Ezekiel 21 in Sunwar
1 परमप्रभु यावेमी आं कली लोव़ पाप्तु।
2 मार लोव़ पाप्तु देंशा हना “ए मुर, यरूसलेम गे कोव़शा, आं बाक्तीक आ पर्बम आं लोव़ पावो। इस्राएल रागी आ पर्बम आं लोव़ पावो।
3 मिनु इस्राएल ङा खाल्पा आन कली परमप्रभु यावेमी मार लोव़ पाप्तु देंशा हना ‘गो बारशा, आं तरवार खोत रे शोइश्शा, इन दाते ङा ठीक पाइब नु आं अरेशो लोव़ मटीब नेल्ल आन कली साइक्नुङमी।
4 मिनु गो इन दाते ङा ठीक पाइब नु आं अरेशो लोव़ मटीब नेल्ल आन कली साइक्नुङमी। मोपतीके दक्खिन रे उत्तर सम्म ङा मुर नेल्ल आन पर्बम आं तरवार खोत रे ग्रूशो बाक्ब।
5 मिनु मुर नेल्लेम गो, परमप्रभु यावेमीन आं तरवार शोइश्शो बाक्नुङ’ दे तुइक्नीम। मेको लेंशा मपिम्सीब।
6 मोपतीके ए मुर, हुकयी पावो। जिक्शो थुंम थम श्येत जशा, मेको आन ङोंइती हुकयी पावो।
7 मिनु मेकोपुकीम इ कली ‘गे मारदे हुकयी पवी’ देंतेक्म हना, मेको आन कली ‘लोव़ नेंतीके हुकयी पाता। मुर नेल्ल आन थुं बेक्शा लाइब। आन गुइ योक्ब। आन थुं ग्येत्थ लुक्च दुम्ब। मिनु मुर नेल्ल आन पोक्च बोल मपाइश्शो दुम्ब। मेको नाक्ती जाक्ना जाक्न बाक्ब। मेको थमा पा दुम्ब, दे परमप्रभु यावेमी देंशो बाक्ब’ दे माइक्मी” दे परमप्रभु यावेमी देंत। इजीकीएल ७:१७
8 परमप्रभु यावेमी आं कली लोव़ पाप्तु।
9 मार लोव़ पाप्तु देंशा हना “ए मुर, परमप्रभु यावे आ लोव़ पा, परमप्रभु यावेमी ‘तरवार का, तरवार का शेप्शा, हेश्शो सेल्शो बाक्ब। मेको टल्केशो बाक्ब।
10 मेको मुर साइक्चा कली शेप्शो बाक्ब। चिला दाप्शो खोदेंशो पा टल्केपपाइक्चा कली शेप्शो बाक्ब। दोपा ग्येरसीने चाप्नीनी? आं मुरपुकीम आं सजाइ गेतीके ममिम्तेक्म।
11 तरवार टल्केपपाइक्चा कली गेशो बाक्ब। मिनु गुइम शेशा, मेको शेप्शा टल्केपपाइश्शो बाक्ब। मेको साइक्ब कली गेशो बाक्ब।
12 ए मुर, ङाक्शा रोंका पावो। मारदे हना मेकोम आं मुर आन कली साइक्ब। मेकोम इस्राएल ङा पिप आ खिं ङा मुर नेल्ल आन कली साइक्ब। मेको नु आं मुरपुकी यो तरवारम साइक्चा पुंइसीनीम। मोपतीके गे इ कुचु तुपो।
13 गे आं गेशो सजाइ ममिम्थु, मेको श्येत मजाक्ब, दे मिम्नीनी’ देनो” दे परमप्रभु यावेमी देंत। यसैया १:५
14 मिनु परमप्रभुमी “ए मुर, आं लोव़ पावो। तरवारम खेयप निक्शी खेयप सां सम्म क्योरब। मेको तरवार मारेइ मारेइ आन कली साइक्चा कली बाक्ब। मेको बोल्यो पा क्योरचा कली बाक्ब। मेकोम एर ओंथ नेल्ल रे क्योरब।
15 मोपतीके थुं लुक्च लाइनीम। मिनु शुश गोल्नीम। मेको आन ठेयब लाप्चो नेल्लेमी हुश ख्राक्श पोक्चा कली तरवार वोइश्शो बाक्ती। मेको चिला दाप्शो खोदेंशो पा साइक्चा कली शेप्शो बाक्ब।
16 तरवार, पेरा गे क्योरो। ग्युरा गे क्योरो। तेइ तेइ लावो।
17 मिनु गो यो साइक्ना साइक्न लाइनुङ। मिनु आं चुरशो नाइक्नुङ। गो, परमप्रभु यावेमीन लोव़ पाता” देंत।
