Ezekiel 23 in Sunwar

1 परमप्रभु यावेमी आं कली लोव़ पाप्‍तु।

2 मार लोव़ पाप्‍तु देंशा हना “ए मुर, रागी काम मीश मुर निक्‍शी बाक्‍ताक्‍स। मेको ममा का आ तमी बाक्‍ताक्‍स।

3 मेको निक्‍शी इजीप्‍त रागीम तेल्‍लेम दुम्‍ताक्‍स। मेको निक्‍शी ठिटी दुम्‍सानु, तेल्‍लेम पचा गोम्‍ताक्‍स। मेको रागीम मेको आस कुचु थिम्‍तेक्‍म। मिनु मेको निक्‍शी कन्‍ने बाक्‍सानु, आस दूध थि‍चा पुंइसाक्‍स।

4 मिनु दिदी आ नें ओहोला नु आ लोक्‍ब आ नें ओहोलीबा बाक्‍त। मेको निक्‍शी आं के दुम्‍शो बाक्‍ताक्‍स। मिनु मेको निक्‍शीमी तमी तौ थिम्‍ताक्‍स। मेको आस नें आ अर्थ मार बाक्‍त देंशा हना, ओहोला सामरीया नु ओहोलीबा यरूसलेम बाक्‍त।

5 मिनु ओहोला आं के दुम्‍शा, यो तेल्‍लेम पाप्‍तु। मेकोमी अस्‍सुर ङा लडाइ पाइब आन कली खोइक्‍तु।

6 मेको नीलो वा फेक्‍शो लडाइ पाइबपुकी, हुकुम पाइबपुकी, लडाइ पाइब आन कप्‍तानपुकी, मेको नेल्‍ल दारशो ठिटा शारा ङोइश्‍शा गाक्‍बपुकी बाक्‍तेक्‍म।

7 मेकोमी मेको आन कली दाक्‍शा, मेकोपुकी नु तेल्‍लेम पाप्‍तु। मेको अस्‍सुर ङा योव़शो नु दारशो मुर बाक्‍तेक्‍म। मिनु मेकोपुकी नु इप्‍शा, मेको आ माल्‍शो वोंइश मुर आन मूर्ति नेल्‍लेम आंम कली ग्रांग्रा दिशो सेल्‍साक्‍व।

8 मेकोम इजीप्‍त रागीम पशो तेल्‍लेम गेय मप्रोन। मारदे हना मेको ठिटी बाक्‍मेनु, मुरपुकी मेको नु इप्‍तेक्‍म। मिनु मेकोपुकीमी आ कुचु थिम्‍तेक्‍म। मिनु आन दाक्‍शो मेको नु पाम्‍तेक्‍म। २राजा १७:४

9 मोपतीके गो मेको कली आ दाक्‍शो अस्‍सुर ङा मुर आन गुइम गेता। मेको, मेकोपुकी नु दाक्‍मुशो बाक्‍त।

10 मिनु मेकोपुकीमी मेको कली शिश्रा सेल्‍तेक्‍म। मिनु मेको आ तमी तौ आन कली ग्‍याइक्‍ताक्‍म। मिनु मेको कली तरवारम साइक्‍तेक्‍म। मेकोम सजाइ ताप्‍तु। मेको मीश मुर आन दातेम शुक्‍शी पाइक्‍चा पुंइसीब दुम्‍त।

11 मिनु मेको आ लोक्‍ब ओहोलीबामी मेको ताप्‍तु। तन्‍न मेकोम आ तेल्‍लेम पतीक नु खोइक्‍तीकेम आ दिदी क्‍येङा यो लाक्‍तु।

12 मेको यो अस्‍सुर ङा मुर आन कली हुकुम पाइब, कप्‍तान, या कुरशा लडाइ पाइब नु शारा ङोइक्‍ब बाक्‍तेक्‍म। मेको दारशो ठिटा आन नोले खोइक्‍तु।

13 मिनु गो मेको यो ग्रांग्रा दिशो दुम्‍शो ताता। मेको निम्‍फा लां कामीन गाक्‍ताक्‍स।

