Exodus 14 in Sunwar

1 मिनु परमप्रभु यावेमी मोसा कली

2 “इस्राएली आन कली ‘गेपुकी इच्‍का लेत्‍चा माल्‍नीनी। मिग्‍दोल नु लल समुन्‍द्र आस दातेम बाक्‍शो पी-हहीरोथ, बाल-सेफोन आ ङोंइती इन बास बाक्‍तीके सेल्‍चा माल्‍नीनी। मेको लल समुन्‍द्र आ नेक्‍था बाक्‍ब’ देंचा माल्‍नेवे।

3 मिनु फाराओमी ‘गोरशो रागीमी आन लां जाम्‍शा, हेंथे गाक्‍नीम’ देंब।

4 मिनु गो फाराओ आ थुं काइ मटीब दुम्‍पाइक्‍नुङ। मिनु फाराओमी इन कली खेदा पाइब। गो फाराओ नु आ फौज आन कली आं सक्ति कोंइनुङ। मिनु इजीप्‍त रागी ङा मुर नेल्‍लेमी ‘परमप्रभु यावे बाक्‍ब’ दे तुइक्‍नीम” देंत। मिनु मोदेंशो पाम्‍तेक्‍म। प्रस्‍थान ४:२१; इजीकीएल २८:२२

5 मिनु इजीप्‍त रागी ङा मुरपुकीम आन पिप कली “इस्राएली प्रोक्‍ने थुम्‍तेक्‍म। गो मार पया? मारदे गो इस्राएली आन कली गेय प्रोंइपाइश्‍शा, लचा गेया?” दे थुं फाइश्‍शा, लोव़ पमुमा बाक्‍त।

6 मिनु पिपमी आ बग्‍गी ठीक पशा, आ लडाइ पाइबपुकी ठीक पवा बाक्‍त।

7 मिनु ६ सहे रिम्‍शो पा लडाइ पने चाप्‍ब बग्‍गी नु इजीप्‍त रागी ङा अरु बग्‍गी नु चलेब आन ठेयब मुर आन कली लाइश्‍शा, लमाक्‍त।

8 मिनु परमप्रभु यावेमी इजीप्‍त रागी ङा फाराओ कली काइ मटीब दुम्‍पाइक्‍तीके इस्राएली आन कली खेदा पामे बाक्‍त। इस्राएली चहिं ठेयब सक्तिमी ग्रूशा गाक्‍तेक्‍म। प्रस्‍थान ३:१९-२०

9 इजीप्‍त ङा फाराओ आ शारापुकी, शारा ङोइक्‍बपुकी, बग्‍गी नु लडाइ पाइब नेल्‍ल लल समुन्‍द्र आ नेक्‍था इस्राएली आन बास बाक्‍तीक पी-हहीरोथ सहर आ नेक्‍था बाल-सेफोन आ ङोंइती जाक्‍तेक्‍म।

10 मिनु इस्राएलीपुकी फाराओ नु आ लडाइ पाइबम आंम कली खेदा पशो तशा, हिंशा ख्रिंख्रि पाम्‍तेक्‍म। मिनु परमप्रभु यावे कली “वारच पाइय्‍यीकी” दे पुंइतेक्‍म।

11 मिनु मेकोपुकीम मोसा कली “गे आंइ कली मारदे इजीप्‍त रे ग्रुंइदीकी? इजीप्‍त रागीम मुर थिम्‍तीके मबाक्‍बा ङा? मारदे गोरशो रागीम साइक्‍थ चाक्गी?

12 गोपुकी इजीप्‍त रागीम बाक्‍कानु, इन कली ‘आंइ कली श्‍येत मगेकी। इजीप्‍त ङा मुर आन गेय पचा गेकी, मदेंका ङा? गोरशो रागीम बेक्‍चा क्‍येङा इजीप्‍त रागी ङा मुर आन गेय पक वा’ ” दे मोसा कली ग्रीतेक्‍म।

13 मिनु मोसामी मुर आन कली “महिनीन। मुलाक्‍ती परमप्रभु यावेमी दोपा इन कली इजीप्‍त ङा मुर रे प्रोंइबा, कोव़शा बाक्‍कीन। मुलाक्‍ती तशो इजीप्‍त ङा मुर आन कली गे लेंशा गेनायो मताइनीनी।

14 इन पचा ङा लडाइ परमप्रभु यावेमी पाइब। गे थुं नाइश्‍शा बाक्‍कीन” दे माइक्‍तीमी। ब्‍यवस्‍था १:३०; २इतिहास २०:१५,२९; यसैया ५१:९

15 परमप्रभु यावेमी मोसा कली “मारदे आं कली ठेयब सेंदा पा पुंइनेवे? इस्राएली आन कली ‘गाक्‍कीन’ दे मतो।

16 इ कोक्‍के लल समुन्‍द्र तार दिंदो। मो पवीनु, समुन्‍द्र ब्राशा, गाक्‍तीक लां दुम्‍ब। इस्राएलीपुकी हिलो मबाक्‍शो लांम गाक्‍ने चाप्‍नीम।

17 मिनु गोमी इजीप्‍त ङा मुर आन कली काइ मटीब दुम्‍पाइक्‍नुङ। मो दुम्‍मेनु, इस्राएली आन नोले खोइश्‍शा, लल समुन्‍द्र ओव़शा, खेदा पाइनीम। मिनु गो फाराओ आ मुरपुकी, आ बग्‍गी नु आ शारा ङोइक्‍ब नु लडाइ पा आं सक्ति कोंइशा ग्रानुङ।

