Ezekiel 11 in Sunwar
1 मिनु सोक्तीम आं कली क्युक्शा, परमप्रभु यावे आ खिं ङा पूर्ब गे ङा लाप्चोम चाक्ती। मेको पूर्ब गे कोव़शो बाक्त। मिनु मेको आगा ओव़तीकेमी २५ जना मुर बाक्तेक्म। गो मेको आन दातेम इस्राएल ङा ठेयब मुर अज्जुर आ तौ याजन्याह नु बेनायाह आ तौ पेलात्याह आस कली यो तातासी। इजीकीएल ३:१२
2 मिनु परमप्रभु यावेमी आं कली “ए मुर, मेकोपुकीम एको सहरम मरिम्शो पचा कली नु परमप्रभु यावे आ अरेशो लोव़ मटिचा कली अर्ती गेशा शेंशो बाक्तेक्म।
3 मेकोपुकीम ‘खिं सेल्तीक नाक्ती रीब पा मजाक्बा कों? एको सहर कराइ खोदेंशो बाक्ब। मिनु गो चहिं श्ये बाक्नय’ देंनीम। इजीकीएल २४:३-१४
4 मोपतीके ए मुर, मेको आन पर्बम नोले दुम्ब लोव़ पावो। आं देंशो लोव़ पावो” देंत।
5 मिनु परमप्रभु यावे आ सोक्त आं तार जाक्त। मिनु मेकोम आं कली “परमप्रभु यावेमी ‘ए इस्राएल आ खिं ङा मुर, गे मार मिम्शो बाक्नीनी, गो मेको नेल्ल तुइक्नुङ।
6 गेपुकीम एको सहरम शुश मुर आन कली साइश्शा, आ लां नेल्ल बेक्शो मुरुम प्रिंपाइक्तीनी’ देंत।
7 मोपतीके परमप्रभु, परमप्रभु यावेमी ‘गे सहरम साइश्शा इन ताइश्शो मुर श्ये बाक्नीम। मिनु एको सहर कराइ बाक्ब। तन्न गो इन कली सहर रे ग्रुंइनुङ।
8 गेपुकी तरवार तशा हिंतीनी। तन्न गो इन पर्बम तरवार चाक्शा साइक्पाइक्नन्नी।
9 गो इन कली सहर रे ग्रुंइनन्नी। मिनु अर्को रागी ङा मुर आन गुइम गेनन्नी। मिनु इन कली निसाफ पाइक्नुङ।
10 गेपुकी तरवारम साइक्चा पुंइसीशा गोल्नीनी। गो इन कली इस्राएल आ सांदम निसाफ पाइनुङ। मिनु गेपुकीम गोन परमप्रभु यावे नङ, दे तुइक्नीनी। २राजा २५:२०-२१
11 एको सहर इन कली कराइ मदुम्ब। मिनु गे मेको कराइ ङा श्ये मदुम्नीनी। गो इन कली इस्राएल आ सांदम निसाफ पाइनुङ।
12 मेना गेपुकीम गो परमप्रभु यावे नङ, दे तुइक्नीनी। गेपुकीम आं फुल्लु मुशा ब्रेक्शो लोव़ मटिनी। आं निसाफ पतीक लोव़ यो मटिनी। तन्न गे इन एर ओंथ बाक्ब रागी रागी ङा मुर आन पतीक लोव़ पाइतीनी’ ” दे परमप्रभु यावेमी देंत।
13 गो परमप्रभु यावे आ लोव़ पना पन बाक्ङानु, बेनायाह आ तौ पेलात्याह बेक्त। मिनु गो खुम्की पा बाप्शा ठेयब सेंदा पा “परमप्रभु, परमप्रभु यावे, मार, गे इस्राएल ङा लीशो नेल्ल आन कली साइक्नीनी?” देंती। इजीकीएल ९:८
14 मिनु परमप्रभु यावेमी आं कली लोव़ पाप्तु।
15 मार लोव़ पाप्तु देंशा हना “ए मुर, इ लोक्बपुकी, इ खिं ङा मुर, ग्याइश्शा लाइक्चा पुंइसीशो इ लोक्बपुकी, इस्राएल आ खिं ङा मुर नेल्ल आन पर्बम यरूसलेमम बाक्ब मुरपुकीमी ‘मेकोपुकी परमप्रभु यावे रे ङोन लाम्तेक्म। मोपा एको रागी इं कली अधिकार पचा कली गेशो बाक्त’ देंशो बाक्तेक्म” देंत।
16 मोपतीके परमप्रभु, परमप्रभु यावेमी “गो मेको आन कली ङोन रागी रागी ङा मुर आन दातेम सोइक्ताक्ङमी। गो मेको आन कली राज्य राज्य आन दातेमी फ्रात हना यो, इच्का नाक्ती सम्म मेको आन परमप्रभु दुम्ती। इजीकीएल ६:८-१०
17 मोपतीके गे मेको आन कली ‘गो इन कली जात जात ङा मुर आन दाते रे खुप्नन्नी। मिनु ब्रशा लशो रागी नेल्ले रे पा खुप्नन्नी। मिनु गो इन कली इस्राएल रागी गेनन्नी। येरमीया २४:५-६; येरमीया २९:२४
18 मिनु मेकोपुकी लेश्शा जाक्शा, मेकेर ङा ग्रांग्रा दिशो थोव़क नु मूर्ति नेल्ल ग्रुंइशा ताइक्नीम।
19 मिनु गो मेको आन कली थुं का ङा दुम्पाइक्नुङमी। मिनु मेको आन आगामी नक सोक्त का कुरपाइनुङ। मिनु गो मेको आन फुल्लु खोदेंशो थुं ग्रुंइशा, श्ये के थुं कुरपाइनुङमी। इजीकीएल ३६:२६; येरमीया २४:७
20 मिनु मेकोपुकीमी आं फुल्लुम मुशा ब्रेक्शो लोव़ पशा, आं निसाफ पतीक लोव़ टीनीम। मिनु मेकोपुकी आं मुर दुम्नीम। मिनु गो मेको आन परमप्रभु दुम्नुङ। इजीकीएल १४:११; येरमीया ७:२३
21 तन्न मेको आन ग्रांग्रा दिशो मारेइ मारेइ मूर्ति आन नोले खोइक्ब आन कली आन पशो नेल्ल आन पियामीन मोइक्नुङमी, दे परमप्रभु, परमप्रभु यावेमी देंत’ दे मतो” देंत।
22 मिनु नोले आ नेक्था गुगील बाक्शो करूबमी आन फ्रां प्राक्तेक्म। मेना इस्राएली आन परमप्रभु आ छेङछेङ मेको आन तार बाक्त। इजीकीएल १:२८
23 मिनु परमप्रभु यावे आ छेङछेङ सहर आ दाते रे क्युक्सीशा इर गे लत। मिनु सहर ङा पूर्ब गे बाक्शो पहाड तार दिक्त।
24 मिनु परमप्रभु यावे आ सोक्तीम आं कली इर क्युक्ती। मिनु कोंइतीके कोंइशोमी आं कली कल्दी रागीम ग्याइश्शा लाइक्चा पुंइसीशो आन बाक्तीकेम चाक्दीत्ती। मिनु नोले मेको कोंइतीके आं रे इर गे लाक्तु। इजीकीएल ३:१२
25 मिनु गो ग्याइश्शा लाइक्चा पुंइसीशो आन कली परमप्रभु यावे आ लोव़ नेल्ल शेंताक्ङमी।