Exodus 27 in Sunwar
1 मिनु बोल्यो शी के चढ़ेतीक का सेल्चा माल्नेवे। मेको ५ कुबीत लाइश्शो नु ५ कुबीत ब्रेम्शो दुम्चा माल्ब। ४ पाटे नु कुबीत सां ग्येत्थ लाइश्शो दुम्चा माल्ब। कुबीत का ०.५ मिटर देंशो बाक्ब।
2 आ ४ सुरमी ४ ओटा ग्रोव़ ग्रूपाइक्चा माल्नेवे। ग्रोव़ नु चढ़ेतीक सेल्चा कली फलेक का केन दुम्चा माल्ब। मेको नेल्ल कांसाम गिल्पाइक्चा माल्नेवे। लेवी १६:१८; १राजा १:५; भजन संग्रह ११८:२७
3 चढ़ेतीके कली माल्शो मारेइ मारेइ कांसा के सेल्पाइक्चा माल्नेवे। पुलु वोइक्तीक बोसपुकी, पुलु ताप्तीकपुकी, ब्रुइक्तीक बोसपुकी, श्ये ग्रुंइतीक कांटापुकी नु मी कोइला कुर पतीकपुकी सेल्पाइक्चा माल्नेवे।
4 मिनु गे मी तिक्तीक कांसा के जाली सेल्पाइक्चा माल्नेवे। मिनु जाली आ ४ सुरमी ४ ओटा मुन्द्रा सेल्पाइक्चा माल्नेवे।
5 मेको जाली चढ़ेतीक उइ गे नु इर गे आ दातेम वोइक्पाइक्चा माल्नेवे।
6 मिनु चढ़ेतीक कली यो बोल्यो शी के कांसाम गिल्शो कुरतीक कोक्के निक्शी सेल्पाइक्चा माल्नेवे।
7 मेको चढ़ेतीक आ निम्फा पटटी ङा मुन्द्रामी कोक्के शुइश्शा, कुरने चाप्नीम।
8 मेको चढ़ेतीक फलेक के सेल्पाइक्चा माल्नेवे। पुं नु सुम्तीके मपाइश्शो सन्दोस खोदेंशो पा सेल्पाइक्चा माल्नेवे। डांडामी इ कली कोंइशो खोदेंशो पा सेल्पाइक्चा माल्नेवे। प्रस्थान २६:३०;
9 मिनु ताम्बु आ लाङगा थरपु हिरचा कली रिम्शो पा किरशो सुती श्येले के फारतीके प्रोव़पाइक्चा माल्नेवे। मेको फारतीके दक्खिन गे सहे का कुबीत लाइश्शो दुम्चा माल्ब। कुबीत का ०.५ मिटर खोदेंशो बाक्ब।
10 मेको फारतीक ग्याइक्पाइक्चा कली खाल का ङा थाम, खाल का ङा कांसा के राप्पाइक्तीके, मुन्द्रापुकी नु कोक्केपुकी चहिं चांदी के सेल्पाइक्चा माल्नेवे।
11 मिनु मोदेंशो पा उत्तर गे यो सहे का कुबीत लाइश्शो फारतीक प्रोव़पाइक्चा माल्नेवे। मेको कली २० ओटा थाम, २० ओटा कांसा के राप्पाइक्तीके, मेको मुन्द्रापुकी नु कोक्केपुकी चहिं चांदी के सेल्पाइक्चा माल्नेवे।
12 लाङगा ङा पच्छिम गे ब्रेम्शो कली ५० कुबीत लाइश्शो फारतीक माल्ब। आ थाम नु आ राप्पाइक्तीक १०, १० ओटा दुम्चा माल्नीम। कुबीत का ०.५ मिटर खोदेंशो बाक्ब।
13 लाङगा आ पूर्ब, नां दाप्तीके गे फारचा कली यो ५० कुबीत ब्रेम्शो दुम्चा माल्ब।
14 मिनु ओव़तीक ङा पटटी का कली १५ कुबीत ङा फारतीक दुम्चा माल्ब। थाम नु आ राप्पाइक्तीके सां सां दुम्चा माल्नीम।
15 मिनु अर्को पटटी यो मोदेंशो पा १५ कुबीत ङा फारतीक, थाम नु राप्पाइक्तीके सां सां दुम्चा माल्नीम।
16 मिनु लाङगा ओव़तीके कली २० कुबीत ङा नीलो, प्याजी, श्येले नु रिम्शो पा किरशो सुती श्येले के प्रोव़शो फारतीक माल्ब। मेको फारतीक कली लूजेम बुटा आप्पाइक्चा माल्नेवे। ओव़तीके कली थाम नु राप्पाइक्तीके ४, ४ ओटा दुम्चा माल्नीम।
17 लाङगा एर ओंथ ङा थाम नेल्ल चांदीमी गिल्शो कोक्केमी ग्याइक्पाइश्शो दुम्चा माल्नीम। मुन्द्रा चांदी के नु आन राप्पाइक्तीक कांसा के दुम्चा माल्नीम।
18 मेको लाङगा आ पित्थ लाइश्शो सहे का कुबीत, आ ब्रेम्शो ५० कुबीत नु आ फारतीके ग्येत्थ ५ कुबीत दुम्चा माल्ब। मिनु फारतीक वा नेल्ल रिम्शो पा किरशो सुती श्येले के प्रोव़शो वा के दुम्चा माल्ब। थाम आन राप्पाइक्तीके कांसा के दुम्चा माल्नीम।
19 मिनु ताम्बु ङा नाक्त किंत किंत गेय पचा कली माल्शो मारेइ मारेइ कांसा के दुम्चा माल्नीम। किलापुकी नु लाङगा ङा किला नेल्ल यो कांसा के दुम्चा माल्नीम।
20 मिनु गे इस्राएली आन कली ‘गे नेल्ल क्येङा रिम्शो तेल रवा आ फल के ख्राक्शो तेल चाक्कीन। मेको बत्ती गेना हना यो ब्रशा बाक्ल’ दे माइक्मी। लेवी २४:२-४
21 मिनु ग्रुम्तीक ताम्बु आगामी, कबल ङा सन्दोस बाक्शो नेल्ल क्येङा चोव़खो कोठा फारतीक आ ङोंइती हारून नु आ तौपुकीमी नाक्दो रे सुनी सम्म मेको बत्ती दातीक परमप्रभु यावे आ ङोंइती ब्रशा बाक्ल, दे ठीक सेल्चा माल्नीम। मेको इस्राएली आन चच युइ आन कली गेना हना यो पतीके लीचा माल्ब। मेको गेना हना यो पचा माल्नीम।