Exodus 15 in Sunwar
1 मिनु नोले मोसा नु इस्राएलीपुकीमी परमप्रभु यावे कली कुम्सो पाम्तेक्म। “गो परमप्रभु यावे कली कुम्सो पाइनुङ। मारदे हना मेकोमी आ ठेयब सक्ति कोंइशा, ग्रात। शारा नु शारा ङोइक्ब आन कली समुन्द्रमी ताइक्ताक्व। प्रकाश १५:३
2 यावे आं सक्ति बाक्ब। आं कली कुम्सो पपाइक्ब। मारदे हना आं कली आ जोरी सत्रु रे प्रोंइती। मेको आं परमप्रभु बाक्ब। मिनु गो मेको कली ठेयब सेल्नुङ। परमप्रभु आं आफ आ परमप्रभु बाक्ब। मिनु गो मेको कली मान पाइनुङ। भजन संग्रह ११८:१४; यसैया १२:२
3 परमप्रभु यावे लडाइ पाइब बाक्ब। मेको आ नें परमप्रभु यावे बाक्ब। प्रस्थान १४:१४; भजन संग्रह ४६:१०; प्रस्थान ३:१५
4 मेकोमी इजीप्त ङा फाराओ आ बग्गीपुकी नु आ लडाइ पाइब आन कली लल समुन्द्रमी योल्पाइक्तु। ठेयब कप्तान नेल्ल आन कली ब्वाक्कुम ग्रुम्पाइक्तु।
5 समुन्द्र ङा ब्वाक्कुमी मेको आन कली सुम्तु। मेकोपुकी फुल्लु खोदेंशो पा आगा ग्रुम्तेक्म।
6 परमप्रभु यावे, इन सक्ति ठेयब बाक्ब। इन सक्तिमी इन जोरी सत्रु आन कली थुम्पाइक्तीनी।
7 इन जोरी सत्रुमी गे नु लडाइ पामेनु, गे इन ठेयब दुम्तीकेमी मेको आन कली ग्रातीनी। मिनु गाइश्शा मेको आन कली मीम भूस चोशो खोदेंशो पा थुम्पाइक्तीनी।
8 इन नेंमी मुइश्शा, समुन्द्र ङा ब्वाक्कु कली ग्येत्थ गे पोक्तीनी। समुन्द्र गारो बुदी सोजो पा ग्येत्थ गे बोक्शा, आ पुं चहिं सोव़शो लां दुम्त। यसैया ५१:१०
9 आंइ जोरी सत्रुमी ‘मेको आन कली खेदा पा, ब्रो ब्रु थित्नय। गो ग्येरशा, इं ग्राशो थोव़क योक्मुइनय। इं तरवार शोइश्शा, नेल्ल आन कली साइक्नय’ देंतेक्म।
10 गे चहिं फश पपाइक्तीनी। मिनु समुन्द्रमी मेको आन कली सुम्तीमी। मेकोपुकी फलाम खोदेंशो पा ठेयब समुन्द्रम ग्रुम्तेक्म।
11 परमप्रभु यावे, देवी देवता आन दातेमी इन खोदेंशो ठेयब सुइ मबाक्नीम। इन खोदेंशो सक्ति पाइश्शो, ठेयब मान ताइब सुइ मबाक्नीम। इन ठेयब गेय हिंचा ङा बाक्ब। गे छक लाक्चा ङा गेय पाइब बाक्नीनी। प्रस्थान ८:६; प्रस्थान १८:११; भजन संग्रह ८६:८
12 इन ग्युरा गुइ दिंनीनु, रागीम मेको आन कली दाक्तु।
13 गे इन ग्रुंइशो मुर आन कली गेना हना यो शिशी पा, लां कोंइताक्नी। मेको आन कली इन सक्तिमी इन आंम बाक्तीकेम खुल्तीनी।
14 जात जात ङा मुरपुकी इन लोव़ नेंशा शुश हिंतेक्म। पलिस्ती रागी ङा मुरपुकी हिंशा, ख्रिंख्रि पाम्तेक्म। यहोसु २:९-११
15 मुल एदोम रागी ङा ठेयब मुरपुकी हिंतेक्म। मोआब रागी ङा ठेयब मुरपुकी हिंशा ख्रिंख्रि पाम्तेक्म। कनान रागीम बाक्बपुकीम आन सक्ति साम्तेक्म।