14 तन्‍न मेकोम आ तेल्‍लेम पतीक ङोंइती क्‍येङा शुश बारपाइक्‍‍तु। मेकोम गारोम मुशा सेल्‍शो वोंइश मुर आन नक‍सा ताप्‍तु। मेको लल रङम सेल्‍शो कल्‍दी आन नक‍सा बाक्‍तेक्म।

15 आन क्रातोम किप्‍शुर क्‍यिप्‍शो नु आन पियाम रोम्‍सीशो फेटा रुक्‍शो, नेल्‍ल ठेयब मुर खोदेंशो तांइसीशो बाक्‍तेक्‍म। मेको बेबीलोनम बाक्‍शो कल्‍दी ङा मुर बाक्‍तेक्‍म।

16 मिनु मेकोम मेको आन कली तशा, मेको आन कली दाक्‍शा कल्‍दी रागीम लोव़ कुरब मुर सोइक्‍ताक्‍व।

17 मिनु बेबीलोन ङा मुरपुकी मेको आ बाक्‍तीकेम मेको नु इप्‍थ जाक्‍तेक्‍म। मिनु आन दाक्‍तीकेम मेको कली ग्रांग्रा दिशो सेल्‍तेक्‍म। मिनु मेकोपुकी रे ग्रांग्रा दिशो दुम नोले, मेको आन क्‍येङा रूशा, आ थुं लेत्‍ताक्‍व।

18 मोपा मेकोम नेल्‍लेम तचा ङा पा तेल्‍लेम पा, आ शिश्रा रां नेल्‍ल आन कली कोंइताक्‍व। मिनु गो मेको आ दिदी कली खोदेंशो पा, मेको कली यो ग्रांग्रा दिशा प्रोंइता।

19 मो हना यो मेकोम इजीप्‍त रागीम ठिटी बाक्‍म ना ङा तेल्‍लेम पशो मिम्‍शा आ तेल्‍लेम पतीके शुश बारपाइक्‍तु।

20 मेको मेकेर ङा आ माल्‍शो मुर आन कली दाक्‍ताक्‍मी। मेको आन माल्‍शो मुरपुकी गधा नु शारा खोदेंशो बाक्‍तेक्‍म।

21 मो हना यो गे इजीप्‍त रागीम इ कुचु थिशो इ ठिटी ना ङा मरिम्‍शो पशो नाक्‍ती मिम्‍ताक्‍वी” देंत।

22 मोपतीके ए ओहोलीबा, परमप्रभु, परमप्रभु यावेमी “ङोंइती गो इ कली सजाइ गेनुङ। मिनु इ कली दाक्‍शा, ब्रीशो मुर आन कली सजाइ गेनुङ। मिनु मेको मुर आन कली इ पर्बम एर ओंथ रे पोक्‍नुङ।

23 मेको बेबीलोन ङा मुर नु कल्‍दी ङा मुर नेल्‍ले, पेकोद, शोआ नु कोआ ङा मुर, अस्‍सुर ङा मुर नेल्‍ल, मेको नु बाक्‍शो दारशो ठिटा, हुकुम पाइब, कप्‍तान नु लडाइ पाइब, मेको नेल्‍ल नु शारा ङोइक्‍ब नेल्‍ल आन कली इ पर्बम पोक्‍नुङमी।

24 मेकोपुकी गे नु लडाइ पचा कली उत्तर रे पा बग्‍गी नु शुश लडाइ पाइब नु जाक्‍नीम। मेकोपुकीमी ठेयब नु आइक्‍च तेक्‍तीक कुरशा, फलाम के गुक्‍तीक गुक्‍शा, इ कली पुम्‍नीम। मिनु गो इ कली सजाइ गेपाइक्‍चा कली मेको आन गुइम गेनन। मिनु मेकोम आन कानुन कोव़शा इ कली सजाइ गेनीम।

25 गो आं गाइश्‍शोमी इ कली सजाइ गेपाइक्‍नुङ। मिनु मेकोपुकी गे नु गाइश्‍शा चुरशा इ कली खतम पोक्‍नीम। मिनु मेकोपुकीम इ नें नु इ नोफा ख्रोइक्‍नीम। मिनु इ लीशो मुर तरवारम साइक्‍चा पुंइसीनीम। मेकोपुकीम इ तमी तौ आन कली ग्‍याइश्‍शा लाइक्‍नीम। इ लीशो मुर मीम दुप्‍शा बेक्‍नीम।

