाइब शारा नु खच्चर चाक्शा इ मार मार नु फाइक्तेक्म।
15 रोडोस ङा मुरपुकीम गे नु ग्याप्तीक लेयतीक गेय पाम्तेक्म। मिनु समुन्द्र आ नेक्था ङा शुश रागी इ मार मार ग्याप्ब लेयब दुम्तेक्म। मेकोपुकीम इ कली हात्ती आ दारा नु शुश क्येट लाइब क्येर शी चाक्शा इ मार मार नु फाइक्तेक्म।
16 इ शुश मार मार बाक्तीके एदोम ङा मुरपुकीमी गे नु ग्याप्तीक लेयतीक गेय पाम्तेक्म। मेकोपुकीम फिरोजा माइश्शो हीरा, प्याजी रङ नुप्शा प्रोव़शो वा, बुटा आप्शो वा, रिम्शो किरशो सुती वा, लल मूगा नु हीरा चाक्शा इ मार मार नु फाइक्तेक्म।
17 यहूदा नु इस्राएल ङा मुरपुकीम गे नु ग्याप्तीक लेयतीक गेय पाम्तेक्म। मेकोपुकीम मिन्नीथ ङा चेरब, फोव़शी रवा आन फल, खुदो, तेल नु ख्रेक्तीक चाक्शा इ मार मार नु फाइक्तेक्म।
18 मिनु इ शुश मार मार बाक्तीके नु इ शुश शोंप बाक्तीके दमस्कस ङा मुरपुकीम गे नु मार मार ग्याप्तीक लेयतीक गेय पाम्तेक्म। मेकोपुकीम हेल्बोन ङा अङगुर शांबु नु बुश ऊन चाक्शा इ मार मार नु फाइक्तेक्म।
19 उजाल ङा वेदान नु यावान ङा मुरपुकीम गे नु ग्याप्तीक लेयतीक गेय पाम्तेक्म। मेकोपुकीम चेम्शो फलाम, सिन्कौली नु बच चाक्शा इ मार मार नु फाइक्तेक्म।
20 देदान ङा मुरपुकीम शारा आ लगम कली जीन वा चाक्शा इ मार मार नु फाइक्तेक्म।
21 अराब रागी नु केदार ङा पिप आन तौ नेल्ल इ मार मार ग्याप्ब मुर बाक्तेक्म। मेकोपुकीम भेडा पाठा, सांड, क्यारश चाक्शा इ मार मार नु फाइक्तेक्म।
22 शेबा नु रामाह ङा ग्याप्ब लेयब मुरपुकीम गे नु ग्याप्तीक लेयतीक गेय पाम्तेक्म। मेकोपुकीम सुप्तीक, नेल्ल खाल ङा हीरा नु सुन चाक्शा इ मार मार नु फाइक्तेक्म। उत्पत्ती १०:७
23 हारान, कन्नेह, एदेन, शेबा, अश्शुर नु किल्मद ङा ग्याप्ब लेयबपुकीम गे नु ग्याप्तीक लेयतीक गेय पाम्तेक्म।
24 मेकोपुकीमी दारशो वा, नीलो श्येलेम प्रोव़शो वा, बुटा आप्शो वा, शुश रङ पाइश्शो गलैचा चाक्शा, इ मार मार नु फाइक्तेक्म।
25 टारसीस ङा जहाजपुकीम इ ग्याप्तीक लेयतीक गेय पाम्तेक्म। गे हेल्शो ग्याप्तीक लेयतीक मार मारमी ब्रीशो समुन्द्रम बाक्ते।
26 मिनु इ कली शाक्बपुकीमी इ कली समुन्द्र आ दातेम लाइक्तेक्म। तन्न पूर्ब ङा फशेम इ कली समुन्द्र आ दातेमीन खतम पोक्तु।
27 मिनु इ खतम दुम्तीक नाक्ती इ शोंप, इ ग्याप्तीक लेयतीक मार मार, इ गेय पाइब, इ कली चलेब, इ जहाज कली सेल्ब, इ ग्याप्ब लेयब, इ लडाइ पाइब नु गे नु बाक्ब मुर नेल्ले समुन्द्र आ दातेमी ग्रुम्शा खतम दुम्नीम।
28 मेको इ जहाज चलेब आन वाइ ब्रेश्शोम रागी ख्रिंख्रि पाइब।
29 मिनु ब्वाक्कु शाक्ब नेल्ले आन जहाज प्रोंइशा प्रोक्नीम। मिनु जहाजम गेय पाइब नु चलेबपुकी समुन्द्र आ नेक्थाम राप्नीम।
30 मिनु मेकोपुकी इ पर्बम ठेयब सेंदा पा रोंका पा ङाक्नीम। आन पियाम फुरक फुंइसीनीम। मिनु पुलुम लोक्सीनीम।
31 गे इ पतीके मेकोपुकीम आन पिया ङा चां प्रेक्नीम। मिनु अरन्डी फेक्सीनीम। मिनु इ पर्बम आन थुं कशो दुम्शा ङाक्नीम। शुश रोंका पाइनीम।
32 मेकोपुकीम इ पर्बम रोंका पा बिलाना पतीक कुम्सो पाइनीम ‘समुन्द्र आ दातेमी टायर खोदेंशो पा अर्को तेको सहर खतम दुम्शो बाक्मे’ दे रोंका पाइनीम।
33 समुन्द्रम इ ग्याप्तीक लेयतीक मार मार चाक्गमेनु, गे शुश मुर आन कली आन थुं ग्येरपाइक्तीवी। गे इ शुश शोंप नु इ ग्याप्तीक लेयतीक मार मारम रागी ङा पिप आन कली शोंप पाइश्शो सेल्तीवी।
34 मुल समुन्द्रम ख्रुम्चा पुंइसाक्वे। इ ग्याप्तीक लेयतीक मार मार नु इ मुर नेल्ल गे नु ग्रुम्तेक्म।
35 मिनु समुन्द्र आ नेक्थाम बाक्ब नेल्ल इ कली तशा हिंशो बाक्नीम। मेको आन पिप थाम्पा हिंशा ख्रिंख्रि पाइनीम। मेको आन कुल हिंशा किक्पाइश्शो बाक्नीम।
36 मिनु रागी रागी ङा ग्याप्तीक लेयतीक गेय पाइबपुकीम इ कली शुक्शी पाइनीम। इ हिंचा ङा नुप्तीक नाक्त जाक्शो बाक्त” देंत। इजीकीएल २८:१९