Exodus 1 in Sunwar
1 आन खिं खिं ङा मुर लाइश्शा, याकूब नु इजीप्त लाइब इस्राएल आ तौ सु सु बाक्मा बाक्त देंशा हना, उत्पत्ती ४६:८-२७
2 रूबेन, सिमियोन, लेवी, यहूदा,
3 इस्साकार, जबूलून, बेन्यामीन,
4 दान, नाप्ताली, गाद नु आशेर बाक्मा बाक्त।
5 मिनु याकूब आ तौ आन खिं खिं ङा मुर नेल्ल पा ७० जना बाक्मा बाक्त। योसेफ चहिं इजीप्त रागीमी बाक्शो बाक्माक्त।
6 मिनु नोले योसेफ नु मेको आ लोक्ब आन पाला ङा मुर नेल्ल बेक्मा बाक्त। उत्पत्ती ५०:२६
7 मिनु इस्राएल आ चच युइ सोशा बोशा शुश दुम्मा बाक्त। शुश दुम्शा ङा मिन, बोल्यो दुम्मा बाक्त। मिनु इस्राएल आ मुरपुकीमी रागी नेल्ल ब्रीमा बाक्त। प्रेरित ७:१७-१९
8 मिनु नोले योसेफ कली मतुइक्ब पिप काम इजीप्त रागी कली सासन पवा बाक्त।
9 मेकोमी आ मुर आन कली “नेनीन, इं रागीमी बाक्शो इस्राएल ङा मुरपुकी इं क्येङा शुश नु बोल्यो दुम्तेक्म।
10 मेको आन पर्बमी शुश मिम्शा, सल्ला पय। मो मपाइतय हना, मेको शुश दुम्शा, नोले लडाइ दुम्मेनु, इं जोरी सत्रु आन कली वारच पाइश्शा, एक रे प्रोक्नीमी, कोर में” दे आ मुर आन कली माइक्मी बाक्त।
11 मोपतीके मेकोपुकीमी इस्राएली आन कली श्येत गेशा, गेय पपाइक्चा कली कोव़ब ठेयब मुरपुकी वोदमे बाक्त। मिनु इस्राएलीपुकीमी फाराओ माइश्शो पिप आ मार मार वोइक्चा कली पिथोम नु रामेसेस सहर निक्शी सेल्मे बाक्त। उत्पत्ती १५:१३; उत्पत्ती ४७:११
12 तन्न इस्राएली गिश श्येत जामे, मिश बारना बारन शुश दुम्शा, इजीप्त रागी ब्रीमा बाक्त। मिनु मेको आन कली तशा, इजीप्त ङा मुर शुश हिंमा बाक्त।
13 मोपतीके इस्राएली आन कली ङोंइती क्येङा यो शुश गेय पपदमे बाक्त। उत्पत्ती १५:१३
14 शुश श्येत गेशा, शुश गेय पपदमे बाक्त। मार गेय पपदमे बाक्त देंशा हना, हिलो निपदमे बाक्त, इंटा सेल्पदमे बाक्त, रू ङा गेय यो पपदमे बाक्त। तेको गेय गेमे, मेको शुश श्येत ङा गेय बाक्माक्त।
15 मिनु इजीप्त ङा पिपमी हिब्रू मीश मुर आन आल थिची ना वारच पाइब आन ठेयब मीश मुर आस कली लोव़ पवा बाक्त। मेको आन दाते ङा का आ नें शिप्रा नु अर्को आ नें पुआ बाक्माक्त।
16 मिनु फाराओमी “गे निक्शी हिब्रू मीश मुर आन कली आल थिची ना वारच पाइनीसी। तौ थिम्तेक्म हना, सतीसे। तमी बाक्त हना, मसतीसे” दे माइक्सी बाक्त।
17 तन्न मेको मीश मुर आन कली वारच पाइब नेल्लेमी परमप्रभु कली मान पा हिंशा, इजीप्त ङा पिपमी देंशो मपथु, वोंइश आल आन कली यो मसदमे बाक्त।
18 मिनु इजीप्त ङा पिपम मेको वारच पाइब मीश मुर आस कली ब्रेश्शा “गे मारदे वोंइश आल आन कली यो ब्रोंइचा गेसी? मारदे मोदेंशो पसी?” दे लोव़ पवा बाक्त।
19 मिनु मेको मीश मुरुमी “हिब्रू मीश मुरपुकी इजीप्त ङा मीश मुर आन क्येङा बोल्यो बाक्नीम। मोपतीके गो जाक्दीत्चा क्येङा ङोंइती आल थिने थुम्शो बाक्नीमी” देंसा बाक्त।
20 मोपतीके परमप्रभुमी मेको आल थिचा वारच पाइब मीश मुर आन कली आसीक गेवा बाक्त। मिनु इस्राएली शुश दुम्शा, बोल्यो दुम्मा बाक्त।
21 वारच पाइब मीश मुरपुकी परमप्रभु कली मान पा हिंतीके परमप्रभुमी मेको आन खिं कली यो आसीक गेवा बाक्त।
22 मिनु पिप फाराओमी आ मुर आन कली “हिब्रूपुकीमी दोशो तौ थीमे, मेको नेल्ल नील खोलाम लाइश्शा ताइक्तीन। आन तमी आन कली चहिं ब्रोंइचा गेने” दे हुकुम पवा बाक्त।