26 मेकोपुकीम इ वा प्रुइश्‍शा शिश्रा सेल्‍नीम। मिनु इ दारशो गहनापुकी रोइश्‍शा लाइक्‍नीम।

27 मोपा गो इ इजीप्‍त रागीम गोशो तेल्‍लेम पतीक थुम्‍‍पाइक्‍नुङ। गे मेको आन कली ममाल्‍थु, इजीप्‍त रागी कली ममिम्‍‍नेवे” दे परमप्रभु यावेमी देंत।

28 मिनु परमप्रभु, परमप्रभु यावेमी “गो इ कली इ काइ मदाक्‍शो मुर आन गुइमी गेनुङ। गे ङोंइती मेको आन क्‍येङा रूशा, इ थुं लेश्‍शो बाक्‍ते।

29 मिनु मेकोपुकीमी इ काइ मदाक्‍शो गेय पाइनीम। इ गेय पा तशो मारेइ मारेइ योल्‍शा, इ कली शिश्रा सेल्‍शा प्रोंइनीम। मिनु शिश्रा दुम्‍तीके इ तेल्‍लेम पशो नेल्‍ल तुंइसीब। इ ग्रांग्रा दिशो पशा, तेल्‍लेम प‍तीके गे मोदेंशो दुम्‍नेवे।

30 मारदे हना गे रागी रागी नु तेल्‍लेम पा, गे मेको आन मूर्ति रे पा ग्रांग्रा दिशो सेल्‍साक्‍वे।

31 गे इ लोक्‍ब खोदेंशो पाप्‍तीवी। मोपतीके गो मेको कली गेशो श्‍येत इ कली गेनन” दे परमप्रभु यावेमी देंत

32 परमप्रभु, परमप्रभु यावेमी “गे इ लोक्‍ब आ कचौरा तूचा माल्‍नेवे। मेको ठेयब श्‍येत जतीक बाक्‍ब। गे फाल्‍ने मचाप्‍चा ङा शुक्‍शी पाइक्‍चा पुंइसीब दुम्‍नेवे। मारदे हना इ श्‍येत ठेयब दुम्‍‍ब।

33 गे दुक्‍शो दुम्‍शा सुर्ता पतीकेमी ब्रीनेवे। मेको इ लोक्‍ब सामरीया आ कचौरा शुश हिंतीक नु मुर मबाक्‍तीक बाक्‍ब। यसैया ५१:१७

34 मिनु इ लोक्‍ब खोदेंशो दुम्‍नेवे, गे मेको श्‍येत्‍थ मदुम सम्‍म तूनेवे। मिनु मेको कचौरा आ टुक्रा नाक्‍नेवे। मिनु गे इ दूध रेत्‍नेवे। मारदे हना गो एको लोव़ पाता” दे परमप्रभु, परमप्रभु यावेम देंत।

35 मोपतीके परमप्रभु, परमप्रभु यावेमी “गे आं कली प्रेंताक्‍वी। मिनु आं कली प्रोंइती। मोपतीके गे इ ग्रांग्रा दिशो गेय नु तेल्‍लेम पशो आ पर्बम सजाइ ताइक्‍नेवे” देंत। येरमीया २:३२

36 मिनु परमप्रभु यावेमी आं कली “ए मुर, गे ओहोला नु ओहोलीबा आस कली निसाफ पाइनेवे? मो हना मेको निक्‍शी आस पशो ग्रांग्रा दिशो गेय आन पर्बम मेको आस कली तुइक्‍पतो। इजीकीएल २०:४इजीकीएल २०:४

37 मारदे हना मेको निक्‍शीम हेंथे पाम्‍ताक्‍स। मिनु मेको आस गुइम हुश ख्राक्‍श पोक्‍ताक्‍स। मेकोमी आस मूर्ति नु हेंथे पाम्‍ताक्‍स। मेको निक्‍शीम आं कली जरमेशो आस तमी तौ आन कली, मूर्ति आन कली ब्‍वचा गेचा कली क्‍योरशा चढ़ेम्‍ताक्‍स। इजीकीएल १६:२०

