Exodus 33 in Sunwar

1 मिनु परमप्रभु यावेमी मोसा कली “इजीप्‍त रे ग्रुंइशा, एक चाक्‍शो मुरपुकी नु आं देंशो रागी लावो। मेको रागी आ पर्बम गो ‘इ चच युइ आन कली गेनुङ’ दे अब्राहाम, इसहाक नु याकूब नु कसम जाता। उत्‍पत्ती १२:७

2 आं स्‍वर्ग ङा गेय पाइब इन ङोंइङोंइती सोइक्‍नुङ। मिनु गो कनानी, एमोरी, हित्ती, परि‍ज्‍जी, हिव्‍वी नु यबुसी आन कली खेरनुङमी। प्रस्‍थान २३:२०

3 मेको रागीम दूध नु खुदो शुश बाक्‍ब। मारेइ मारेइ यो शुश ग्रेल्‍ब। गेपुकी काइ मटीब मुर बाक्‍नीनी। मोपतीके गो गेपुकी नु मगाक्‍नुङ। गो गाक्‍ती हना, इन कली लांमीन साइक्‍नन्‍नी” दें‍त।। प्रस्‍थान ३२:९-१०

4 मिनु मुरपुकीमी मेको मरिम्‍शो लोव़ नेंशा, सुर्ता पाम्‍तेक्‍म। सुइमी आन सुन चांदी मारेइ मपांइसम।

5 मारदे हना परमप्रभु यावेमी मोसा कली “इस्राएली आन कली ‘गेपुकी काइ मटीब मुर बाक्‍नीनी। गो याम का गे नु गाक्‍ती हना, नेल्‍ल इन कली साइक्‍नन्‍नी। मुल इन सुन चांदी नेल्‍ल प्रुतीन। मिनु इन कली मार पचा माल्‍नुङा, दे मिम्‍नुङ’ ” देंशो बाक्‍त। योएल २:१३

6 मोपतीके होरेब डांडाम बाक्‍मा रे इस्राएलीपुकीमी सुन चांदी मपांइसम।। योना ३:६

7 मिनु मोसामी अरु आन बाक्‍तीक क्‍येङा ङोन ताम्‍बु का कीशा वोइक्‍तु। मेको ताम्‍बु कली परमप्रभु नु लोव़ पतीक ताम्‍बु दें‍त। सु सु परमप्रभु यावे कली ग्रुम्‍चा दाक्‍तमे, मेको मुर आन बाक्‍तीक रे ग्रूशा, मेको परमप्रभु नु लोव़ पतीक ताम्‍बु लाइबाक्‍तेक्‍म। प्रस्‍थान २९:४२

8 मिनु मोसा मेको परमप्रभु नु लोव़ पतीक ताम्‍बु लमेनु, मुर नेल्‍ल बोक्‍शा, आन ताम्‍बु आ ओव़तीकेम राप्‍शा, मोसा मेको ताम्‍बु मओव़म सम्‍म, कोव़शा बाक्‍तेक्‍म।

9 मिनु मोसा मेको ताम्‍बु आगा ओव़मेनु, गोस्‍स के थाम यिशा, ताम्‍बु आ ओव़तीकेम राप्‍शो ताम्‍तेक्‍म। मिनु परमप्रभु यावेमी मोसा नु लोव़ पाप्‍तु। गन्‍ती ११:२५; ब्‍यवस्‍था ३१:१५

10 मुर नेल्‍लेमी मेको गोस्‍स के थाम, ताम्‍बु आ ओव़तीकेम राप्‍शो ताम्‍तेक्‍म। मिनु मुर नेल्‍ल बोक्‍शा आंम आंम ताम्‍बु आ ओव़तीकेमी बाप्‍शा, परमप्रभु कली मान पा ठेयब सेल्‍तेक्‍म।

11 मिनु परमप्रभु यावे नु मोसा कोव़मुशा, लोव़ पाम्‍ताक्‍स। दोदेंशो पा मुर आन वारच नु बाक्‍शा, लोव़ पाइनीमी, मोदेंशो पा लोव़ पाम्‍ताक्‍स। मिनु मोसा लेश्‍शा, आ ताम्‍बुम लत। आ गेय पाइब ठिटा, नून आ तौ यहोसु चहिं ताम्‍बु उइ बाक्‍त। प्रस्‍थान ३३:२०; गन्‍ती १२:८; ब्‍यवस्‍था ३४:१०

