Exodus 2 in Sunwar
1 लेवी आ थर ङा मुर का बाक्माक्त। मिनु मेकोमी लेवी आ थर ङा मीश आल का ग्युंबे पवा बाक्त। प्रस्थान ६:२०
2 मिनु मेको मीश मुरुमी तमी का नु तौ का थिमाक्त। नोले लेंशा आल कुरशा, तौ का थिमाक्त। आ थिशो तौ कली तशा “शुश दारशो आल बाक्ब” दे महिना सां सम्म ख्रुइश्शा वोदा बाक्त। प्रेरित ७:२०; हिब्रू ११:२३
3 मिनु नोले आल आ ममामी महिना सां ङा आल कली ख्रुइक्ने मचबा बाक्त। मिनु आल कली सुम्तीके पाइश्शो ग्युर सेल्शा, ब्वाक्कु मओव़चा ङा पा अल्कत्राम सिल्दा बाक्त। मिनु मेको आ तौ कली ग्युरुम कुर पा खोला आ नेक्था ङा बुदी मीलु घांस आगा, ब्वाक्कुम वोदा बाक्त।
4 मिनु मेको आल आ दिदी “आं लोक्ब कली मार दुम्मे” दे ङोन रे कोव़दीम्माक्त। गन्ती २६:५९
5 मेना पिप आ तमी खोलाम चिक्चा कली जाक्दीम्माक्त। आ गेय पाइबपुकी यो खोला आ नेक्था लमा बाक्त। मिनु पिप आ तमीमी बुदी मीलु घांस आगा, ब्वाक्कुमी मेको ग्युर तशा, आ गेय पाइब का कली “मेको ग्युर ब्रथ लावो” दे सोइक्ता बाक्त।
6 मिनु पिप आ तमीमी मेको सुम्तीक पाइश्शो ग्युर रोक्शा कोव़ङानु “ए, आल का बाक्त” देंमाक्त। मिनु आल ङाक्माक्त। मेको आल तशा, शिशी पवा बाक्त। मिनु पिप आ तमीमी “एको हिब्रू ङा मुर आ तौ का बाक्ब” देंमाक्त।
7 मिनु आल आ दिदीमी “गो इन कली हिब्रू दूध तुंइब मीश मुर का चाक्गु? आल कली दूध तुंइबा कों” दे हिल्लो पवा बाक्त।
8 मिनु फाराओ आ तमीमी “लो, चाक्को” दे मीश आल कली देंमाक्त। मिनु मेको मीश आलम आ ममा ब्रथ लमाक्त।
9 मिनु फाराओ आ तमीमी मेको मीश मुर कली “एको आल आं कली थुलो। एको आल थुल्शो ङा, इ कली क्येट गेनुङ” दे लोव़ पवा बाक्त। मिनु मीश मुरुमी आल लाइश्शा, थुला बाक्त।
10 मेको नोले आल कोल्माक्त। मिनु काबु मेकोमी मेको आल फाराओ आ तमी कली लाइश्शा, गेवा बाक्त। मिनु आ तौ खोदेंशो दुम्माक्त। मिनु पिप आ तमीमी मेको आ नें मोसा वोदा बाक्त। मारदे हना “गो मेको कली ब्वाक्कु रे ग्रुंइताक्ङ” देंमाक्त। मोसा आ अर्थ हिब्रू लोव़मी “ब्वाक्कु रे ग्रुंइशो” देंशो बाक्ब।
11 मिनु नोले मोसा ठेयब दुम्शा, आ लोक्ब आन कली ग्रुम्थ लशा, आन श्येत जशो ताप्तु। मेकोमी इजीप्त रागी ङा मुरुमी आ हिब्रू लोक्ब का कली तुप्शो ताप्तु। प्रेरित ७:२३-२९; हिब्रू ११:२४-२७
12 मिनु मोसामी एर ओंथ कोव़शा, सुइ मबाक्शो तशा, इजीप्त ङा तुप्ब मुर कली साइक्तु। मिनु बाल्वामी थिम्तु।
