Ezekiel 26 in Sunwar
1 मिनु ग्याइश्शा लाइक्चा पुंइसीशो ११ बर्स ङा महिना ङा ङोंइती ङा नाक्ती परमप्रभु यावेमी आं कली लोव़ पाप्तु।
2 मार लोव़ पाप्तु देंशा हना “ए मुर, यरूसलेम श्येत जशो तशा, टायर सहर ग्येरसीशो बाक्त। मेकोमी ‘आं ङोंइती ठेयब लाप्चो ब्रेश्शो बाक्ब। मेको लाप्चो आं कली रोक्सीशो बाक्ब। मुल मेको जाम्शा लत। मुल आं कली रिम्शो दुम्ब’ ” देंत। इजीकीएल २५:३
3 मोपतीके परमप्रभु, परमप्रभु यावेमी “कोव़ङो, ए टायर सहर गो इ कली सजाइ गेनुङ। इ कली समुन्द्रम आ छाल पोक्शो खोदेंशो पा गो शुश रागी ङा मुर इ पर्बम पोक्नुङमी।
4 मेकोपुकीम टायर ङा गारो प्रेत्नीम। मिनु मेको आ लाइश्शो खिं खोल्नीम। गो मेको आ खप खोरशा श्येत्थ फुल्लु खोदेंशो सेल्नुङ।
5 टायर सहर समुन्द्र आ दातेम ग्याइल आप्तीक दुम्चा माल्ब, दे गो, परमप्रभु, परमप्रभु यावेमी एको लोव़ पाता। मेको सहर रागी रागी ङा मुर आन रोइक्तीक दुम्ब।
6 मिनु मेको आ एर ओंथ ङा सहर ङा मुर तरवारम साइक्चा पुंइसीनीम। मेना मेकोपुकीम गोन परमप्रभु यावे नङ, दे तुइक्नीम” देंत।
7 मिनु परमप्रभु, परमप्रभु यावेमी “गो उत्तर रे बेबीलोन ङा पिप नेबुकदरेसर कली शारा, बग्गी, शारा ङोइक्ब लडाइ पाइब नु ठेयब हुल बोल्यो लडाइ पाइब, टायर नु लडाइ पपाइक्थ चाक्नुङ। येरमीया २७:६; दानीएल २:३७
8 मिनु एर ओंथ ङा सहर ङा मुर नेल्ल तरवारम साइक्चा पुंइसीनीम। मेको बेबीलोन ङा लडाइ पाइबपुकीमी सहर कली पुम्नीम। गारो ङोइक्तीक सेल्नीम। मिनु तेक्तीक कुरशो शुश लडाइ पाइब इ गे बारनीम।
9 मिनु पिप नेबुकदनेसरमी मुडाम गारो ब्रेप्ब आन कली अरेब। मिनु इ लाइश्शो खिं आ खापुकीम प्रेत्नीम।
10 मेको आन शुश शाराम पोक्शो फुरकुम इ कली सुम्ब। शारा ङोइक्ब नु बग्गी आन गुगील आन रेयकेम इ गारो हिम्पाइक्ब। नेबुकदनेसर इ लाप्चो रे ओव़मेनु, प्रेश्शो गारोम हिरशो सहर खोदेंशो पा ओव़ब।
11 मेको आ शारा आन गेंचम इ सहर ङा लां नेल्ल दिम्शा ताइश्शा पाइनीम। मिनु मेकोमी इ मुर आन कली तरवारम साइक्ब। मिनु इ बोल्यो थाम खपीम गोल्नीम।
12 मेकोपुकीम इ शोंप रोइश्शा योल्नीम। इ लेयचा कली वोइश्शो थोव़क रोइश्शा लाइक्नीम। मेकोपुकीम इ गारो नु इ दारदारशो खिं प्रेश्शा खतम पोक्नीम। मिनु इ फुल्लु, खिं सेल्तीक शी नु खप समुन्द्रम ताइक्नीम।
13 गो इ कुम्सो थुम्पाइक्नुङ। इ बीना ताप्शो लेंशा मनेंसीब। आमोस ५:२३
14 गो इ कली श्येत्थ फुल्लु सेल्नुङ। गे ग्याइल आप्तीक दुम्नेवे। इ कली लेंशा गेनायो मसेल्नीम। मारदे हना गो, परमप्रभु यावेमी एको लोव़ पाता” दे परमप्रभु, परमप्रभु यावेमी देंत।
15 परमप्रभु, परमप्रभु यावेमी टायर सहर कली “लडाइ पा, गार दुम्शो आन हुकयी पशो इ गोल्शो रेयकेम समुन्द्र आ नेक्था ङा सहर आन कली हिम्पाइक्ब।
16 मेना समुन्द्र आ नेक्था ङा सहर आन कली सासन पाइब आन ठेयब नित्तीक रे बोक्शा तोइश्शा, बुटा आप्शो वा प्रुइक्नीम। मेकोपुकी हिंशा ख्रिंख्रि पशा, खपीम निश्शा, हिम्सीनीम। मिनु इ कली तशा हिंनीम।
17 मिनु मेकोपुकीम सहर आ पर्बम रोंका पाइनीम। मिनु सहर कली ‘गे समुन्द्र रे क्याम्चा पुंइसाक्वे। ए दारशो सहर, गे नु इ मुरपुकी समुन्द्र ङा सक्ति पाइश्शो बाक्तीनी। मेकेर बाक्ब नेल्ल आन कली गे हिंपाइश्शा थिर थिर पपाइश्शो बाक्ते।
18 मुल गे जाम्शा लवे नाक्ती समुन्द्र आ नेक्था ङा रागी ङा मुरपुकी ख्रिंख्रि पाइनीम। इ गोल्शा लशो खतम दुम्शो तशा समुन्द्र आ नेक्था ङा रागी हिंनीम’ ” देंत।
19 मिनु परमप्रभु, परमप्रभु यावेमी “गो इ कली श्येत्थ सहर का सेल्नुङ। गो इ कली मुर मबाक्शो सहर खोदेंशो दुम्पाइक्नुङ। मिनु गो इ कली समुन्द्र ङा ब्वाक्कुम सुम्पाइक्नुङ।
20 गे इ कली बेक्शा लशो मुर नु साइ ङोंइती बेक्शो मुर आन बाक्तीके उइ तोक्नन। गो इ कली उइ ङा रागीम साइ नेसी ब्रेश्शो खिं आन दातेमी बाक्पाइक्नुङ। गे नरक लाइब नु बाक्नेवे। मिनु गे ब्रोंइशा बाक्ब आन बाक्तीकेम बाक्चा मताइनेवे। यसैया १४:११,१५; एफिसी ४:९; १पत्रुस ३:१९
21 गो इ जाम्तीक हिंचा ङा सेल्नुङ। मिनु गे जाम्शा लाइनेवे। इ कली माल्नीम, तन्न सुइम मथित्नीम” दे परमप्रभु यावेमी देंत।