12 मिनु मोसामी परमप्रभु यावे कली “कोव़ङीन, गे आं कली ‘एको मुर आन कली लतो’ देंतीनी, तन्‍न गो नु सु सु सोइक्‍नीनी, गे आं कली मतुइक्‍पाइय्‍यीनी। मो हना यो, गे आं कली ‘इ नें कली तुइक्‍नुङ। मिनु इ कली दाक्‍नुङ’ देंतीनी। प्रस्‍थान ३३:२,३,१७

13 मोपतीके गे आं कली दाक्‍ताक्‍नी हना, आं कली इन लां कोंइदीने। गो इन कली तुइक्‍ने चबुल। गो इन ङोंइती शिशी तङल। एको जात ङा मुरपुकी इन मुर नम, दे मिम्‍तीने” दें‍त। भजन संग्रह १०३:७

14 मिनु परमप्रभुमी “गो गे नु लाइनुङ। मिनु इ थुं नाइक्‍चा गेनुङ” दें‍त। यसैया ६३:९; यहोसु २१:४४; हिब्रू ४:९

15 मिनु मोसामी “गे गो नु मलाइतीनी हना, आंइ कली एक रे मसोइक्‍तीन।

16 गो नु इन मुरपुकीमी इन ङोंइती शिशी तशो बाक्‍नीकी, दे गो दोपा तुइक्‍नीकी? गे गो नु लाइतीनी हना ला, तुइक्‍नीकी। मोपा ला गो नु इन मुरपुकी रागी ङा मुरपुकी नु खाल का ङा मदुम्‍नीकी” दें‍त। ब्‍यवस्‍था ४:६-८

17 मिनु परमप्रभु यावेमी मोसा कली “गो इ देंशो पाइनुङ। मारदे हना गो इ कली दाक्‍नुङ। मिनु इ नें यो तुइक्‍नुङ” दें‍त। प्रस्‍थान ३३:१२; यसैया ४३:१; २तिमोथी २:१९

18 मिनु मोसामी “गे आं कली इन छेङछेङ तपाइय्‍यीनी” दे पुंइतु। यूहन्‍ना १:१४; २कोरिन्‍थी ३:१८

19 मिनु मेकोमी “गो इ ङोंइती रे लाइनुङ, आं गेना हना यो दाक्‍तीक कोंइनन। इ ङोंइती आं नें ‘यावे, देंना देंन गाक्‍नुङ’ सु सु आन कली शिशी पचा दाक्‍ङा, मेको आन कली शिशी पाइनुङ। सु सु आन कली दाक्‍चा दाक्‍ङा, मेको आन कली दाक्‍नुङ” दें‍त। रोमी ९:१५

20 मिनु मोसा कली “गे आं कुल कोव़ने मचाप्‍नेवे। मारदे हना आं कुल तामेनु, मुर बेक्‍नीमी” दें‍त। प्रस्‍थान २४:११; उत्‍पत्ती ३२:३१; न्‍यायाधीस ६:२२-२३; न्‍यायाधीस १३:२२-२३; यसैया ६:५; यसैया ३३:१४; १तिमोथी ६:१६

21 मिनु लेंशा परमप्रभु यावेमी मोसा कली “कोव़ङो, आं बाक्‍तीकेम सेरथे फुल्‍लु का बाक्‍ब, गे मेको तार रपो। १राजा १९:८-१३

22 आं छेङछेङ मेकेर रे लमेनु, गो इ कली मेको सेरथे फुल्‍लु आ काक्‍पेमी ख्रुइश्‍शा वोइक्‍नन। गो मलाक्‍गु सम्‍म इ कली आं गुइमी सुम्‍शा वोइक्‍नन। प्रस्‍थान ३४:५-६; प्रस्‍थान २४:११;

23 नोले आं गुइ क्‍युक्‍नुङ। मिनु गे आं ची ताइनेवे। आं कुल चहिं मताइनेवे” दें‍त।