38 मेको निक्‍शीम आं कली मार पाम्‍ताक्‍स देंशा हना, आं बाक्‍तीक ग्रांग्रा दिशो सेल्‍ताक्‍स। मिनु आं नाइक्‍तीक नाक्‍त कली अर्को नाक्‍त खोदेंशो पा सेल्‍ताक्‍स। इजीकीएल ८:५-१८

39 तेको नाक्‍ती मेको आस आल आन कली मूर्ति आन कली क्‍योरशा चढ़ेम्‍से, मेको नाक्‍तीन आं बाक्‍तीकेम ओव़ताक्‍स। मिनु ग्रांग्रा दिशो सेल्‍ताक्‍स। मेको निक्‍शीम आं खिंम मोदेंशो गेय पाम्‍ताक्‍स।

40 मेको निक्‍शीम ङोन ङा मुर आन कली लोव़ कुरब मुर सोइश्‍शा, ब्रेत्‍ताक्‍से। मिनु मेकोपुकी जाक्‍तेक्‍म। मिनु गे मेको आन पर्बम चिक्‍शा शोप्‍शा इ मिक्‍चीम गाजल ख्रेक्‍साक्‍वे। मिनु गहना पांइशा आंम कली ग्‍योम्‍साक्‍वे।

41 गे आंम दारशो खाटम बाक्‍ते। मिनु मेको आ ङोंइती आं धूप नु तेल वोइक्‍तीवी।

42 मिनु सहरम ठेयब ग्‍येरसीशो रेयके दुम्‍त। मिनु गोरशो रागी रे चाक्‍शो दुक्‍शो मुरपुकीमी मेकेर ङा मीश मुर आन कली चुरा लिक्‍ताक्‍म। मिनु आन पियाम दारशो सुन फू चुइक्‍‍ताक्‍म।

43 मिनु गोरशो रागी रे जाक्‍शो मुरपुकी मेको तेल्‍लेम पचा रूशो मीश मुर नु इप्‍तेक्‍म।

44 मारदे हना मेकोपुकी तेल्‍लेम का नु इप्‍शो खोदेंशो पा इप्‍‍तेक्‍म। ओहोला नु ओहोलीबा नु इप्‍शो मुर खोदेंशो पा जाक्‍तेक्‍म।

45 तन्‍न ठीक निसाफ पाइबम मेको आस कली ‘नाता ख्रोइक्‍ब, हुश ख्राक्‍श पोक्‍शो आ पर्बम दोस ताइनीस’ मारदे हना मेकोम हेंथे पा आस गुइम मुर साइश्‍शो हुश बाक्‍ब” देंत। इजीकीएल १६:३८,४०

46 मिनु परमप्रभु, परमप्रभु यावेमी “मेको आस पर्बम ग्रांग्‍ये माग्‍ये पोक्‍ब हुल का पोक्‍कीन। मिनु मेको आस कली शुश हिंपाइश्‍शा मारेइ मारेइ रोइश्‍शा लतीन।

47 मिनु मेको ग्रांग्‍ये माग्‍ये पोक्‍ब हुलपुकीम मेको आस कली फुल्‍लु आप्‍नीम। मिनु तरवारम क्‍योरशा साइक्‍नीम। मिनु मेकोपुकीम मेको आस तमी तौ आन कली साइक्‍नीम। मिनु मेको आन खिंम मी सुइक्‍नीम।

48 मोपा गो रागीम मेको ग्रांग्रा दिशो गेय थुम्‍पाइक्‍नुङ। एको इ खोदेंशो मपामेक्‍ल। मीश मुर नेल्‍ल आन कली हिंच कोंइतीक दुम्‍ब।

49 गे इ ग्रांग्रा दिशो गेय आ पर्बम सजाइ ताइनेवे। मिनु इ मूर्ति पूजा पशो पाप राइनेवे। मिनु गोन परमप्रभु यावे नङ, दे तुइक्‍नेवे” देंत।