18 गो फाराओ, आ बग्‍गी नु आ शारा ङोइक्‍ब आन कली आं सक्ति कोंइनुङ। मिनु इजीप्‍त ङा मुरपुकीमी ‘परमप्रभु यावेमी पाप्‍तु’ दे तुइक्‍नीम” देंत।

19 मिनु इस्राएली आन ङोंइती गाक्‍शो परमप्रभु आ स्‍वर्ग ङा गेय पाइब नोले गे लेश्‍शा लशा, इस्राएली आन नोले खोइक्‍तु। मेको आन ङोंइती गाक्‍शो गोस्‍स के थाम यो लेश्‍शा, आन नोले गाक्‍‍त। उत्‍पत्ती १६:७; प्रस्‍थान १३:२१

20 मेको गोस्‍स इजीप्‍त ङा फौज आन कली छिङछिङ दुम्‍माक्‍त। इस्राएली आन लडाइ पाइब आन कली चहिं छेङछेङ दुम्‍‍त। मोपा मेको नाक्‍दो इजीप्‍त ङा फौज इस्राएली आन नेक्‍था जाक्‍ने मचबेम। भजन संग्रह १०५:३९

21 मिनु मोसामी आ गुइ लल समुन्‍द्र तारी दिंदानु, परमप्रभु यावेमी नाक्‍दो नां दाप्‍तीके रे फश गिवार पपाइश्‍शा, समुन्‍द्र फ्राशा सोव़शो गाक्‍तीक लां सेल्‍तु।

22 मिनु इस्राएलीपुकी समुन्‍द्र ङा सोव़शो लां लाम्‍तेक्‍म। समुन्‍द्र ङा ब्‍वाक्‍कु चहिं आन ग्‍युरा नु पेरा गे गारो खोदेंशो पा बाक्‍त। यहोसु ४:२३; २राजा २:८; यसैया ११:१५-१६; १कोरिन्‍थी १०:१; हिब्रू ११:२९

23 मिनु इजीप्‍त रागी ङा लडाइ पाइब इस्राएली आन कली खेदा पा, मेको आन नोले लल समुन्‍द्र ओव़तेक्‍म। पिप आ शारापुकी, आ बग्‍गीपुकी नु आ शारा ङोइक्‍ब नेल्‍ल ओव़तेक्‍म।

24 मिनु सुनी कना परमप्रभु यावे गोस्‍स के थाम नु मी के थामम बाक्‍शा, इजीप्‍त ङा लडाइ पाइब आन कली कोव़शा हिंपाइक्‍तु।

25 आन बग्‍गी ङा गुगील पुइश्‍शा गेतीके, गाक्‍ने मचबेम। मिनु इजीप्‍त ङा मुरपुकीमी “इस्राएली रे प्रोक्‍य, परमप्रभु यावेमी मेको आन कली वारच पशा, इजीप्‍त ङा मुरपुकी नु लडाइ पाइब” देंमा बाक्‍त।

26 मिनु परमप्रभु यावेमी मोसा कली “इजीप्‍त रागी ङा मुर, आन बग्‍गी नु आन शारा ङोइक्‍ब आन कली ब्‍वाक्‍कुम सुम्‍पाइक्‍चा कली इ गुइ लेंशा समुन्‍द्र तार दिंदो” देंत।

27 मिनु मोसामी आ गुइ समुन्‍द्र तार दिंदानु, नां सोव़ची ना समुन्‍द्र ङोंइती ङा खोदेंशो दुम्‍त। मिनु इजीप्‍त ङा लडाइ पाइब लेश्‍शा प्रोक्‍ने मचबेम। मोपा परमप्रभु यावेमी इजीप्‍त ङा लडाइ पाइब आन कली समुन्‍द्रमी ख्रुम्‍तु।

28 मिनु ब्‍वाक्‍कु लेंशा ङोंइती ङा खोदेंशो दुम्‍मेनु, इजीप्‍त ङा बग्‍गी, शारा ङोइक्‍बपुकी नु फाराओ आ लडाइ पाइब आन कली सुम्‍शा, समुन्‍द्रमी योल्‍ताक्‍व। सुइ यो मब्रोंइम।

29 तन्‍न इस्राएली चहिं सोव़शो लां लशा, समुन्‍द्र शोक्‍साक्‍म। ब्‍वाक्‍कु गारो खोदेंशो पा, आन ग्‍युरा नु पेरा गे बाक्‍त।

30 मोपा परमप्रभु यावेमी मेको नाक्‍ती इस्राएली आन कली इजीप्‍त रागी ङा लडाइ पाइब रे प्रोंइतीमी। मिनु इस्राएलीपुकीमी इजीप्‍त ङा मुर आन कली दिल दिल थिश्‍शा, समुन्‍द्र आ नेक्‍था बेक्‍शो ताम्‍तेक्‍म।

31 मिनु मुरपुकीमी “परमप्रभु यावेमी इजीप्‍त ङा मुर आन कली साइक्‍तीमी” दे तुइश्‍शा, परमप्रभु यावे क्‍येङा हिंतेक्‍म। मिनु “परमप्रभु यावेमी नेल्‍ल पने चाप्‍ब। मोसा आ गेय पाइब बाक्‍ब” दे थमा सुइक्‍तेक्‍म। प्रस्‍थान १९:९; २इतिहास २०:२०