18 परमप्रभु यावेमी आं कली लोव़ पाप्तु।
19 मार लोव़ पाप्तु देंशा हना “ए मुर, बेबीलोन ङा पिप आ तरवार चाक्चा कली लां निक्शी योव़ङो। मेको लां निक्शी रागी का रे जाक्चा माल्नीस। सहर गे लतीक लां आस ङोंइती लां कोंइतीक का वोतो।
20 मेको तरवार जाक्चा कली अम्मोनी आन रब्बाह सहर, यहूदा नु गारो हिरशो यरूसलेम कली लां सेलीन।
21 मारदे हना बेबीलोन ङा पिप मेको लां निक्शी ग्रुम्तीकेम राप्ब। तेको लां लचा, दे मेकोमी लिंक्यु कोव़ब, ब्रा कली हिम्पाइक्ब। आ खिं ङा मूर्ति आन कली हिल्लो पा आ आइदी कोव़ब।
22 मेको आ ग्युरा गुइम यरूसलेम कली बाजी दुम्त। मेकेर गारो ङोइक्चा कली शी फुल्लु तेल्शा, लडाइ पचा कली, ग्रीचा कली ठेयब लाप्चो गे शी फुल्लु तेल्शा सहर पुम्चा कली, लाइश्शो खिं सेल्चा माल्नीम। इजीकीएल ४:२
23 तन्न यरूसलेम ङा मुर आन कली मेको लिंक्यु कोव़तीक दूली बाक्त, दे मिम्नीम। मारदे हना मोदेंशो मदुम्ब, दे कसम जशो लोव़ नेंशो बाक्तेक्म। तन्न परमप्रभुम मेको आन मरिम्शो पशो मिम्पाइक्ब। मिनु मेको आन कली ग्याइक्पाइक्ब।
24 मोपतीके परमप्रभु, परमप्रभु यावेमी मारदे हना इन मरिम्शो पशो मिम्पाइक्तीनी। इन हेंथे पशो नेल्ल तुइक्नीम। इन पशो पाप नेल्ल तांइसीब। गे ग्याइश्शा लाइक्चा पुंइसीनीनी।
25 गे काइ मरिम्शो नु आं अरेशो लोव़ मटीब इस्राएल ङा सासन पाइब इ नाक्त जाक्त। इ नोले ङा सजाइ ततीक नाक्त जाक्त।
26 मेको आ पिया रे गुप्तीक पुतीन। मेको आ सिरपेच पुतीन। मुल दुम्शो खोदेंशो पा, लेंशा मदुम्ब। आइक्च आन कली ठेयब सेलीन। मिनु ठेयब आन कली आइक्च सेलीन। प्रस्थान २८:४; लूका १८:१४
27 मारेइ मारेइ ब्रेश्शो बाक्ब। मेको गो पाता। मेको मोदेंशो गेनायो मदुम्शो बाक्त। मेको सासन पचा कली शिरशो दुम्शा जाक्त हना, मेको कली गेनुङ” देंत। उत्पत्ती ४९:१०
28 ए मुर, गे चहिं आं लोव़ पावो। गो, परमप्रभु, परमप्रभु यावेमी अम्मोनी नु मेको आन शुक्शी पशो आ पर्बम मार देंनुङ देंशा हना “साइक्चा कली तरवार शोइश्शो बाक्ब। साइक्चा कली शेप्शा टल्केशो बाक्ब। मेको चिला खोदेंशो पा दाप्ब बाक्ब। इजीकीएल २५:२-७
29 इन पर्बम जोल पा कोंइतीके ताम्तेक्म। इन पर्बम दूली पा लिंक्यु कोव़तेक्म। मेको मरिम्शो पाइब नु परमप्रभु यावे आ अरेशो लोव़ मटीब नु साइक्चा पुंइसीनीम। मेको आन नाक्त जाक्शो मुर आन कली मोदेंशो पशो बाक्ब। मेको आन नोले ङा सजाइ ततीक नाक्त जाक्शो बाक्ब।
30 मेको तरवार आ खोतम पिप्तीन। गो इन कली इन जरमेशो रागीम निसाफ पाइनुङ।
31 गो आं गाइश्शो इन तार मोइक्नुङ। आं चुरशो मी मुइश्शो खोदेंशो पा गो इन तारी मोइक्नुङ। गो इन कली साइक्चा कली हुश ख्राक्श पोक्ब नु सांइस जोक्ब आन गुइम जिम्मा गेनन्नी।
32 गे मी कली शी दुम्नीनी। इन हुश खपीम शाइक्ब। इन कली लेंशा गेनायो ममिम्नीम। मारदे हना गो, परमप्रभु यावेमी एको लोव़ पाता” देंत।