16 परमप्रभु यावे, इजीप्त रागी रे इन ग्रुंइशो मुरपुकी मजाक्दीम्मा सम्म मेको आन जोरी सत्रु इन सक्ति ङा गेय तशा, हिंशा फुल्लु खोदेंशो पा सिक्सी पा बाक्तेक्म। मोपा हिंशा मेको आन थुं लुक्च लत।
17 गे इन मुर आन कली आन रागी ओंइनीनी। मिनु इन आंम बाक्तीक डांडाम बाक्पाइक्नीनी। परमप्रभु यावे, मेको इन बाक्तीके आंमा सेल्तीनी। इन आंम बाक्तीक खिं गे आंमा सेल्तीनी। भजन संग्रह ७८:५४
18 परमप्रभु यावे गेना हना यो पिप बाक्ब” दे कुम्सो पाम्तेक्म। भजन संग्रह ९३:१
19 फाराओ आ बग्गी नु शारा ङोइक्बपुकी समुन्द्र ङा लां लाम्तेक्म। परमप्रभु यावेमी समुन्द्र ङा ब्वाक्कु लेंशा लेप्पाइश्शा, मेको नेल्ल आन कली योल्पाइक्तु। इस्राएली चहिं समुन्द्र ङा सोव़शो लां रे पा गाक्तेक्म। प्रस्थान १४:२२-२९
20 हारून आ समी मिरयाम परमप्रभु आ लोव़ पाइब यो बाक्त। मेकोमी खैजडी ताप्शा, कुम्सो पथ लमेनु, अरु मीश मुरपुकी यो खैजडी ताप्शा, सिल पना पन मेको आ नोले खोइक्तेक्म। भजन संग्रह ६८:२६
21 मिरयामम मेको आन कली कुम्सो पा लोव़ लेश्शा “परमप्रभु यावे कली कुम्सो पने। मारदे हना मेकोम ठेयब लडाइ पा ग्रात। शारा नु शारा ङोइक्ब आन कली समुन्द्रम ताइक्ताक्व” दे कुम्सो पाप्तु।
22 मिनु मोसामी इस्राएली आन कली लल समुन्द्र रे शुर माइश्शो गोरशो रागी कोंइताक्व। मिनु मेको गोरशो रागीमी नाक्त सां सम्म गाक्मानु, ब्वाक्कु मथिदेम। उत्पत्ती २०:१
23 माराह माइश्शोमी जाक्दीश्शा, मेक ङा ब्वाक्कु तूने मचबेम। मारदे हना मेको ब्वाक्कु कशो बाक्त। मोपतीके मेको कली माराह नें वोइक्तेक्म। हिब्रू लोव़मी मारा देंशो कशो रुम्सीब।
24 मिनु मुरपुकीमी मोसा कली “मुल मार तूचा?” दे गन गन पाम्तेक्म। प्रस्थान १६:२
25 मोसामी चहिं परमप्रभु यावे कली पुंइस ङा पुंइस बाक्त। मिनु परमप्रभु यावेमी मोसा कली रवा आ शी का कोंइताक्व। मिनु मोसामी मेको शी ब्वाक्कुम ब्वारताक्व। मिनु मेको ब्वाक्कु मकशो ब्रोव़शो दुम्त। मेकेर इस्राएली आन कली आ फुल्लुम मुशा ब्रेक्शो नु आन पतीक लोव़ गेशो बाक्त। मोपा मेको आन कली नाक्ताक्व। उत्पत्ती २२:१
26 मिनु मेकोमी “गे परमप्रभु यावे, इन परमप्रभु आं लोव़ नेंशा, आं ङोंइती ठीक पाइतीनी हना, आं शेंशो लोव़ नेंशा, टिशा, आं अरेशो लोव़ टीतीनी हना, गो इजीप्त रागी ङा मुर आन कली पपाइश्शो रोइ इन कली मपपाइक्नुङ। मारदे हना गो इन कली सापाइक्ब परमप्रभु यावे नङ” देंत। ब्यवस्था ७:१५; उत्पत्ती २०:१७; ब्यवस्था ३२:३९; भजन संग्रह ३०:३; यसैया ५७:१८
27 मिनु इस्राएली मेकेर रे लशा, एलीममी जाक्दीत्तेक्म। मेकेर १२ ओटा धारा नु ७० ओटा रवा बाक्तेक्म। मेकोपुकी मेको ब्वाक्कु आ नेक्था बाक्तेक्म।