Deuteronomy 26 in Sunwar
1 मिनु मोसामी “परमप्रभु यावे, इन परमप्रभुमी इन कली गेशो रागी जाक्दीश्शा, इन के सेल्शा, मेक बाक्नीनु,
2 परमप्रभु यावे, इन परमप्रभुमी इन कली गेशो रागी ङा ङोंइती मीशो मारेइ मारेइ डालो काम कुर पा परमप्रभु यावे, इन परमप्रभु आ योव़शो बाक्तीकेम लतीन। प्रस्थान २३:१९; लेवी २:१४
3 मिनु गे मेना गेय पाइब चढ़ेब आन बाक्तीक लचा माल्नीनी। मिनु मेको कली गो परमप्रभु यावे, इन परमप्रभु आ ङोंइती ‘परमप्रभु यावेमी आंइ किकी पिपी नु कसम जशा गेनुङ, देंशो रागीम गो मुलाक्ती जाक्ती’ देंचा माल्नीनी।
4 मिनु मेको चढ़ेबमी मेको डालो इन गुइ रे ताक्शा, परमप्रभु यावे, इन परमप्रभु कली चढ़ेतीक आ ङोंइती वोइक्चा माल्ब।
5 मिनु गेपुकीमी परमप्रभु यावे, इन परमप्रभु आ ङोंइती ‘आं किकी पिपी हिरब अरामी बाक्तेक्म। मेको इजीप्त रागीम अर्को रागी ङा मुर दुम्शा बाक्शो बाक्त। ङोंइती मेको शुश मुर मबाक्म। नोले शोशा बोशा शुश नु बोल्यो ठेयब रागी ङा मुर दुम्तेक्म। ब्यवस्था ६:२०-२५; यहोसु २४:२-१३; भजन संग्रह ७८:-; भजन संग्रह १०५:-; भजन संग्रह १३६:-
6 मिनु इजीप्तीपुकीम आंइ कली मरिम्शो पा दिप्शा, आंइ कली शुश गेय पपाइक्तेक्म।
7 मिनु गोपुकीमी परमप्रभु यावे, इं किकी पिप आन परमप्रभु कली पुंइतक। मिनु मेकोमी आंइ पुंइशो नेंशा, आंइ श्येत तशा नु दोपा आंइ कली दिप्शो बाक्मा, मेको ताप्तु।
8 मिनु परमप्रभु यावेमी शुश सक्ति पाइश्शो ठेयब बोल पतीकेमी हिंचा ङा चिन्ड नु छक लाक्चा ङा गेय कोंइशा, आंइ कली इजीप्त रे ग्रुंइशा एक चाक्तु।
9 मेकोमी एकेर चाक्शा, एको रागी आंइ कली गेप्तु। मिनु एको रागीम दूध नु खुदो शुश बाक्त।
10 मिनु परमप्रभु यावे, आं कली गेशो रागी ङा ङोंइती ङा मीशो मारेइ मारेइ इन बाक्तीक चाक्ता’ देंचा माल्तीनी। मिनु मेको नेल्ल परमप्रभु यावे, इन परमप्रभु आ ङोंइती वोइश्शा, मेको परमप्रभु यावे, इन परमप्रभु आ ङोंइती बाप्शा ठेयब सेल्चा माल्नीनी।
11 मिनु गे परमप्रभु यावे, इन परमप्रभुमी इन कली नु इन खिं ङा मुर आन कली शुश गेशो तशा, लेवीपुकी नु गेपुकी नु बाक्ब अर्को रागी ङा मुरपुकी ग्येरसीचा माल्नीमी। ब्यवस्था १६:११-१४
12 मिनु गेपुकीमी बर्स सां सांमी इन बाली नाली ङा मारेइ मारेइ रे इन सहरम १० भाग ङा भाग का तिल्शा वोइक्चा माल्नीनी। मेको इन सहर ङा लेवी आ थर ङा मुर, अर्को रागी ङा मुर, रोम रोइक्च नु वोंइश बेक्शो मीश मुर आन कली गारचा ङा जचा थोव़क बाक्ब। ब्यवस्था १४:२७-२९
13 मिनु गेपुकीमी परमप्रभु यावे, इन परमप्रभु आ ङोंइती ‘गो इन भाग आं खिं रे तिल्शा, इन शेंशो खोदेंशो पा लेवी आ थर ङा मुर, अर्को रागी ङा मुर, रोम रोइक्च नु वोंइश बेक्शो मीश मुर आन कली गेता। गो इन शेंशो नेल्ल पाता। गो मेको काइ मप्रेंदु’ देंचा माल्नीनी।
14 रोंका पङानु, मेको रे मारेइ मजङ। गो ग्रांग्रा दिशो बाक्ङानु, मेको रे मारेइ मग्रुंइदु। मिनु बेक्शो मुर आन कली यो मेकेर रे मारेइ मगेशो बाक्ती। गो परमप्रभु यावे, आं परमप्रभु आ देंशो टिशा, इन अरेशो नेल्ल खाप्शो बाक्ती। गन्ती १९:१४-१५; इजीकीएल २४:१७,२२; होसे ९:४
15 इन स्वर्ग ङा बाक्तीके रे कोव़शा, इन मुर, इस्राएली, आंइ कली आसीक गेने। मिनु आंइ किकी पिपी नु कसम जशा गेशो शुश दूध नु खुदो बाक्शो रागी कली यो आसीक गेने” दे परमप्रभु कली लोव़ पचा माल्ब।
16 मिनु मोसामी “मुलाक्त परमप्रभु यावे, इन परमप्रभुमी इन कली मेको फुल्लुम मुशा ब्रेक्शो लोव़ नु निसाफ पतीक लोव़ पचा माल्नीनी। गेपुकीमी मेको कली इन थुंम वोइश्शा, इन थुं नु सोक्त नेल्लेमी टिने।
17 गेपुकीमी मुलाक्ती परमप्रभु यावे कली ‘गे आंइ परमप्रभु बाक्नीनी। गो इन लां खोइक्नीकी। मिनु इन फुल्लुम मुशा ब्रेक्शो लोव़, इन शेंशो नु इन निसाफ पतीके लोव़ पाइनीकी नु इन देंशो टीनीकी’ दे परमप्रभु कली लोव़ पाइतीनी।
18 मिनु मुलाक्ती परमप्रभु यावेमी इन कली ‘गो इन कली आं दाक्शो मुर सेल्ता। आं शेंशो नेल्ल टिचा माल्नीनी।
19 गो आं सेल्शो रागी रागी आन दातेमी इन कली नेल्ल क्येङा ठेयब सेल्नुङ। मान पाइक्चा पुंइसीशा, इन नें ठेयब सेल्चा नु शुश दारशो सेल्नुङ। मिनु परमप्रभु यावे, इन परमप्रभु आ मुरपुकी दुम्चा माल्नीनी’ दे परमप्रभु यावेमी इन कली देंशो बाक्त” देंत। ब्यवस्था १८:१