13 आ दीसा मोसा लेंशा हिरथ लमेनु, हिब्रू निक्शी जिशा तुम्मुशो ताप्तु। मिनु मोसामी मरिम्शो पाइब कली “मारदे आंम लोक्ब कली तुबी?” दे हिल्लो पाप्तु।
14 मिनु मेकोमी “सुमी इ कली आंस होव़प नु निसाफ पाइब सेला? इजीप्त ङा मुर कली साइश्शो खोदेंशो पा आं कली यो सदु, देंने?” देंत। मिनु मोसामी “मुल एको लोव़, मुर नेल्लेमी तुइक्नीमी” दे मिम्शा हिंत। प्रेरित ७:३५
15 मिनु फाराओमी “मोसाम इजीप्त ङा मुर का साइक्तु” देंशो नेंशा, मोसा कली साइक्चा माल्तु। मोसा चहिं फाराओ आ बाक्तीक रे प्रोक्शा, मिदयान रागी जाक्दीश्शा, इनार तारी निश्शा बाक्त।
16 मिनु मिदयान रागीमी ७ जना तमी बाक्शो नाक्सो का बाक्माक्त। मेको मीश आलपुकीमी आन आफ आ क्यारश भेडा आन कली ब्वाक्कु तुंइचा, दे शुंगु ब्वाक्कुम प्रिंचा कली, ब्वाक्कु कीतेक्म। प्रस्थान ३:१
17 तन्न अरु गोठलापुकी जाक्शा, मेको आन कली श्येत गेम्तेक्म। मोसामी चहिं मेको मीश आल आन कली वारच पा, आन भेडा आन कली ब्वाक्कु तुंइताक्व।
18 मिनु मेको आन आफ रूएल आ खिं जाक्दीम्मानु, मेकोमी आ तमी आन कली “मुलाक्ती गे दोपा रीब पा जाक्नी?” दे हिल्लो पवा बाक्त।
19 मिनु मेको आ तमीपुकीमी “इजीप्त रागी ङा वोंइश मुर कामी आंइ कली गोठला आन गुइ रे प्रोंइतु। मिनु शुश ब्वाक्कु कुर पा आंइ क्यारश भेडा आन कली तुंइताक्व” दे आन आफ कली मदमे बाक्त।
20 मेकोमी आ तमी आन कली “मेको मुर ते बाक्मे? एक मारदे मचाक्नी? मुल गो नु जथ ब्रेत्तीने” दे माइक्मी बाक्त।
21 मिनु मोसा मेकोपुकी नु बाक्चा बिस्साक्व। रूएलमी मोसा कली आ तमी सिप्पोरा ग्युंबे पा गेप्तु। गन्ती १२:१
22 मिनु नोले तौ का थिप्तु। मिनु मोसामी मेको आल आ नें गेरशोम वोइक्तु। मारदे हना “गो मतुइश्शो रागीमी अर्को रागी ङा मुर दुम्ती” देंत। प्रस्थान १८:४
23 मिनु शुश बर्स नोले इजीप्त रागी ङा पिप बेक्माक्त। इस्राएल जात ङा मुर इजीप्त रागीम वाइलीम वाइल खोदेंशो दुम्शा, शुश श्येत जशा, परमप्रभु कली “वारच पाइय्यीकी” दे पुंइशा ङाक्मा बाक्त। मिनु परमप्रभुमी मेको आन ङाक्शो नेना बाक्त।
24 मिनु परमप्रभुमी अब्राहाम, इसहाक नु याकूब नु कबल पशो मिम्ता बाक्त। उत्पत्ती १५:१८; उत्पत्ती २६:३; उत्पत्ती २८:१३-१४
25 मिनु परमप्रभुमी आन श्येत जशो तशा शिशी पवा बाक्त।